కేరళం: మాజీ ముఖ్యమంత్రి పినరయ్ విజయన్ ఇంట్లో ఎన్ఫోర్స్మెంట్ డైరెక్టరేట్ (ఈడీ) బుధవారం సోదాలు నిర్వహించింది. కొచ్చిన్ మినరల్స్ అండ్ రుటైల్ లిమిటెడ్ (CMRL) కేసులో మనీలాండరింగ్ దర్యాప్తులో భాగంగా, ఎన్ఫోర్స్మెంట్ డైరెక్టరేట్ (ED) కేరళలోని పినరయ్ విజయన్కు సంబంధించిన నివాసం సహా మొత్తం 10 ప్రాంతాల్లో సోదాలు జరిపింది. ఈ కేసులో విజయన్ కుమార్తె టి. వీణా ప్రమేయం ఉన్నట్లు ఆరోపణలు ఉన్నాయి. సీఎంఆర్ఎల్, వీణాకు చెందిన ఎక్సాలాజిక్ సొల్యూషన్స్ ప్రైవేట్ లిమిటెడ్ కంపెనీకి సంబంధించిన ఆర్థిక అవకతవకలపై ఏజెన్సీ కొనసాగిస్తున్న దర్యాప్తులో భాగంగానే ఈ చర్య తీసుకున్నట్లు అధికారులు తెలిపారు.
ఈ కేసులో ED దర్యాప్తును రద్దు చేయడానికి కేరళ హైకోర్టు నిరాకరించిన ఒక రోజు తర్వాత ఈ సోదాలు జరగడం గమనార్హం. మనీ లాండరింగ్ నిరోధక చట్టం కింద ఈ దాడులు నిర్వహించామని, తిరువనంతపురంలోని విజయన్ అద్దె ఇంట్లో కూడా సోదాలు జరిగాయని అధికారులు తెలిపారు. కోజికోడ్లో వీణా భర్త, మాజీ మంత్రి, ఎమ్మెల్యే అయిన పి.ఎ. మహమ్మద్ రియాస్కు సంబంధించిన ప్రాంగణాలలో కూడా ఈడీ బృందాలు సోదాలు నిర్వహించాయి.
సింథటిక్ రూటైల్, పారిశ్రామిక రసాయనాల తయారీలో నిమగ్నమైన కేరళకు చెందిన కంపెనీ సీఎంఆర్ఎల్, లంచం, మనీలాండరింగ్ ఆరోపణలపై పరిశీలనలో ఉంది. ఎక్సాలాజిక్ సొల్యూషన్స్ ఎలాంటి సేవలు అందించకుండానే సీఎంఆర్ఎల్ నుండి భారీ మొత్తంలో డబ్బులు పొందిందనే ఆరోపణల చుట్టూ ఈ వివాదం కేంద్రీకృతమై ఉంది. ఈ కేసులో విజయన్ను నేరుగా నిందితుడిగా పేర్కొననప్పటికీ, కేరళ రాష్ట్ర రాజకీయాల్లో దుమారాన్ని రేకెత్తించింది. కేరళ రాష్ట్ర పారిశ్రామిక అభివృద్ధి సంస్థకు సీఎంఆర్ఎల్లో 13.4 శాతం వాటా ఉంది.
ఈ ఆరోపణలు తొలుత ఆగస్టు 2023లో వెలుగులోకి వచ్చాయి. ఎక్సాలాజిక్ ఎలాంటి సేవలు అందించకుండానే 2017 నుండి 2020 మధ్య సీఎంఆర్ఎల్ నుండి రూ. 1.72 కోట్లు పొందినట్లు నివేదికలు పేర్కొన్నాయి. ఈ కేసులోని మరో కథనం ప్రకారం.. ఆ ఐటీ సంస్థ ఎక్సాలాజిక్కు ఎలాంటి సేవలు అందించనప్పటికీ, 2018, 2019 మధ్య సీఎంఆర్ఎల్ ఆ సంస్థకు రూ. 1.72 కోట్లను అక్రమంగా చెల్లించిందనే ఆరోపణలు ఉన్నాయి. ఈ విషయాలు వెలుగులోకి వచ్చిన తరువాత, సమగ్ర దర్యాప్తు జరపాలని కేంద్రం సీరియస్ ఫ్రాడ్ ఇన్వెస్టిగేషన్ ఆఫీస్ను ఆదేశించింది.
వీణా, సీఎంఆర్ఎల్ మేనేజింగ్ డైరెక్టర్ శశిధరన్ కర్త, మరో 25 మందిని నిందితులుగా ఎస్ఎఫ్ఐఓ తన 160 పేజీల ప్రాసిక్యూషన్ ఫిర్యాదులో పేర్కొంది. ఈ ఏజెన్సీ సీఎంఆర్ఎల్, ఎక్సాలాజిక్ సొల్యూషన్స్, దాని అనుబంధ సంస్థ ఎంపవర్ ఇండియా క్యాపిటల్ ఇన్వెస్ట్మెంట్స్తో సహా పలు కంపెనీలను కూడా నిందితులుగా పేర్కొంది. ఎస్ఎఫ్ఐవో ప్రకారం.. వీణ సంస్థ CMRL నుండి రూ. 2.70 కోట్లు పొందింది. దీనికి అదనంగా, CMRL ఉద్యోగుల వాంగ్మూలాలను ఉటంకిస్తూ, ఆ సంస్థకు రూ. 1.72 కోట్లు చెల్లించినట్లు ఆదాయపు పన్ను మధ్యంతర పరిష్కార మండలి (Income Tax Interim Settlement Board) 2023లో నివేదించింది.
ఈ ఆరోపణలపై దర్యాప్తు జరిపేందుకు 2024లో PMLA కింద ఈడీ ఓ కేసు నమోదు చేసింది. అక్రమ చెల్లింపుల ఆరోపణలకు సంబంధించి వీణపై విచారణ ప్రక్రియలను ప్రారంభించడానికి కేంద్ర కార్పొరేట్ వ్యవహారాల మంత్రిత్వ శాఖ ఆ తర్వాత ఆమోదం తెలిపింది. కార్పొరేట్ మోసాలకు సంబంధించిన కంపెనీల చట్టం, 2013లోని సెక్షన్ 447 కింద ఆమెపై అభియోగాలు మోపాయి. ఈ సెక్షన్ కింద నేరం రుజువైతే ఆరు నెలల నుండి 10 సంవత్సరాల వరకు జైలు శిక్షతోపాటు, ఆరోపించబడిన మోసంలో ఇమిడి ఉన్న మొత్తానికి మూడు రెట్ల వరకు జరిమానా విధించే అవకాశం ఉంది.
