బీజాపూర్: ఛత్తీస్ గఢ్ అడవుల్లో మంగళవారం మరో భారీ ఎన్కౌంటర్ ఘటన చోటు చేసుకుంది. బీజాపూర్ జిల్లా ఇంద్రావతి నేషనల్ పార్క్ అడవుల్లో మావోయిస్ట్ పార్టీ నక్సలైట్లకు, భద్రతా బలగాలకు మధ్య భీకర పోరు జరుగుతున్నట్లు వార్తలు అందుతున్నాయి. ఉదయం నుంచీ జరుగుతున్న కాల్పుల ఘటనలో మావోయిస్ట్ పార్టీకి చెందిన పలువురు అగ్రనేతలు మరణించినట్లు ప్రచారం జరుగుతోంది. మోదక్ పాల్ పోలీస్ స్టేషన్ పరిధిలోని ఇంద్రావతి నేషనల్ పార్క్ ఎన్కౌంటర్ లో ఇప్పటి వరకు కనీసం ఆరుగురు నక్సల్స్ ప్రాణాలు కోల్పోయినట్లు సమాచారం. ఇంద్రావతి నేషనల్ పార్కు అడవుల్లోని కందుల్నూర్ కు పడమర దిక్కున ఆరు కిలోమీటర్ల దూరంలో ఈ భారీ ఎన్కౌంటర్ జరిగినట్లు తెలుస్తోంది.
మావోయిస్ట్ పార్టీ అగ్రనేతల కదలికలపై ఇంటెలిజెన్స్ వర్గాల నుంచి అందిన సమాచారం ఆధారంగా భద్రతా బలగాలు గాలింపు చర్యలు చేపట్టినట్లు ఛత్తీస్ గఢ్ పోలీసు వర్గాలను ఉటంకిస్తూ జాతీయ మీడియా వర్గాలు నివేదిస్తున్నాయి. ఈ సందర్భంగా తారసపడిన మావోయిస్టులతో భీకరపోరు సాగుతున్నట్లు ఆ వర్గాలు పేర్కొన్నాయి. ఎన్కౌంటర్ ఘటనా స్థలం నుంచి మావోయిస్టు నక్సలైట్ల మృతదేహాలను భద్రతా దళాలు స్వాధీనం చేసుకున్నాయి. మృతి చెందిన నక్సలైట్లను గుర్తించే పనిలో ఉన్నట్లు ఛత్తీస్ గఢ్ అధికార వర్గాలు తెలిపాయి. అయితే మావోయిస్ట్ పార్టీకి చెందిన ముఖ్య నేతలు కొందరు ఈ ఘటనలో మరణించారనే వార్తలు ధ్రువపడాల్సి ఉంది.
