(By తోట భావనారాయణ)
టీవీ చానల్స్ రేటింగ్స్ కోసం దిగజారతాయని, అడ్డమైన కంటెంట్ ప్రసారం చేస్తాయని చెప్పుకుంటూ ఉంటారు. ఇవి విమర్శలా, ఆరోపణలు మాత్రమేనా? ఇలాంటి ఛీత్కారాలు ఎంటర్టైన్మెంట్ ఛానల్స్ కి మాత్రమే కాదు, న్యూస్ చానల్స్ కీ తప్పడం లేదు. అశ్లీలత ఎక్కువైందని ఎంటర్టైన్మెంట్ చానల్స్ మీద, పర్సనల్ లైఫ్ లోకి తొంగిచూస్తున్నాయని న్యూస్ ఛానల్స్ మీద విమర్శలు కొత్త కాదు. ఇదంతా రేటింగ్స్ కోసమేనని ఎప్పటికప్పుడు జనం తిట్టి పోస్తూనే ఉన్నారు.
కానీ ఇంకో రకమైన కుంభకోణం గురించి చాలామందికి తెలియదు. అదేంటంటే రేటింగ్స్ కొనుక్కోవటం. ‘శతకోటి దరిద్రాలకు అనంతకోటి ఉపాయాలు’ అన్నట్టు .. ఇది చాలా కాలంగా, చాలా రూపాలలో జరుగుతున్న మోసమే. రేటింగ్స్ కోసం ఎంపిక చేసిన ఇళ్ళను గుర్తించి ఆ ఇళ్ళ యాజమానులను ఒప్పించి, ఆశ చూపించి వాళ్ళ చానల్ చూసేట్టు చేసుకోవటం ఒక పద్ధతి. కొంతకాలానికి అలాంటి గుట్టు రట్టయింది. అయినా, మరిన్ని అడ్డదారులు వెతుక్కున్న చానల్స్ ఉన్నాయి.
ఇలా ఇళ్ళ చుట్టూ తిరగటం ఎందుకని నేరుగా ఆ రేటింగ్ ఏజెన్సీ పెద్ద తలకాయనే పట్టుకోవాలనే ప్రయత్నం జరిగింది. ఒక పేరు మోసిన జాతీయ ఛానల్ దాదాపు నాలుగేళ్ళ కిందట అందులో విజయం సాధించింది. బ్రాడ్ కాస్ట్ ఆడియెన్స్ రీసెర్చ్ కౌన్సిల్ (బార్క్) సీఈవోను పట్టుకుంది. ఆయనకు రూ. 50.00 లక్షల లంచమిచ్చింది. ఆయన ఆ యాభై లక్షలతో భార్యకు నగలు కొన్నట్టు మహారాష్ట్ర పోలీసుల దర్యాప్తులో తేలింది. అలా దొరికిపోయి ఆయన జైలుకెళ్లాల్సి వచ్చింది. అయితే, ఆ ఛానల్.. కేంద్రంలో అధికార పార్టీకి అనుకూలమని, అప్పట్లో మహారాష్ట్ర ప్రభుత్వం కేంద్రానికి వ్యతిరేకమని, అందుకే పట్టుకున్నారని రకరకాల విశ్లేషణలు వచ్చాయి. ఏమైనా స్కామ్ నిజం.
ఇప్పుడు తాజాగా కేరళలో బైటపడ్డ మరో స్కామ్ టీవీ పరిశ్రమను ఉలిక్కి పడేట్టు చేసింది. బార్క్ లో పనిచేసే ప్రేమ్ నాథ్ అనే సీనియర్ ఉద్యోగి ఖాతాలోకి ఒక ఛానల్ నుంచి రూ. 100 కోట్లు బదిలీ అయ్యాయని తేలింది. కేరళ టెలివిజన్ ఫెడరేషన్ స్వయంగా ముఖ్యమంత్రి పినరయి విజయన్ కు ఫిర్యాదు చేయటంతో ఆయన స్వయంగా డీజీపీకి అప్పగించారు. ఆంధ్రప్రదేశ్ లోని పశ్చిమగోదావరి జిల్లాకు చెందిన రావాడ చంద్రశేఖర్ ఇప్పుడు కేరళ రాష్ట్ర డీజీపీ. స్ట్రిక్ట్ ఆఫీసర్ గా పేరున్న డీజీపీ ఈ కేసు దర్యాప్తు వేగవంతం చేశారు. మొత్తానికి రేటింగ్స్ చోరీకి పాల్పడిన ఛానల్ లావాదేవీలను క్షుణ్ణంగా పరిశీలించిన దర్యాప్తు అధికారులు విస్తుపోయే విషయాలు బయటపెట్టారు.
ఛానల్ యాజమాన్యం రూ. 100 కోట్లు ఆ బార్క్ ఉద్యోగి ఖాతాలోకి క్రిప్టో కరెన్సీ రూపంలో వెళ్ళినట్టు తేలింది. అతని నుంచి మరికొందరు ఉద్యోగుల ఖాతాల్లోకి వెళ్ళినట్టు కూడా తేల్చారు. ప్రతివారం ముందుగానే రేటింగ్స్ వివరాలు పంపిన వాట్సాప్ చాట్ సమాచారం, దాంతోబాటే అదనపు వివరాల మెసేజ్ లు కూడా దర్యాప్తు అధికారులు గుర్తించారు. అలా పంపిన సమాచారం, ఆ తరువాత వాస్తవంగా విడుదలైన రేటింగ్స్ తో సరిపోలటంతో ఈ స్కామ్ నిర్థారణ జరిగింది. మొత్తం 85 లక్షల కేబుల్ కనెక్షన్లు ఉన్న కేరళలో 20 వేల చందాదారులు 24 గంటలూ ఆ ఛానల్ చూసినట్టు లెక్కల్లో చూపడం ద్వారా కృత్రిమంగా రేటింగ్స్ పెంచినట్టు తేల్చారు.
ఆ ఛానల్ యజమాని మలేసియా, థాయ్ లాండ్ దేశాల్లో కృత్రిమంగా యూట్యూబ్ వ్యూయర్ షిప్ పెంచటానికి కూడా కోట్లు వెచ్చించినట్టు ప్రాథమిక దర్యాప్తులో వెల్లడైంది. పూర్తిస్థాయి సమాచారం అందిన తరువాత చర్యలుంటాయని డీజీపీ రావాడ చంద్రశేఖర్ చెబుతున్నారు. రూ. 50 వేల కోట్ల అడ్వర్టైజ్మెంట్ మార్కెట్ ను కుదిపేసిన ఈ కుంభకోణం మొత్తం రేటింగ్స్ వ్యవస్థ మీద నమ్మకాన్ని షేక్ చేసినట్టయింది. రేటింగ్స్ ను నమ్మి యాడ్స్ ఇచ్చే సంస్థలు ఇంతగా మోసపోయామా..? అని అవాక్కయ్యే పరిస్థితి ఏర్పడింది.
ఎంతోకాలంగా రేటింగ్స్ లెక్కింపు మీద అనుమానాలూ, ఆరోపణలూ ఉన్నా బార్క్ తప్ప మార్గం లేకపోవటంతో ఛానల్ యాజమాన్యాలు తమకు తాము సర్దిచెప్పుకుంటూ వచ్చాయి. ఛానల్ యాజమాన్యాల చందాలతో నడిచే బార్క్ లోనే ఇలాంటి మోసాలు జరగటం ఛానల్స్ ను దిగ్భ్రాంతికి గురి చేస్తోంది. నిజానికి రేటింగ్స్ వ్యవస్థను సమూలంగా ప్రక్షాళన చేయాలని భావిస్తున్న సమాచార, ప్రసారాల మంత్రిత్వశాఖ ఇప్పుడు ఆ పనిని మరింత వేగవంతం చేయాల్సి ఉంది. ఇప్పటికే పరిశ్రమలోని వివిధ వర్గాల అభిప్రాయాలు సేకరించిన మంత్రిత్వశాఖ త్వరలోనే సరికొత్త విధానం ప్రకటిస్తుందని టీవీ పరిశ్రమ ఎదురు చూస్తోంది.
