హైదరాబాద్: తిరుమల తిరుపతి దేవస్థానం (టీటీడీ) లడ్డూ కల్తీ నెయ్యి కేసులో ఎన్‌ఫోర్స్‌మెంట్ డైరెక్టరేట్ (ఈడీ) కీలక చర్యలు చేపట్టింది. కేసు దర్యాప్తులో భాగంగా భోలే బాబా, శ్రీ వైష్ణవి, సుకృతి ఫుడ్స్ ప్రైవేట్ లిమిటెడ్ సంస్థలకు చెందిన రూ.129.85 కోట్ల విలువైన ఆస్తులను అటాచ్ చేసింది. ఆయా సంస్థల ప్రమోటర్లు విపిన్ జైన్, కైలాష్ చంద్ర మంగ్లా, వారి కుటుంబ సభ్యులకు చెందిన స్థిర, చరాస్తులను కూడా పీఎంఎల్ఏ చట్టం కింద జప్తు చేసినట్లు వెల్లడించింది.
రూ.234.5 కోట్ల కల్తీ నెయ్యి సరఫరా
తిరుమల తిరుపతి దేవస్థానానికి (టీటీడీ) ఏకంగా రూ. 234.5 కోట్ల విలువైన కల్తీ నెయ్యిని సరఫరా చేసినట్లు దర్యాప్తులో గుర్తించినట్లు ఈడీ పేర్కొంది. భోలే బాబా, శ్రీ వైష్ణవి, సుకృతి ఫుడ్స్ సంస్థలు ఈ వ్యవహారంలో కీలకంగా ఉన్నట్లు దర్యాప్తు సంస్థ అనుమానిస్తోంది. ఈ కేసుకు సంబంధించి ఇప్పటికే ప్రధాన నిందితులుగా పేర్కొన్న విపిన్ జైన్, కైలాష్ చంద్ మంగ్లాలను ఈడీ అరెస్ట్ చేసింది.
పామాయిల్‌తో నెయ్యి తయారీ.. రసాయనాల వినియోగం
దర్యాప్తులో భాగంగా కల్తీ నెయ్యి తయారీ విధానానికి సంబంధించిన కీలక విషయాలను అధికారులు గుర్తించినట్లు సమాచారం. పామాయిల్, పామోలిన్ నూనెలకు మోనోగ్లిజరైడ్స్, ఎసిటిక్ యాసిడ్, లాక్టిక్ యాసిడ్ వంటి రసాయనాలను కలిపి నెయ్యి రూపంలో తయారు చేసినట్లు ఈడీ ఆరోపిస్తోంది. అనంతరం ఈ ఉత్పత్తులను అసలైన నెయ్యిగా చూపిస్తూ టీటీడీకి సరఫరా చేసినట్లు దర్యాప్తులో వెల్లడైనట్లు పేర్కొంది.
బోగస్ కొనుగోళ్లు.. నకిలీ బిల్లులతో లావాదేవీలు
ఈ వ్యవహారంలో అక్రమ లావాదేవీలను దాచిపెట్టేందుకు నిందితులు బోగస్ కొనుగోళ్లు, నకిలీ బిల్లులను సృష్టించినట్లు ఈడీ గుర్తించినట్లు సమాచారం. హవాలా మార్గాల ద్వారా భారీ మొత్తంలో నగదును బదిలీ చేసినట్లు దర్యాప్తు సంస్థ ఆరోపిస్తోంది. ఈ లావాదేవీల వెనుక ఉన్న ఆర్థిక నెట్‌వర్క్, అక్రమంగా సమకూర్చుకున్న ఆస్తుల వివరాలపై అధికారులు దర్యాప్తు కొనసాగిస్తున్నారు.
ఇప్పటివరకు రూ.132.55 కోట్ల ఆస్తులు అటాచ్
తాజాగా రూ.129.85 కోట్ల ఆస్తులను అటాచ్ చేయడంతో ఈ కేసులో ఇప్పటివరకు జప్తు చేసిన ఆస్తుల మొత్తం విలువ రూ.132.55 కోట్లకు చేరినట్లు ఈడీ వెల్లడించింది. నెయ్యి సరఫరా వ్యవహారంలో జరిగిన అక్రమాలు, ఆర్థిక లావాదేవీలు, సంబంధిత వ్యక్తులు, సంస్థల పాత్రపై దర్యాప్తు కొనసాగుతోంది. ఈ కేసులో మరిన్ని వివరాలు వెలుగులోకి వచ్చే అవకాశం ఉంది.
