హైదరాబాద్: ప్రముఖ టాలీవుడ్ నిర్మాత సి. కళ్యాణ్ ఏమంటున్నారు? సినిమాల పైరసీకి పాల్పడిన ఐ బొమ్మ రవిని ఎన్కౌంటర్ చేయాలంటున్నారు. ఇలాంటి దుర్మార్గుల్నీ అరెస్టులు, శిక్షలు కాదు, ఏకంగా ఎన్కౌంటర్ చేయాలి అంటున్నారు. వాళ్లు (పోలీసులు) చేయకపోయినా సినిమా వాళ్లయినా చేయాలి కనీసం.. అంటున్నారు. వందల కోట్లు ఖర్చు చేసి, వందలాది మందితో సినిమా తీస్తున్నవారి బ్లడ్డు తాగున్నవారి బ్లడ్ చూడడం చాలా అవసరమంటున్నారు. వచ్చే రోజుల్లో ఒక్కరికన్నా అలా జరిగితే (ఎన్కౌంటర్) ఆ తర్వాత వాడికి భయం కలుగుుతందన్నారు. కడుపు మంట, బాధతో తాను ఈ మాట్లాడుతున్నట్లు సి. కళ్యాణ్ నిన్న మీడియాతో పేర్కొన్నారు. ఇదే సందర్భంగా ఐ బొమ్మ రవిని పట్టుకున్న హైదరాబాద్ పోలీసులను సత్కరిస్తామని కూడా సి. కళ్యాణ్ చెప్పారు.
సినిమాల పైరసీకి పాల్పడడం చట్టప్రకారం ఐ బొమ్మ రవి చేష్టలు నేరమే కావచ్చు. కానీ ‘ఎన్కౌంటర్’ చేయాల్సినంత నేర తీవ్రత రవి చర్యల్లో ఉందా? లేదా? అనేది తేల్చాల్సింది సి. కళ్యాణ్ వంటి ప్రముఖ టాలీవుడ్ నిర్మాతలు మాత్రం కాదు. ఎందుకంటే ఐ బొమ్మ రవికి సోషల్ మీడియాలో అనూహ్య మద్ధతు లభిస్తోంది. అంతమాత్రాన ఐ బొమ్మ రవి చేష్టలను సమర్థించాలనే సూత్రం మాత్రం కాదిక్కడ. రవిపై మోపిన అభియోగాలను నిర్ధారించాల్సింది న్యాయస్థానాలు మాత్రమే. కానీ ఇదే సందర్భంలో ‘ఎన్కౌంటర్’ అనే పదాన్ని ఉపయోగించిన సి. కళ్యాణ్ వ్యాఖ్యలపైనే భిన్నాభిప్రాయాలు వ్యక్తమవుతున్నాయి.
ఇదీ చదవండి:
హైదరాబాద్ పోలీస్ కమిషనర్ గా ఇటీవలే బాధ్యతలు చేపట్టిన వీసి సజ్జన్నార్ ఆధ్వర్యంలో జరిగిన ‘ఎన్కౌంటర్’ ఘటనల నేపథ్యంలో బహుషా సి. కళ్యాణ్ వంటి ప్రముఖ నిర్మాత ఐ బొమ్మ రవి ‘బ్లడ్’ను ‘ఎన్కౌంటర్’ ఘటన ద్వారా కోరుకుని ఉంటారనే వ్యాఖ్యలు వినిపిస్తున్నాయి. అయితే ‘ఎన్కౌంటర్’ల విషయంలో ఐపీఎస్ సజ్జన్నార్ సార్ తుపాకీ గురి లక్ష్యం వేరనే సంగతిని సి. కళ్యాణ్ గుర్తెరిగినట్లు లేదనే అభిప్రాయాలు వ్యక్తమవుతున్నాయి. గత ఘటనలేవీ సి. కళ్యాణ్ కు తెలిసినట్లు లేదంటున్నారు. సజ్జన్నార్ 2008లో వరంగల్ ఎస్పీగా విధులు నిర్వహించిన సమయంలో జరిగిన ‘ఎన్కౌంటర్’ ఘటన ఈ సందర్భంగా ప్రస్తావనార్హం. ఓ కళాశాల విద్యార్థినిపై యాసిడ్ దాడికి పాల్పడిన ముగ్గురు యువకులు సజ్జన్నార్ వరంగల్ ఎస్పీగా ఉన్నపుడే ‘ఎన్కౌంటర్’కు గురయ్యారు.
ఇదీ చదవండి:
ఆ ఘటనానంతరం 2019లో హైదరాబాద్ నగరంలో జరిగిన ‘దిశ’ ఘటనలోనూ నిందితులు ‘ఎన్కౌంటర్’లో హతమయ్యారు. సజ్జన్నార్ సర్వీసులో ఇప్పటి వరకు చోటు చేసుకున్న పలు ‘ఎన్కౌంటర్’ ఘటనల్లో ఎక్కువగా బాధితులు మహిళలే కావడం గమనార్హం. ఈ నేపథ్యంలో సోషల్ మీడియాలోనే తాజాగా జరుగుతున్న చర్చ ఏమిటో తెలుసా..? సినీ ఇండస్ట్రీలో ‘కమిట్మెంట్లు’, ‘మీ టూ’ వంటి ఆరోపణలు ఇప్పుడు మళ్లీ తెరపైకి వస్తున్నాయి. ఎక్కడ మహిళలు అన్యాయానికి గురవుతారో, మరెక్కడ అత్యాచారాలకు, ‘హత్యా’చారాలకు ఆడపడుచులు బాధితులుగా మారుతారో.. అక్కడ మాత్రమే సజ్జన్నార్ వంటి ఐపీఎస్ అధికారుల తుపాకీ గురి ‘ఎన్కౌంటర్’ వైపు మళ్లుతుందనేందుకు అనేక ఉదాహరణలు ఉన్నాయి. ఔనూ.. టాలీవుడ్ లో ఇటువంటి ఆరోపణలు, విమర్శలేమీ లేవు కదా!
తాజా వినతి:
సజ్జన్నార్ వంటి పోలీసు అధికారుల వద్దకు వచ్చే కీలక వినతులూ ఈ సందర్భంగా గమనార్హం. తాజా ఘటనలో పలువురు మహిళా జర్నలిస్టులు హైదరాబాద్ సీపీ సజ్జన్నార్ ను కలిశారు. మహిళా జర్నలిస్టులకు ఎదురవుతున్న అసభ్యకర ట్రోలింగ్ దాడెల, బెదిరింపులు, ద్వేషపూరిత వ్యాఖ్యలు, ప్రచారాలపై ఫిర్యాదు అందింది. ఇటువంటి వేధింపులపై తమకు రక్షణ కల్పించాలని మహిళా జర్నలిస్టులు సీపీ సజ్జన్నార్ ను కోరారు.
