సుక్మా: ఛత్తీస్ గఢ్ లోని సుక్మా జిల్లాలో మావోయిస్ట్ పార్టీ నక్సలైట్లకు, భద్రతా బలగాలకు మధ్య ఆదివారం జరిగిన ఎన్కౌంటర్ ఘటనలో ముగ్గురు నక్సల్స్ మృతి చెందారు. చింతగుఫా పోలీస్ స్టేషన్ పరిధిలోని బెజ్జి అటవీ ప్రాంతంలోని గుట్టల్లో ఈ ఉదయం ఎదురుకాల్పుల ఘటన చోటు చేసుకుంది.
బెజ్జి అటవీ ప్రాంతంలో మావోయిస్ట్ పార్టీ కేడర్ ఉందనే సమాచారం ఆధారంతో డిస్ట్రిక్ట్ రిజర్వ్ గార్డ్ (డీఆర్జీ) బలగాలు నక్సల్స్ గాలింపు చర్యలు చేపట్టాయని, ఈ సందర్భంగా ఎదురుపడిన నక్సల్స్ తో కాల్పులు జరిగాయని బస్తర్ రేంజ్ ఐజీ సుందర్ రాజ్ తెలిపారు. ఇప్పటి వరకు జరిగిన కాల్పుల్లో ముగ్గురు మావోయిస్టులు చనిపోయారని, ఇంకా గాలింపు చర్యలు కొనసాగుతున్నాయని ఆయన చెప్పారు.
ఎన్కౌంటర్ లో చనిపోయిన ముగ్గురు నక్సలైట్లను జన్ మిలీషియా కమాండర్ మద్వి దేవా, స్నిపర్ స్పెషలిస్ట్, ఏరియా కమిటీ సభ్యుడు, కల్చరల్ అండ్ కమ్యునికేషన్స్ (సీఎన్ఎమ్) కమాండర్ పొడియం గంగి, ఏరియా కమిటీ సభ్యుడు, కిష్టారం ప్రాంతపు ఇంఛార్జి కార్యదర్శి సోడి గంగిగా గుర్తించారు.
తాజా ఘటనతో ఈ ఏడాది ఛత్తీస్ గఢ్ రాష్ట్రంలో జరిగిన ఎన్కౌంటర్లలో మరణించిన మావోయిస్టుల సంఖ్య 262 మందికి చేరుకుంది. వీరిలో 233 మంది సుక్మా సహా ఏడు జిల్లాలతో కలిగిన బస్తర్ డివిజన్ లోనే మృతి చెందారు. మిగతా వారిలో 27 మంది గరియాబంద్ జిల్లాలో, ఇద్దరు దుర్గ్ డివిజన్ లో మృతి చెందారు.
