ఇల్లెందు: మరో మూడు రోజుల్లో సర్పంచ్ పదవికి నామినేషన్ దాఖలు చేయాల్సిన మహిళా మాజీ సర్పంచ్ ఒకరి ఆకస్మిక అదృశ్యపు ఘటన ఉమ్మడి ఖమ్మం జిల్లా రాజకీయాల్లో తీవ్ర చర్చనీయాంశంగా మారింది. ఉన్నట్టుండి ఆ మాజీ సర్పంచ్ ఎక్కడికి వెళ్లారనేది అంతుబట్టని ఘటనగా వార్తల్లోకి వచ్చింది. తన భార్య కనిపించడం లేదంటూ ఆ మాజీ సర్పంచ్ భర్త పోలీసులకు ఫిర్యాదు కూడా చేశారు. దీంతో కనిపించకుండాపోయిన ఆ మాజీ మహిళా సర్పంచ్ కోసం పోలీసులు దర్యాప్తు ప్రారంభించారు. ఇంతకీ ఎవరీ మాజీ సర్పంచ్? ఏమా మిస్సింగ్ స్టోరీ..? అనే వివరాల్లోకి వెడితే..
ఆమె పేరు వల్లాల మంగమ్మ.. భద్రాద్రి కొత్తగూడెం జిల్లా ఇల్లెందు పట్టణాన్ని అనుకుని, దాదాపు కలిసి ఉన్నట్లు కనిపించే సుభాష్ నగర్ గ్రామ సర్పంచ్ గా ఇటీవలి కాలం వరకు పదవీ బాధ్యతలు నిర్వహించారు. గత పంచాయతీ ఎన్నికల్లో మంగమ్మ బీఆర్ఎస్ పార్టీకి చెందిన సర్పంచ్ గా గెలుపొందారు. ఆమె భర్త నర్సయ్య వంట మాస్టారుగా పనిచేస్తాడట. దీంతో గ్రామంలోనేగాక ఇల్లెందు పట్టణంతోపాటు పరిసర గ్రామాల్లోనూ మంచి పేరు ఉందట. అంతేగాక గడచిన పదవీ కాలంలో సర్పంచ్ గా మంగమ్మ సేవలను గ్రామ ప్రజలు కొనియాడేవిధంగా ఉన్నాయట.
ఈ నేపథ్యంలోనే మంగమ్మ ఆకస్మికంగా కనిపించకుండాపోవడం గమనార్హం. మొన్న శుక్రవారం రాత్రి తన ఇంటి నుంచి బయటకు వెళ్లిందని, నిన్న సాయంత్రం వరకు కూడా ఆమె ఆచూకీ లభించలేదని మంగమ్మ భర్త నర్సయ్య పోలీసులకు ఫిర్యాదు చేశారు. మంగమ్మ అదృశ్యంలో తనకు ఎవరిపైనా అనుమానం లేదని, ఇందుకు రాజకీయ కారణాలు ఉన్నట్లు కూడా భావించడం లేదని నర్సయ్య పోలీసులకు ఇచ్చిన ఫిర్యాదులో స్పష్టం చేశారు.
అయితే ఇంతకీ మంగమ్మ ఎక్కడికి వెళ్లిందనే అంశంపై బీఆర్ఎస్ వర్గాలు హైరానా పడుతున్నాయి. డిసెంబర్ 3వ తేదీన సర్పంచ్ పదవికి నామినేషన్ దాఖలు చేయాల్సిన పరిస్థితుల్లో మంగమ్మ కనిపించకుండాపోవడం ఆ పార్టీ వర్గీయులను కలవరపరుస్తోందట. అయితే జనంలో గల ఓ ప్రచారపు కథనం ప్రకారం.. మంగమ్మను తమ పార్టీ తరపున సర్పంచ్ గా బరిలోకి దింపేందుకు కాంగ్రెస్ పార్టీ నాయకులు పథకరచన చేస్తున్నారట. కానీ తన భార్య బీఆర్ఎస్ పార్టీకి చెందిన నాయకురాలిగానే సర్పంచ్ పదవికి మరోసారి పోటీ చేయాలని మంగమ్మ భర్త నర్సయ్య భావిస్తున్నారట. ఈ అంశంలోనే ఇద్దరి మధ్య భిన్నాభిప్రాయాలు ఏర్పడ్డాయనే ప్రచారం జరుగుతోంది.
ఈ పరిస్థితుల్లో.. ఇంతకీ మంగమ్మ ఎక్కడ ఉన్నారు? ఆమె అదృశ్యం వెనుక రాజకీయ కారణాలు ఉన్నాయా? లేక మరేవైనా ఇతర కారణాలు ఉన్నాయా? అనే అంశంపై భిన్నాభిప్రాయాలు వ్యక్తమవుతున్నాయి. ప్రస్తుతానికైతే మంగమ్మ మోబైల్ ఫోన్ స్విచ్చాఫ్ లో ఉందట. ఆమె వాడే సెల్ ఫోన్ సిగ్నల్స్ ఆధారంగా మంగమ్మ ఆచూకీ కోసం పోలీసులు ప్రయత్నిస్తున్నారట. చూడాలి మాజీ సర్పంచ్ మంగమ్మ మిస్సింగ్ ఘటనలో పోలీసులు ఏం తేలుస్తారో..!
