బొగ్గుల శ్రీనివాస్… రచయిత, యూ ట్యూబర్ గా తెగ పాపులారిటీ సంపాదించుకున్న వ్యక్తి. ఖమ్మం జిల్లా పాలేరు రిజర్వాయర్ లో శవమై తేలిన శ్రీనివాస్ మరణంపై భిన్న కథనాలు వెలువడ్డాయి. కానీ వాస్తవమేంటో పోలీసులు తేల్చేశారు. వదంతులకు తెర దించారు. ఇదే అంశంపై బొగ్గుల శ్రీనివాస్ మిత్రుడైన మహ్మద్ రఫీ ఆసక్తికర వార్తా కథనం రాశారు. బొగ్గుల శ్రీనివాస్ మృతి ఘటన అడ్డదారులు తొక్కేవారికి గుణపాఠమని చక్కగా నిర్వచించారు. మంచి చెబితే ఎవరూ వినరని, పెడచెవిన పెడితే అనుభవించ తప్పదనే సత్యాన్ని ఈ కథనం ద్వారా మహ్మద్ రఫీ స్పష్టీకరించారు. మొత్తంగా డబ్బు అవసరాలు మనిషిని మారుస్తాయని శ్రీనివాస్ మరణం మరోసారి రుజువు చేసింది. ఇక చదవండి..
మిత్రమా… ఇందుకే నేను స్పందించలేదు!
అన్నా ఘోరమే, అందరి గురించి రాస్తావు, మీ ఆంధ్ర రచయిత బొగ్గుల శ్రీనివాస్ చనిపోతే, చంపేస్తే ఒక్క ముక్క రాయలేదని ఒక యూనివర్సిటీ మిత్రుడు ఫోన్ చేశాడు. ‘ఇంకేంటి విషయాలు’ అని టాపిక్ కట్ చేశాను. ఇంకొందరు ఫోన్ చేసి ‘శ్రీనివాస్ హత్య వెనుక పవన్ కళ్యాణ్ చెయ్యి వుంది. దమ్ముంటే రాయండి’ అన్నారు. నవ్వి ఊరుకున్నాను! మొత్తానికి పోలీసులు త్వరగా తేల్చి పడేశారు.
బొగ్గుల శ్రీనివాస్ ఆంధ్రాకు చెందిన వారా? లేక తెలంగాణలో జీవిస్తున్న వారా? అనేది అసలు అనవసరమైన టాపిక్! అతను ఎక్కడివాడైనా ఒక్కటే! ఎవ్వరికి ఏదీ శాశ్వతం కాదు! అందరూ ఒక్కటే! తెలంగాణ అయితే ఏంటి? ఆంధ్రా అయితే ఏంటి? ఎందుకు ప్రతి విషయానికి ప్రాంతాలు ఎత్తి చూపిస్తారు?
అతను సరదా మనిషి! అందరినీ కలుపుకునిపోయే స్నేహశీలి! బతుకుతెరువు కోసం మిత్రుడి మాటలు నమ్మి అక్రమ సంపాదనకు అలవాటు పడి మోసపోయి, మిత్రుడి చేతిలో ‘చావు’ దెబ్బ తిని దారుణంగా కన్నుమూసిన మనిషి! అతడి జీవితం ఇలాంటి అక్రమ సంపాదనపరులకు ఒక గుణపాఠం!
పవన్ కళ్యాణ్ హఠావో.. అంటూ ఒకే ఒక్క పుస్తకం రాసి, పలుసార్లు పబ్లిష్ చేయించుకుని డబ్బులు సంపాదించుకున్నాడు! అతనికి అభ్యుదయ భావజాలం ఉండి కూడా, భాగ్యనగరంలో బతకాలంటే ప్రతి నెలా డబ్బు అవసరమే. యూనివర్సిటీలోనే పరిశోధకుడిగా చాలా ఏళ్ళు గడిపినా, మిత్రుడితో జీఎస్టీ అక్రమ వసూళ్లకు చేతులు కలిపి కోటి రూపాయల పెనాల్టీని ఎదుర్కొన్నాడు! ఆదాయపు పన్ను శాఖ నుంచి అనేక సార్లు నోటీసులు అందుకుని చివరకు బ్లాక్ లిస్ట్ లోకి చేరుకున్నాడు! ఇరువురి మధ్య రూ. 30 లక్షల వివాదం ప్రాణం పోగొట్టుకునేలా చేసింది!
తన గురించి ఒక పుస్తకం రాస్తే దానికి బెంబేలు పడిపోయి మనిషిని చంపేంత దుర్మార్గపు ఆలోచనలు పవన్ కళ్యాణ్ కు ఉంటాయా? శ్రీనివాస్ చనిపోయిన వార్త విన్న నిముషాల్లోనే సోషల్ మీడియాలో పవన్ కళ్యాణ్ దోషి అంటూ ఇష్టం వచ్చిన రాతలు రాసేశారు. యూ ట్యూబర్లు చెలరేగిపోయారు. నిజం నిలకడగా తెలుస్తుంది! అదే నిన్న తెలిసింది! పవన్ కళ్యాణ్ కు శ్రీనివాస్ హత్యకు ముడిపెట్టిన రాతగాళ్లు ఇప్పుడేం జవాబు చెబుతారు! జస్ట్ ఆస్కింగ్!
బొగ్గుల శ్రీనివాస్ నాకు సుపరిచితుడే! జోవియల్ గా ఉంటాడు! ఆ పుస్తకం వచ్చిన కొత్తలో మా ఆఫీస్ లో నన్ను కలసి ఒక కాపీ ఇచ్చి ‘కొంచెం రాయండన్నా’ అన్నాడు! రాద్దామని చదివాను కానీ, చదివాక రాయాలనిపించలేదు. అప్పుడప్పుడు ఫోన్ చేస్తూ వివిధ అంశాలపై చర్చిస్తూ ఈ జీఎస్టీ అక్రమ వ్యాపారం విషయం కూడా చెప్పాడు. తాను క్లీన్ చిట్ అని, తన మిత్రుడు చేస్తున్న మోసానికి తన లైసెన్స్ మాత్రమే ఇస్తున్నానని, లక్షల్లో ఆదాయం వస్తుందని చెప్పాడు!
ఇదీ చదవండి:
అప్పుడే చెప్పాను ఏదొక రోజు అడ్డంగా దొరికిపోతావని! చివరకు అందులో దొరికినా బయట పడగలిగాడు కానీ, మిత్రుడి లావాదేవీల్లో మోసపోవడమే కాకుండా ప్రాణం కోల్పోయాడు! అడ్డదారులు ఎప్పుడు ఇలాంటి ఫలితాలనే ఇస్తాయి. అతను పాలేరు రిజర్వాయర్ లో ప్రమాదంలో చనిపోయాడని మీడియాలో వార్త వచ్చినా నేను నమ్మలేదు. పవన్ కళ్యాణ్ హత్య చేశాడని సోషల్ మీడియా కూసినా నేను పట్టించుకోలేదు. మిత్రుడు శ్రీనివాస్ చనిపోయాడనే బాధ ఉంది! కానీ, ఏం చేయగలం? ఇంకొకరు ఇలాంటి దారి ఎన్నుకోవద్దని చెప్పడానికే ఈ నాలుగు మాటలు! శ్రీనివాస్ కు శ్రద్ధాంజలి.
✍️ డా. మహ్మద్ రఫీ
