హైదరాబాద్: ప్రముఖ కవి అందెశ్రీ అంత్యక్రియలు మంగళవారం ముగిశాయి. ఘట్ కేసర్ లో అధికార లాంఛనాలతో నిర్వహించిన అంత్యక్రియల్లో పాల్గొన్న తెలంగాణా సీఎం రేవంత్ రెడ్డి అందెశ్రీ పార్దీవ దేహానికి నివాళులు అర్పించారు. ఈ సందర్భంగా అందెశ్రీ పాడెను సీఎం రేవంత్ రెడ్డి మోశారు.
అందెశ్రీ అంతిమ సంస్కారాల్లో పాల్గొన్న సందర్భంగా సీఎం రేవంత్ మీడియాతో మాట్లాడుతూ, పశువుల కాపరిగా, తాపీ మేస్త్రిగా, తెలంగాణ ఉద్యమకారుడిగా రాష్ట్ర సాధనలో గొప్ప పాత్ర పోషించిన వ్యక్తిగా అందెశ్రీని కొనియాడారు. అందెశ్రీని కోల్పోవడం తెలంగాణ సమాజంతో పాటు వ్యక్తిగతంగా తనకు తీరని లోటుగా చెప్పారు. పీసీసీ అధ్యక్షుడిగా ఉన్నప్పుడు అందెశ్రీని కలిసి తెలంగాణ ప్రజల సమస్యల పరిష్కారానికి మీ పాత్ర ఉండాలని కోరాననని తెలిపారు. గద్దర్ అన్నతో పాటు అందెశ్రీ గారు కూడా ప్రజల్లో స్పూర్తి నింపారని చెప్పారు.
అందుకే అందెశ్రీ రాసిన “జయ జయహే తెలంగాణ” గీతాన్ని పాఠ్యాంశంగా చేర్చేందుకు మంత్రివర్గంలో నిర్ణయం తీసుకుంటామని చెప్పారు. ఆయన పేరుతో ఒక స్మృతి వనాన్ని ఏర్పాటు చేస్తామన్నారు. అందెశ్రీ కుటుంబంలో ఒకరికి ప్రభుత్వ ఉద్యోగం కల్పించేందుకు ప్రభుత్వం నిర్ణయం తీసుకుంటుందన్నారు. ఆయన పాటల సంకలనం “నిప్పుల వాగు” ఒక భగవద్గీతగా, బైబిల్ గా, ఖురాన్ గా తెలంగాణ సమస్యలపై పోరాడేవారికి గైడ్ గా ఉపయోగపడుతుందన్నారు. అందుకే 20 వేల పుస్తకాలను ముద్రించి తెలంగాణలోని ప్రతీ లైబ్రరీలో “నిప్పుల వాగు”ను అందుబాటులో ఉంచుతామని సీఎం చెప్పారు.
అందెశ్రీకి పద్మశ్రీ ఇవ్వాలని గత ఏడాది కేంద్రానికి లేఖ రాశామని, ఈ సంవత్సరం కూడా కేంద్రానికి మళ్లీ లేఖ రాస్తామన్నారు. అందెశ్రీకి పద్మశ్రీ గౌరవం దక్కేలా కేంద్రమంత్రులు బండి సంజయ్, కిషన్ రెడ్డి సహకరించాలని, రాష్ట్ర, కేంద్ర ప్రభుత్వాలుగా అందెశ్రీని పద్మశ్రీతో గౌరవించుకునేందుకు కృషి చేద్దామని సీఎం రేవంత్ అన్నారు. అందెశ్రీ అంత్యక్రియల్లో మంత్రులు పొంగులేటి శ్రీనివాసరెడ్డి, శ్రీధర్ బాబు, జూపల్లి కృష్ణారావు, అడ్లూరి లక్ష్మణ్ కుామర్, పీసీసీ చీఫ్ మహేష్ కుమార్, వి. హనుమంతరావు తదితరులు కూడా పాల్గొన్నారు.
