- సుప్రీంకోర్టు ఆదేశాలతో వేలం వేసిన 7 ఆస్తుల రిజిస్ట్రేషన్ పూర్తి..
- బాధితులకు డబ్బు తిరిగి చెల్లించే ప్రక్రియకు సన్నాహాలు
హైదరాబాద్: హీరా గ్రూప్ మనీలాండరింగ్ కేసులో ఎన్‌ఫోర్స్‌మెంట్ డైరెక్టరేట్ (ఈడీ) కీలక చర్యలు చేపట్టింది. సుప్రీంకోర్టు ఆదేశాల మేరకు వేలం వేసిన రూ. 15.03 కోట్ల విలువైన ఏడు ఆస్తుల రిజిస్ట్రేషన్ ప్రక్రియను అధికారులు పూర్తి చేశారు. ఈ నెల 6న అత్యధిక బిడ్లు దాఖలు చేసిన వారికి ఈ ఆస్తులను విక్రయించిన ఈడీ అధికారులు తాజాగా రిజిస్ట్రేషన్ ప్రక్రియను కూడా ముగించడం విశేషం.
విక్రయించిన ఆస్తుల్లో హైదరాబాద్‌లోని షేక్‌పేట ప్రాంతం హెచ్‌ఎస్‌ రాయల్‌లో ఉన్న ఆరు ఫ్లాట్లు, బంజారాహిల్స్ ఎమ్మెల్యే కాలనీలోని ఒక ఇల్లు ఉన్నాయి. వేలం ద్వారా వచ్చిన మొత్తాన్ని సీరియస్ ఫ్రాడ్ ఇన్వెస్టిగేషన్ ఆఫీస్ (ఎస్‌ఎఫ్‌ఐఓ)కు బదిలీ చేయనున్నట్లు ఈడీ వెల్లడించింది. సుప్రీంకోర్టు ఆదేశాలకు అనుగుణంగా బాధితులకు డబ్బు తిరిగి చెల్లించే ప్రక్రియను చేపట్టనున్నారు.
రూ. 5,978 కోట్లకు పైగా పెట్టుబడుల సేకరణ
హీరా గ్రూప్ సంస్థల అధినేత్రి నౌహీరా షేక్‌పై ఈడీ మనీలాండరింగ్ కేసు నమోదు చేసి దర్యాప్తు చేపట్టింది. అధిక రాబడులు ఇస్తామంటూ ప్రజల నుంచి రూ. 5,978 కోట్లకు పైగా పెట్టుబడులు సేకరించినట్లు దర్యాప్తులో వెల్లడైనట్లు అధికారులు పేర్కొన్నారు. ఏడాదికి 36 శాతానికి పైగా రాబడులు చెల్లిస్తామని పెట్టుబడిదారులకు హామీ ఇచ్చినట్లు ఆరోపణలు ఉన్నాయి.
అయితే, సేకరించిన పెట్టుబడులకు సంబంధించి అసలు మొత్తంతో పాటు వాగ్దానం చేసిన రాబడులను చెల్లించడంలో హీరా గ్రూప్ విఫలమైనట్లు దర్యాప్తులో గుర్తించారు. ఈ నేపథ్యంలో కేసులో ఇప్పటివరకు రూ.428.83 కోట్ల విలువైన ఆస్తులను ఈడీ అటాచ్ చేసింది.
గురుగ్రామ్‌లో నౌహీరా షేక్ అరెస్టు
ఈ కేసులో బెయిల్ రద్దు కావడంతో నౌహీరా షేక్‌ను గురుగ్రామ్‌లో ఈడీ అధికారులు అరెస్టు చేశారు. ప్రస్తుతం ఆమె న్యాయస్థానం ఆదేశాల మేరకు రిమాండ్‌లో ఉంది.
మిగిలిన ఆస్తుల విక్రయాలపైనా దృష్టి
వేలం ద్వారా వచ్చిన మొత్తాన్ని సంబంధిత ప్రక్రియ ప్రకారం ఎస్‌ఎఫ్‌ఐఓకు బదిలీ చేసి, సుప్రీంకోర్టు ఆదేశాల మేరకు బాధితులకు నిధులు తిరిగి చెల్లించే చర్యలను ముందుకు తీసుకెళ్లేందుకు ఈడీ సిద్ధమవుతోంది. మరోవైపు, కేసులో ఇప్పటికే అటాచ్ చేసిన మిగిలిన ఆస్తులను కూడా విక్రయించే అంశంపై అధికారులు దృష్టి సారించారు. హీరా గ్రూప్ కేసులో దర్యాప్తు కొనసాగుతున్నట్లు ఈడీ వెల్లడించింది.
