(‘సమీక్ష’ మార్క్ ప్రత్యేక కథనం)
ఎవరూ పెద్దగా గమనించినట్లు లేదుగానీ, మోస్ట్ వాంటెడ్ మావోయిస్ట్ లీడర్ హిడ్మా ‘ఎన్కౌంటర్’లో నిర్వహించిన ఆపరేషన్ కు ఏపీ పోలీసులు ప్రత్యేక పేరు పెట్టారు. దాని పేరే ఆపరేషన్ ‘సంభవ్’. అదేమిటీ ప్రస్తుతం నక్సల్స్ కోసం జరుగుతున్నది ఆపరేషన్ ‘కగార్’ కదా..? అనుకుంటున్నారా? ఛత్తీస్ గఢ్ అడవుల్లో జరుగుతున్న ఆపరేషన్ పేరు కగార్.. కానీ ఏపీ పోలీసులు ప్రత్యేకంగా ఎంచుకున్న ఆపరేషన్ పేరు ‘సంభవ్’.
ఈ ఆపరేషన్ ‘సంభవ్’ ద్వారా అల్లూరి సీతారామరాజు జిల్లా మారేడుమిల్లి మండలం కొండవాడ అడవుల్లో ఈనెల 18వ తేదీన జరిగిన ఎన్కౌంటర్ లో మావోయిస్ట్ పార్టీ కేంద్ర కమిటీ సభ్యుడు మడివి హిడ్మా దంపతులు సహా ఆరుగురు నక్సలైట్లు మృతి చెందిన సంగతి తెలిసిందే. ఈ ఘటన జరిగి 24 గంటలైనా గడవకముందే 19వ తేదీన మారేడుమిల్లి మండలంలోనే మరో ఎన్కౌంటర్ జరిగింది. జీ.ఎం. వలస గ్రామ సమీపంలో అడవుల్లో జరిగిన ఎన్కౌంటర్ లో మావోయిస్ట్ పార్టీ స్పెషల్ జోనల్ కమిటీ సభ్యుడు, ఏవోబీ ఇంఛార్జి మెట్టూరి జోగారావు అలియాస్ టెక్ శంకర్ సహా ఏడుగురు నక్సలైట్లు మరణించారు.
ఈ రెండు ఎన్కౌంటర్ ఘటనల్లో చనిపోయినవారి వివరాలను వెల్లడిస్తూ, ఆపరేషన్ ‘సంభవ్’ ద్వారా ఇద్దరు ముఖ్య నేతలు సహా మొత్తం 13 మంది మావోయిస్టులను మట్టుబెట్టినట్లు ఏపీ డీజీపీ హరీష్ కుమార్ గుప్తా నిన్న రంపచోడవరం పర్యటనటలో వెల్లడించారు. ఆపరేషన్ ‘సంభవ్’ కొనసాగుతుందని, మావోయిస్టు రహిత రాష్ట్రం లక్ష్యంగా అన్ని విభాగాలకు చెందిన పోలీసులు ఒకే గొడుగు కింద పనిచేస్తున్నట్లు ఆయన వెల్లడించారు. చత్తీస్ గఢ్ లో ఆపరేషన్ ‘కగార్’ జరుగుతుండగా, ఏపీ పోలీసులు ప్రకటించిన ఈ ఆపరేషన్ ‘సంభవ్’ అర్థమేంటి? అనేది చర్చనీయాంశంగా మారింది.
ఛత్తీస్ గఢ్, ఒడిషా, మహారాష్ట్ర, తెలంగాణా, ఝార్ఖండ్ తదితర రాష్ట్రాల్లోని మావోయిస్టులను నిర్మూలించే లక్ష్యంతో కేంద్ర ప్రభుత్వం ఆపరేషన్ ‘కగార్’ను అమలు చేస్తోంది. ముఖ్యంగా ఛత్తీస్ గఢ్ లోని దండకారణ్యంలో గల మావోయిస్టులను తుదముట్టించడం ద్వారా నక్సల్స్ రహిత దేశంగా ప్రకటించాలని కేంద్రం లక్ష్యంగా ఎంచుకుంది. వచ్చే మార్చి నెలాఖరునాటికి దేశంలో నక్సల్స్ ను లేకుండా చేస్తామని కేంద్ర హోం మంత్రి అమిత్ షా ఇప్పటికే పలుసార్లు ప్రకటించారు.
ప్రస్తుత ఆపరేషన్ ‘కగార్’కు ముందు ఆపరేషన్ ‘గ్రీన్ హంట్’ను కూడా భద్రతా బలగాలు నిర్వహించాయి. బీఎస్ఎఫ్, ఐటీబీపీ, సీఆర్పీఎఫ్, కోబ్రా, డీఆర్జీ వంటి భిన్న రకాల భద్రతా బలగాలు మావోయిస్టుల కోసం జల్లెడ పడుతున్నాయి. దండకారణ్యంలోని అడవుల్లో అడుగడుగునా బేస్ క్యాంపులు ఏర్పాటు చేసి నిర్వహిస్తున్న ఆపరేషన్ ‘కగార్’ ఫలితాలు తెలిసిందే. వందలకొద్దీ నక్సల్స్ మల్లోజుల వేణుగోపాల్, ఆశన్న వంటి అగ్రనేతలతో కలిసి లొంగుబాటలో పయనిస్తుండగా, నంబాల కేశవరావు, చలపతి, హిడ్మా, టెక్ శంకర్ వంటి కీలక నాయకులు, ఇతర కేడర్ నక్సల్స్ ఎన్కౌంటర్లలో ప్రాణాలు కోల్పోతున్నారు.
ఈ నేపథ్యంలోనే నక్సల్స్ ప్రభావం గల ఛత్తీస్ గఢ్, ఒడిషా, తెలంగాణా రాష్ట్రాల సరిహద్దులను కలిగిన ఏపీ ప్రభుత్వం ఆపరేషన్ ‘సంభవ్’ను ప్రారంభించడం గమనార్హం. ఫలితమే హిడ్మా, టెక్ శంకర్ సహా 13 మంది నక్సల్స్ ఎన్కౌంటర్ ఘటనలు. ఇంతకీ ఏమిటీ ఆపరేషన్ ‘సంభవ్’ అంటే..? నక్సల్స్ ఏరివేతకు బయలుదేరినపుడు స్పెషల్ పార్టీ పోలీసులు ప్రత్యేక పేర్లను పెడుతుంటాయి. అయితే సింగిల్ పార్టీ నిర్వహించే కూంబింగ్ ఆపరేషన్లకు ప్రత్యేకంగా ఇటువంటి పేర్లు ఉండవు. కనీసం మూడు టీంలు కలిసి ‘పిన్ పాయింట్’గా ఎంచుకునే లీడర్ ను మట్టుబెట్టే లక్ష్యం వైపు కూంబింగ్ నిర్వహించే సందర్భాల్లో మాత్రమే నక్సల్స్ ఏరివేత ఆపరేషన్లకు ప్రత్యేక పేర్లు పెడుతుంటాయి.
ముఖ్యంగా సందర్భాన్ని బట్టి ‘దసరా, విజయ్, థమ్స్ అప్’ వంటి పేర్లను కూడా స్పెషల్ పార్టీలు నిర్వహించే కూంబింగ్ ఆపరేషన్లకు పేర్లను నిర్ణయిస్తుంటారు. ఈ తరహాలోనే ఏపీ పోలీసులు హిడ్మా, టెక్ శంకర్ వంటి మోస్ట్ వాంటెడ్ నక్సల్ లీడర్స్ పిన్ పాయింట్ గా ఎంచుకున్న ఆపరేషన్ పేరు ‘సంభవ్’గా తెలుస్తోంది. ఏపీ ఇంటెలిజెన్స్ చీఫ్, అదనపు డీజీపీ మహేష్ చంద్ర లడ్హా హిడ్మా ఎన్కౌంటర్ వివరాల వెెల్లడి, విజయవాడ, ఏలూరు, కాకినాడ వంటి నగరాల్లో 50 మంది మావోయిస్టుల అరెస్ట్ సందర్భంగా ఓ కీలక అంశాన్ని ప్రకటించారు.
ఛత్తీస్ గఢ్ లో భద్రతా బలగాల నుంచి ఒత్తిడి తీవ్రతరం కావడంతో షెల్టర్ కోసం, లేదా ఏపీ అడవుల్లో తాత్కాలికంగా ఉంటూ తమ కార్యకలాపాలను కొనసాగించేందుకు మావోయిస్టులు ఆంధ్రప్రదేశ్ లోకి వచ్చారని మహేష్ చంద్ర లడ్హా చెప్పారు. నక్సల్స్ కదలికలపై గత కొన్ని నెలలుగా తాము నిఘా వేశామని, ప్రత్యేక ఇంటెలిజెన్స్ సమాచారం మేరకే తాము మావోయిస్టుల కోసం గాలింపు చర్యలు చేపట్టినట్లు పేర్కొన్నారు. అల్లూరి జిల్లాలోకి మావోలు అడుగిడుతున్నట్లు, ప్రవేశించినట్లు ఇంటెలిజెన్స్ అందించిన సమాచారంతోనే నిర్వహించిన ప్రత్యేక ఆపరేషన్ కు ‘సంభవ్’ అనే పేరు పెట్టినట్లు తెలుస్తోంది.
అసాధ్యాన్ని సుసాధ్యం చేయడమే అపరేషన్ ‘సంభవ్’గా అల్లూరి జిల్లా ఓఎస్డీ పంకజ్ కుమార్ మీనా స్పష్టం చేశారు. హిడ్మా దొరకడం అసాధ్యమని కొందరు మాట్లాడారని, హిడ్మాను అంతమొందించడం ద్వారా తాము సుసాధ్యం చేశామని, అపరేషన్ ‘సంభవ్’ అసలు అర్థం అదేనని ఆయన నిర్వచించారు. కాగా అత్యాధునిక 5G సాంకేతికత కూడా ‘సంభవ్’ నామధేయపు భావనలో ఇమిడి ఉంది. అధునాతన సాంకేతికత తోడుగా అటు ఛత్తీస్ గఢ్ లోనే కాదు, ఇటు ఏపీ వ్యాప్తంగానూ కగార్, సంభవ్ ఆపరేషన్లు కొనసాగుతున్నాయి. ఇదీ నక్సల్స్ కోనం పోలీసులు నిర్వహించే ఆపరేషన్ల పేర్ల వెనుక అసలు కథ.
