న్యూఢిల్లీ: ఉత్తరప్రదేశ్లోని ఘజియాబాద్లో నాలుగేళ్ల అత్యాచార బాధితురాలికి సకాలంలో చికిత్స అందించడంలో విఫలమై, ఆమె మరణానికి కారణమైన రెండు ప్రైవేట్ ఆసుపత్రులు, వాటి వైద్యులపై సుప్రీంకోర్టు శుక్రవారం తీవ్రంగా మండిపడింది. “ఆమె పేదరాలు కాబట్టే మీరు ఆమెను నిర్లక్ష్యం చేశారు,” అని భారత ప్రధాన న్యాయమూర్తి సూర్యకాంత్ నేతృత్వంలోని ధర్మాసనం ఆసుపత్రుల వైఖరిపై ఆగ్రహించింది. విధులను నిర్వర్తించడంలో విఫలమైనందున, మీ పేరు నుండి ‘డాక్టర్లు’ అనే పదాన్ని తొలగించండని ఆసుపత్రి యాజమాన్యాన్ని కోర్టు ఆదేశించింది.
గత మార్చి 16న ఘజియాబాద్లో నాలుగేళ్ల బాలికపై అత్యాచారం, హత్యకు సంబంధించిన కేసు వివరాల్లోకి వెడితే.. చాక్లెట్లు కొనిస్తానని చెప్పి పొరుగున గల ఓ వ్యక్తి ఆ బాలికను ఇంటి నుంచి ప్రలోభపెట్టి తీసుకువెళ్లినట్లు ఆరోపణలు వచ్చాయి. బాలిక ఇంటికి తిరిగి రాకపోవడంతో కుటుంబ సభ్యులు ఆమెను వెతకడం ప్రారంభించారు. ఆ తర్వాత ఆమె సమీపంలోని ఓ ప్రదేశంలో రక్తపు మడుగులో అపస్మారక స్థితిలో కనిపించింది. నిస్సహాయ స్థితిలో ఉన్న కుటుంబ సభ్యులు ఆమెను రెండు ప్రైవేట్ ఆసుపత్రులకు తీసుకువెళ్లగా, ఆమెను చేర్చుకోవడానికి ఆయా ఆసుపత్రులు నిరాకరించినట్లు ఆరోపణలు ఉన్నాయి.
ఆ తర్వాత ఆమెను ఘజియాబాద్ జిల్లా ఆసుపత్రికి తీసుకువెళ్లగా, అక్కడ వైద్యులు ఆమె మరణించినట్లు ప్రకటించారు. కనుగొన్న తర్వాత ఆ బాలిక రెండు గంటల పాటు బతికే ఉందని, సకాలంలో చికిత్స అందించి ఉంటే ఆమె ప్రాణాలను కాపాడి ఉండేవారని తండ్రి వాదించారు. ఆసుపత్రులు సకాలంలో వైద్య సంరక్షణ అందించలేదన్న అతని ఆరోపణలలో నిజం ఉందని సుప్రీంకోర్టు నియమించిన ప్రత్యేక దర్యాప్తు బృందం (SIT) కనుగొంది.
సీజేఐ ఈ సందర్బంగా వైద్యులతో మాట్లాడుతూ, “మీరు మీ విధిని నిర్వర్తించనప్పుడు, మీ పేరు పక్కన ‘డాక్టర్’ అని రాసుకునే హక్కు మీకు లేదు,” అని ఆగ్రహించారు. మీకు సున్నితత్వం ఉండి ఉంటే, సౌకర్యం లేకపోతే ఆ బిడ్డను వేరే ఆసుపత్రికి తీసుకువెళ్లి ఉండేవారని, ఆమె పేదరాలు కావడం, మీ ఫీజు భరించలేకపోవడం వల్ల మీరు ఆమెను నిర్లక్ష్యం చేశారని ప్రధాన న్యాయమూర్తి అన్నారు.
ఇందుకు శిక్షగా, బాధితురాలి కుటుంబానికి స్వచ్ఛందంగా విరాళాలు ఇవ్వాలని కోర్టు ఆసుపత్రులను కోరింది, అలా చేయని పక్షంలో ఖర్చులు ఎదుర్కోవాల్సి వస్తుందని హెచ్చరించింది. గత విచారణలో, “పరిహారానికి మించి పరిష్కరించాల్సిన విషయం ఒకటి ఉంది – అదే జవాబుదారీతనం,” అని ప్రధాన న్యాయమూర్తి నొక్కి చెప్పారు. కాగా ఈ కేసులో పోలీసుల పాత్ర కూడా సుప్రీంకోర్టు పరిశీలనలోకి వచ్చింది. సంఘటన జరిగిన వెంటనే బాలిక కుటుంబం స్థానిక పోలీసులకు ఫిర్యాదు చేసింది, కానీ వారు కేసు విచారణకు స్వీకరించకపోగా, వారిపై శారీరకంగా దాడి చేశారని ఆరోపణలు ఉన్నాయి.
అయితే తీవ్ర నిరసనల నేపథ్యంలో మరుసటి రోజే మార్చి 17న ఎఫ్ఐఆర్ నమోదు చేయగా, మార్చి 18న నిందితుడిని అరెస్ట్ చేశారు. అయితే, ఆ ఎఫ్ఐఆర్లో పోక్సో (POCSO) లేదా సెక్షన్ 376 (అత్యాచారానికి శిక్ష) గురించి ఎటువంటి ప్రస్తావన లేదు. ఏప్రిల్లో, ఈ కేసు విషయంలో ఘజియాబాద్ అధికారుల ‘ఉదాసీనత’, ‘సున్నితత్వం లేకపోవడం’ పట్ల సుప్రీంకోర్టు వారిని తీవ్రంగా మందలించింది. కేసు రికార్డులతో పాటు పోలీస్ కమిషనర్ను, దర్యాప్తు అధికారిని పిలిపించింది.
ఈ ఆరోపిత నేరంలో అత్యంత దిగ్భ్రాంతికరమైన విషయం ఏమిటంటే, రెండు ప్రైవేట్ ఆసుపత్రులు, అలాగే స్థానిక పోలీసులు ప్రదర్శించిన పూర్తి ఉదాసీనత, సున్నితత్వం లేని వైఖరిగా శుక్రవారం సుప్రీంకోర్టు పేర్కొంది.
