జూబ్లీహిల్స్ ఉప ఎన్నికల్లో కాంగ్రెస్, బీఆర్ఎస్ ల మధ్య టగ్ ఆఫ్ వార్ ఉంటుందని భావించారంతా. కానీ సీన్ రివర్స్ అయ్యింది. వార్ వన్ సైడ్ అయిపోయింది. నవీన్ యాదవ్ చరిష్మా బాగా పనిచేసింది. దానికి పోల్ మేనేజ్ మెంట్ తోడయ్యింది. బీఆర్ఎస్ అభ్యర్ధిపై సానుభూతి కన్నా, కాంగ్రెస్ పోల్ మేనేజ్మెంట్ విజయం సాధించింది.
విషయం ఏమిటంటే.. కాంగ్రెస్ ప్రభుత్వంపై జూబ్లీహిల్స్ ప్రజలు పెద్దగా సానుకూలంగా లేరు. ప్రభుత్వ పనితీరుపై సంతృప్తిగా ఉన్నట్టు ఎక్కడా కనిపించలేదు. అలా అని బీఆర్ఎస్ ప్రభుత్వంలో తమ సెగ్మెంట్ బాగా అభివృద్ధి అయ్యిందని కూడా భావించలేదు. కానీ కాంగ్రెస్ అభ్యర్ధిపై మాత్రం జనాల్లో పాజిటివ్ నెస్ కనిపించింది. కొన్ని ఏరియాల్లో మధ్యాహ్నం 12 గంటల ముందు కాంగ్రెస్, బీఆర్ఎస్ పార్టీల మధ్య పోటాపోటి నడిచినా., ఆ తర్వాత గాలి కాంగ్రెస్ వైపు మళ్ళింది.
సహజంగా ఉప ఎన్నికల్లో పవర్ లో ఉన్న పార్టీకి ప్లస్ పాయింట్ ఉంటుంది. ఎందుకంటే అధికార యంత్రాంగం వారి చేతుల్లో ఉంటుంది కాబట్టి. ఇది పోల్ మేనేజ్మెంట్ చేయడానికి పనికొస్తుంది. ప్రత్యర్ధుల దూకుడుకు బ్రేకులు వేసే విధంగా దోహదపడుతుంది. బీఆర్ఎస్ ప్రభుత్వంలో వచ్చిన ఐదు ఉప ఎన్నికల్లో దాదాపు ఇదే జరిగింది. అప్పుడు బీఆర్ఎస్ ఉపయోగించిన, ప్రయోగించిన విధానాన్నే ఫాలో అయ్యింది హస్తం పార్టీ. ఫలితంగా వారి ప్రయోగం వర్కవుట్ కానుంది.
జూబ్లీహిల్స్ బై ఎలక్షన్ లో గెలుపు కోసం కారు పార్టీ సర్వ శక్తులూ ఒడ్డింది. మాగంటి గోపీనాథ్ మరణం తో వచ్చిన ఉప ఎన్నిక కాబట్టి వారి కుటుంబానికి సానుభూతి కలసి వస్తుందని ఆశించింది. కానీ కొంతమేర సానుభూతి పనిచేసింది కూడా. అయితే అది మాగంటి ఫ్యామిలీ పై కాదు., గులాబీ పార్టీ బాస్ కేసీఆర్ పై మాత్రమే. అధికార కాంగ్రెస్ పార్టీకి ఆ మాత్రం పోటీ ఇవ్వగలిగారంటే అది ఒక్క కేసీఆర్ చరిష్మా తోనే..
ఎన్నికల్లో గెలుపోటములు సహజమే. కానీ ఒక్క గెలుపుతో భవిష్యత్ రాజకీయాలను, పార్టీల బలాబలాలను అంచనా వేయలేం. సరిగ్గా రెండేళ్ల క్రితం జరిగిన సాధారణ అసెంబ్లీ ఎన్నికలకు 8 నెలల ముందు జరిగిన మునుగోడు బైపోల్ లో కాంగ్రెస్ పార్టీకి డిపాజిట్ కూడా దక్కలేదు. ఆ తర్వాత అదే సెగ్మెంట్ లో కారు పార్టీనీ చిత్తు చిత్తుగా ఓడించింది కాంగ్రెస్. అందుకే చెబుతున్నా ఉప ఎన్నికకు, జనరల్ ఎన్నికలకు చాలా తేడా ఉంటుంది. ఉప ఎన్నిక గెలుపును బట్టి గెలిచిన పార్టీ చరిష్మా పెరిగిందనో, ప్రభుత్వంపై ప్రజలు పాజిటివ్ గా ఉన్నారనో, ప్రత్యర్ధి పార్టీల పని అయిపోయిందనో విశ్లేషణ చేయలేం.
కానీ ఒక్కటి మాత్రం నిజం. జూబ్లీహిల్స్ కాంగ్రెస్ ది కాదు., నవీన్ యాదవ్ ది. కారు పార్టీపై కాంగ్రెస్ గెలుపు అనొద్దు. కాంగ్రెస్ ప్లేస్ లో నవీన్ యాదవ్ అని రాయాల్సి వస్తుంది.
✍ కిరణ్ రెడ్డి వరకాంతం
(నిన్న జూబ్లిహిల్స్ ఉప ఎన్నిక కవరేజ్ చేసిన అనుభవంతో చేసిన విశ్లేషణ)
