గ్రామ పరిపాలన అధికారుల (జీపీవో) అంశంపై తెలంగాణా రెవెన్యూ మంత్రి పొంగులేటి శ్రీనివాసరెడ్డి కీలక ప్రకటన చేశారు. వచ్చే నెల 1వ తేేేేదీ నుంచి గ్రామ ప‌రిపాల‌నాధికారుల నియామ‌క చ‌ర్య‌లు ప్రారంభ‌మ‌వుతాయ‌ని అన్నారు. ప్రతి గ్రామానికి ఒక గ్రామ పరిపాలన అధికారి చొప్పున మొత్తం 10,695 మంది జీపీవోలను వచ్చే నెల మొదటివారం నుండి పంపించనున్నట్లు మంత్రి వెల్లడించారు. అదేవిధంగా రైతుల భూముల సర్వే కోసం 6,000 మంది లైసెన్సుడ్ సర్వేయర్లను నియమించనున్నట్లు ప్రకటించారు. భూ భారతి-2025 చట్టంపై నిర్వహిస్తున్న అవగాహన సదస్సుల్లో భాగంగా సోమవారం నల్గొండ జిల్లా చందంపేట, రంగారెడ్డి జిల్లా ఇబ్ర‌హీం ప‌ట్నం మండ‌ల కేంద్రాల్లో నిర్వహించిన రెవెన్యూ సదస్సుల‌కు మంత్రి ముఖ్యఅతిథిగా హాజరయ్యారు.
ఈ సందర్భంగా మంత్రి మాట్లాడుతూ, భూభార‌తి చ‌ట్టం ద్వారా రాష్ట్రంలోని భూ స‌మ‌స్య‌లన్నింటినీ ప‌రిష్క‌రిస్తామ‌న్నారు. భూభారతిని పేదలు, బడుగు, బలహీన వర్గాలు, రైతులకు, భూములున్న ఆసాముల కోసం తీసుకొచ్చిన చట్టంగా చెప్పారు. భూ సమస్యల పరిష్కారానికి రాష్ట్రంలోని 4 మండలాలను పైలెట్ ప్రాజెక్టు కింద తీసుకోవడం జరిగిందని, ఈ నెలాఖరునాటికి ఈ పైలెట్ ప్రాజెక్టు పూర్తవుతుందన్నారు. జూన్ 2వ తేదీ నుండి ఈ పైలెట్ మండలాలలో వ్యవసాయ భూముల సమస్యలను శాశ్వతంగా పరిష్కరించనున్నట్లు తెలిపారు.
అదేవిధంగా మే 1వ తేదీ నుండి అన్ని జిల్లాలలో ఒక మండలాన్ని పైలెట్ ప్రాజెక్టు కింద తీసుకోనున్నట్లు చెప్పారు. జూన్ 2వ తేదీ నుండి ప్రతి గ్రామానికి తహసీల్దార్ స్థాయి అధికారులు గ్రామానికి వచ్చి భూ సమస్యల పై దరఖాస్తులు తీసుకుంటారని, రైతులు ఒక రూపాయి కూడా చెల్లించకుండా రెవెన్యూ సమస్యలను పరిష్కరించుకోవచ్చని తెలిపారు. ప్రతి మనిషికి ఆధార్ లాగే భూదార్ కార్డు ను ఇచ్చి ఖాతా నెంబర్ ను ఇవ్వనున్నమన్నారు. గతంలో భూములు అమ్మినా, కొన్నా మ్యాపింగ్ లేదని, ఇకపై రాష్ట్రవ్యాప్తంగా భూమి రిజిస్ట్రేషన్ సమయంలోనే సర్వే మ్యాప్ ను తప్పనిసరిగా ఏర్పాటు చేసేలా చట్టంలో తీసుకొచ్చినట్లు వెల్లడించారు.
సాదా బైనామాలకు ధరణిలో ఎలాంటి అవకాశం లేదని, భూ భారతిలో దీనిని పరిష్కరించనున్నామని, తొమ్మిది లక్షల 26 వేల సాదా బైనామా దరఖాస్తులున్నాయని, వాటిలో న్యాయమైన వాటిని పరిష్కరిస్తామని తెలిపారు. గతంలో పట్టాలిచ్చిన డి-లిమిటేషన్ ఫారెస్ట్ భూములను పరిశీలించి, ఎవరికి ఎంత భూమి ఉందో నిజంగా సాగులో ఉన్న రైతులకు పట్టాలు ఇస్తామని తెలిపారు. పునరావాసకాలనీల ఏర్పాటు సందర్భంగా, ఒక చోట నుండి మరో చోటికి రైతులు వెళ్లిన సందర్భంలో రైతులకు ఇచ్చిన భూముల డీ లిమిటేషన్ విషయంలో ఇప్పటివరకు ఇబ్బందులు పడ్డారన్నారు. అలాగే డీ నోటిఫికేషన్ భూముల విషయంలో కూడా ఇబ్బందులు ఎదుర్కొన్నారని, ధరణి సమయంలో ప్రభుత్వం వద్దకు ప్రజలు వెళ్లాల్సి వచ్చేదని, వీటన్నిటికీ పూర్తిగా న్యాయం జరిగేలా భూ భారతి లో ప్రణాళికలు రూపొందించినట్లు మంత్రి పొంగులేటి పేర్కొన్నారు.
