మేడారం: నిర్దేశించిన గడువులోగా మేడారం జాతర ఆధునికీకరణ, అభివృద్ధి పనులు పూర్తి కావలసిందేనని ఉమ్మడి వరంగల్ జిల్లా ఇంఛార్జి మంత్రి, రెవెన్యూ మంత్రి పొంగులేటి శ్రీనివాసరెడ్డి అధికారులను, కాంట్రాక్టర్లను ఆదేశించారు. సహచర మంత్రులు సీతక్క, కొండా సురేఖ, మహబూబాబాద్ ఎంపీ బలరాం నాయక్ లతో కలిసి మంత్రి పొంగులేటి శుక్రవారం మేడారంలో పర్యటించి జాతర పనులను పరిశీలించారు. జాతర ప్రాంగణంలో అధునాతనంగా చేపట్టిన అభివృద్ధి పనులు పురోగతిని ఆయన అడుగడుగునా పరిశీలించారు.
ఈ సందర్బంగా జాతర పనులను పర్యవేక్షిస్తున్న వివిధ విభాగాల అధికారులకు, కాంట్రాక్టర్లకు మంత్రి పొంగులేటి కీలక ఆదేశాలు జారీ చేశారు. డిసెంబర్ 4వ తేదీన అమ్మవార్ల గద్దెల ప్రతిష్టకు సంబంధించిన అన్ని పనులను ఆయా తేదీలోగా పూర్తి చేయాల్సిందేనని అన్నారు. అదేవిధంగా రోడ్ల విస్తరణ, దేవస్థానానికి సంబంధించిన మొత్తం పనులను డిసెంబర్ 30వ తేదీలోగా ఎట్టి పరిస్థితుల్లోనూ పూర్తి చేయాలన్నారు. కోటి మందికిపైగా భక్తులు సందర్శించే మేడారం మహా జాతర తేదీ సమీపిస్తోందని, పనుల నిర్వహణలో అలక్ష్యం ప్రదర్శిస్తే సహించేది లేదన్నారు.
జాతర తేదీలకు ముందే మేడారం ప్రాంగణంలో చేపట్టిన ఆధునికీకరణ, అభివృద్ధి పనులను పూర్తి చేసి, సర్వాంగ సుందరంగా ముస్తాబు చేయాల్సిందేనని పొంగులేటి అన్నారు. అదేవిధంగా రహదారుల నిర్మాణం, వాచ్ టవర్ల పనులను కూడా పూర్తి చేయాలన్నారు. బస్టాండ్ పనులను, జంపన్నవాగు వద్ద స్నానఘట్టాలను కూడా మంత్రి పొంగులేటి పరిశీలించారు. భక్తులకు ఎటువంటి అసౌకర్యం కలగకుండా అవసరమైన అన్ని పనులు పూర్తి చేయాలని అధికారులకు ఆదేశాలు జారీ చేశారు. తన పర్యటన సందర్భంగా మంత్రులు పొంగులేటి, సీతక్క, కొండా సురేఖలు సమ్మక్క-సారలమ్మ వనదేవతలను దర్శనిం చేసుకున్నారు.
