ఖమ్మం నగరంలో సోమవారం నిర్వహించిన తిరంగా ర్యాలీ సందర్భంగా ఉద్రిక్త ఘటన జరిగినట్లు వ్యాప్తి చెందిన ప్రచారంపై పోలీస్ కమిషనర్ సునీల్ దత్ గత రాత్రి పొద్దుపోయాక ఓ కీలక ప్రకటన విడుదల చేశారు. ఖమ్మం నగరంలో ఎటువంటి అవాంఛనీయ ఘటనలు జరగపోయినా కొంతమంది ఉద్ధేశ పూర్వకంగా సామజిక మాధ్యమాల్లో పుకార్లు, వదంతులు ప్రచారం చేస్తున్నారని ఆయన అన్నారు. ఇటువంటి అసత్య ప్రచారాన్ని, ఆరోపణలను ప్రజలెవరూ నమ్మవద్దని పోలీస్ కమిషనర్ కోరారు. అసత్య ప్రచారానికి పాల్పడుతున్నవారిపై చట్టపరంగా కఠిన చర్యలు తీసుకుంటామని హెచ్చరించారు.
ఇదే సందర్భంగా ఘటన పూర్వాపరాలను ఆయన వెల్లడించారు. సోమవారం ఖమ్మంలో బీజేపీ పార్టీ వారు నిర్వహించిన తిరంగా ర్యాలీ సందర్భంగా, ఇతర సామాజిక వర్గానికి చెందిన ఇద్దరు యువకులు జడ్పీ సెంటర్ నుండి ఖానాపురం హవేలీ వైపు మోటార్ సైకిల్ పై ప్రయాణిస్తున్నారని, ఈ సమయంలో ఇల్లందు క్రాస్ రోడ్ వద్ద ట్రాఫిక్ కానిస్టేబుల్ ర్యాలీ జరుగుతున్నందున కాసేపు ఆగాలని వారికి విజ్ఞప్తి చేశారని సీపీ చెప్పారు. అయితే తాము అత్యవసరమైన పనితో వెళ్తున్నామని యువకులు చెప్పి ట్రాఫిక్ కానిస్టేబుల్ తో వాగ్వాదానికి దిగారని, ఈ సందర్భంగా ర్యాలీలో పాల్గొన్న కొంతమంది వ్యక్తులు ట్రాఫిక్ కానిస్టేబుల్ కు మద్దతుగా యువకులతో వాదనకు దిగగా, అది తోపులాటకు దారి తీసిందని సీపీ పేర్కొన్నారు.
సంఘటన జరిగిన వెంటనే ర్యాలీలో బందోబస్తులో ఉన్న పోలీసులు అక్కడికి చేరుకుని ఇద్దరు యువకులను, ఈ సంఘటనలో పాల్గొన్న బీజేపీ సభ్యులను ఖమ్మం 2-టౌన్ పోలీస్ స్టేషన్ కు తీసుకెళ్లారన్నారు. దీనికి సంబంధించి రెండు గ్రూపులపై ఖమ్మం 2-టౌన్ పోలీస్ స్టేషన్ లో రెండు వేర్వేరు కేసులు నమోదు చేశారని చెప్పారు. ప్రస్తుతం పోలీసులు ఈ ఘటనపై దర్యాప్తు చేపట్టారని, రెండు గ్రూపులకూ కూడా శాంతి భద్రతల అంశంలో సమన్వయం పాటించాలని పోలీస్ కమిషనర్ సునీల్ దత్ కోరారు.
కాగా మంగళవారం ఖమ్మం బంద్ కు పిలుపునిచ్చిన బీజేపీ జిల్లా నాయకత్వం రాష్ట్ర నాయకుల సూచనతో కార్యక్రమాన్ని విరమించుకున్నట్లు తెలిసింది. అదేవిధంగా కేంద్ర హోం శాఖ సహాయ మంత్రి బండి సంజయ్ ఖమ్మం పర్యటన కూడా రద్దయినట్లు బీజేపీ వర్గాలు తెలిపాయి.
