విజయవాడ: ఆంధప్రదేశ్ రాష్ట్రం ఉలిక్కిపడింది. ముఖ్యంగా విజయవాడ, కాకినాడ, ఏలూరు కేంద్రాల్లో సంచలనం. ఒకరు కాదు ఇద్దరు కాదు.. మొత్తం 49 మంది మావోయిస్ట్ పార్టీ నక్సల్స్.. విజయవాడలో 32 మంది, కాకినాడలో ఇద్దరు, ఏలూరులో 15 మంది వరకు పోలీసులకు చిక్కారు. ఇదే దశలో మోస్ట్ వాంటెడ్ మావోయిస్ట్ లీడర్, కేంద్ర కమిటీ సభ్యుడు మడివి హిడ్మాతోపాటు ఆయన భార్య రాజే సహా ఆరుగురు నక్సల్స్ మారేడుమిల్లి అడవుల్లో జరిగిన ఎన్కౌంటర్ లో చనిపోయిన ఉదంతం. ఒక్కసారిగా ఆంధ్రప్రదేశ్ లో పోలీసులు అక్టోపస్ బలగాలతో కలిసి అప్రమత్తం. అడుగడుగునా తనిఖీలు. విజయవాడలోని కానూరు, కాకినాడ, ఏలూరులోని గ్రీన్ సిటీ ప్రాంతాల్లో వరుసగా మావోయిస్టుల అరెస్టులు. ఇటువంటి ఉత్కంఠభరిత ఘటనల మధ్య తలెత్తుతున్న ప్రశ్న ఏమిటంటే.. ఆంధ్రప్రదేశ్ లో మావోయిస్టుల భారీ ‘స్కెచ్’ ఏమిటి?
వాస్తవానికి విజయవాడ నగరాన్ని నక్సలైట్లు ‘షెల్టర్’ జోన్ గా ఉపయోగించుకోవడం కొత్తేమీ కాదు. పీపుల్స్ వార్ నుంచి మావోయిస్టు పార్టీగా రూపాంతరం చెందిన తర్వాత సైతం దశాబ్ధాల విప్లవోద్యమ చరిత్రలో అనేక మంది నక్సల్ నేతలు విజయవాడలోనే షెల్టర్ తీసుకున్నట్లు ప్రచారంలో గల కథనాలు అనేకం. వివిధ ఎన్కౌంటర్లలో ప్రాణాలు కోల్పోయిన పలువురు ప్రముఖ నక్సలైట్ నాయకులు అనారోగ్యంతో విజయవాడలోనే చికిత్స తీసుకుంటూ పట్టుబడినట్లు వేర్వేరు ఘటనల్లో ఆరోపణలతో కూడిన వార్తలు వచ్చాయి. ఈ ఆరోపణలను పోలీసులు తోసిపుచ్చారనేది వేరే విషయం.
అయితే ఛత్తీస్ గఢ్ లో మావోల ఏరివేత కోసం వేలాది మంది భద్రతా బలగాలతో నిర్వహిస్తున్న ఆపరేషన్ కగార్ వల్ల మావోయిస్టుల కదలికలకే ప్రమాదం ఏర్పడిందనేది బహిరంగం. ఆ రాష్ట్రంలో చోటు చేసుకుంటున్న వరుస ఎన్కౌంటర్లు, సోను, ఆశన్న వంటి అగ్రనేతలు వందలాది మంది సహచరులతో లొంగిపోతున్న వరుస పరిణామాలు తెలిసిందే. వచ్చే మార్చి నెలాఖరుకల్లా నక్సల్స్ రహిత దేశంగా మారుస్తామని కేంద్ర హోం మంత్రి అమిత్ షా పునరుద్ఘాటిస్తున్న నేపథ్యమూ విదితమే.
ఇటువంటి పరిస్థితుల్లో మోస్ట్ వాంటెడ్ మావోయిస్ట్ లీడర్, పార్టీ కేంద్ర కమిటీ సభ్యుడు హిడ్మా దంపతులు నలుగురు అనుచరులతో ఎన్కౌంటర్ కు గురయ్యారు. మంగళవారం ఉదయం 6.30 గంటల నుంచి 7.00 గంటల వరకు ఎన్కౌంటర్ జరిగింది. ఇదే రోజు ఉదయం నుంచీ తమకు అందిన ప్రత్యేక ‘ఇంటెలిజెన్స్’ సమాచారంతో నక్సల్స్ కోసం విజయవాడ, కాకినాడల్లో గాలింపు చర్యలు చేపట్టినట్లు ఏపీ ఇంటెలిజెన్స్ విభాగపు అదనపు డీజీ మహేష్ చంద్ర లడ్హా మీడియాకు చెప్పారు. రంపచోడవరంలో హిడ్మా ఎన్కౌంటర్ గురించి వివరాలు వెల్లడిస్తూ విజయవాడ, కాకినాడ నగరాల్లో 31 మంది నక్సలైట్లను అరెస్ట్ చేసినట్లు వెల్లడించారు. ఇందులో మావోయిస్ట్ పార్టీ కేంద్ర కమిటీ సభ్యుడు దేవ్ జీ సెక్యూరిటీ వింగ్ కు చెందిన తొమ్మిది మంది కూడా ఉన్నట్లు పేర్కొన్నారు.
అయితే ఈ వార్తా కథనం రాసే సమయానికి, అంటే రాత్రి ఎనిమిది గంటల ప్రాంతం వరకు ఏపీలోని విజయవాడ, కాకినాడ, ఏలూరు కేంద్రాల్లో పట్టుబడిన మొత్తం నక్సలైట్లు సంఖ్య 49గా వార్తలు వచ్చాయి. విజయవాడ, కాకినాడల్లో అరెస్టయిన మావోలు ఛత్తీస్ గఢ్, ఏలూరులో పట్టుబడిన నక్సల్స్ ఒడిషా రాష్ట్రాలకు చెందినవారుగా సమాచారం. మొత్తం 49 మంది నక్సలైట్లలో ఒక్క విజయవాడలోనే 32 మంది పట్టుబడ్డారు. వీరు తలదాచుకున్న ప్రాంతం నుంచి ఓ భారీ డంప్ ను కూడా పోలీసులు స్వాధీనం చేసుకున్నారని, అందులో పెద్ద ఎత్తున ఆయుధాలు, పేలుడు పదార్థాలు ఉన్నట్లు వార్తలు వచ్చాయి. ఓ లారీలో వీటిని తరలించినట్లు కూడా వార్తల సారాంశం. తమకు పట్టుబడిన మావోయిస్టులకు సంబంధించిన పూర్తి వివరాలను రేపు వెల్లడిస్తామని కృష్ణా జిల్లా ఏస్పీ విద్యాసాగర్ నాయుడు చెప్పారు.
అయితే అరెస్టయిన మావోయిస్టు నక్సలైట్లు విజయవాడ, కాకినాడ, ఏలూరు వంటి నగరాలకు ఎందుకు వచ్చారన్నదే అసలు ప్రశ్న. పోలీసులు అరెస్ట్ చేసిన నక్సల్స్ లో కొందరు హిడ్మా టీం సభ్యులు, మరో తొమ్మిది మంది పార్టీ అగ్రనేత దేవ్ జీ గన్ మెన్లుగా పోలీసు వర్గాలు క్లియర్ గానే చెబుతున్నాయి. ఇదే నిజమైతే హిడ్మా, దేవ్ జీలు తమ అనుచరులను విజయవాడ, కాకినాడ కేంద్రాలకు ఎందుకు పంపారన్నది మరో ప్రశ్న. అనుచరులను మాత్రమే పంపారా? వారితోపాటు ఆ ఇద్దరు అగ్రనేతలు కూడా వచ్చారా? అనే ప్రశ్నపైనా మీడియాలో భిన్న కథనాలు వస్తున్నాయి. కేవలం ‘షెల్టర్’ కోసమే అయితే లభ్యమైన ఆ డంపు ఏమిటి? అందులో స్వాధీనం చేసుకున్నట్లు పోలీసులు పేర్కొంటున్న ఆయుధాలు, పేలుడు పదార్థాలను నక్సల్స్ ఎందుకు తీసుకువచ్చారు? అనేది ఇంకో ప్రశ్న.
కూలీలుగా పని చేసుకోవడానికి వచ్చామని చెబుతూ కానూరులోని భవనాన్ని అద్దెకు తీసుకుని మావోలు షెల్టర్ తీసుకున్నట్లు కూడా వార్తలు వచ్చాయి. ఇదే నిజమైతే ఆయుధాలు, పేలుడు పదార్థాలను తీసుకువచ్చి డంపుల్లో ఎందుకు దాచారనే ప్రశ్న కూడా ఉత్పన్నమవుతోంది. సాధారణంగా ప్రాణాలు దక్కించుకునేందుకే విజయవాడ, కాకినాడ వంటి నగరాలను షెల్టర్ జోన్ గా నక్సల్స్ ఎంచుకుంటే, ఆయుధాలను అడవుల్లోనే దాచి వస్తుంటారనేది గత చరిత్రలో అనేక ఉదంతాలు ఉన్నాయి. కానీ అందుకు విరుద్ధంగా విజయవాడలో లభ్యమైనట్లు పేర్కొంటున్న డంపులోని ‘ఆయుధ’ సమాచారం వార్తల్లోకి రావడం గమనార్హం.
ఈ పరిణామాల్లో దేవ్ జీ, హిడ్మా వంటి అగ్రనేతలు ఆంధ్రప్రదేశ్ లో ఏదేని సంచలన ఘటనకు పాల్పడేందుకు స్కెచ్ వేసి ఉంటారా? అందుకోసం ఏపీనే ఎంచుకు ఎంచుకున్నారు? కేంద్రంలో ఎన్డీఏ పార్టీల భాగస్వామ్యంతో గల ప్రభుత్వ పాలనలో గల ఏపీలో ఎవరేని ముఖ్యులను లక్ష్యంగా చేసుకుని సంచలన ఘటనకు పాల్పడేందుకు తమ సహచరులను విజయవాడ, కాకినాడ, ఏలూరు వంటి నగరాలకు దేవ్ జీ, హిడ్మాలు పంపారా? మారేడుమిల్లి ఎన్కౌంటర్ లో మరణించిన హిడ్మాకు సంబంధించిన డైరీ ఒకటి ఘటనా స్థలంలో లభ్యమైందని, అందులోని సమాచారం మేరకే విజయవాడ, కాకినాడ కేంద్రాల్లో నక్సల్స్ ఆచూకీ పోలీసులకు తెలిసిందనే వార్తలు కూడా వచ్చాయి.
ఇదే వాస్తవమైతే హిడ్మా, దేవ్ జీలు ఏపీలోని ఆయా కేంద్రాల్లో సహచరులతో కలిసే సంచరించారా? లేక ఏపీ అడవుల నుంచి విజయవాడ వంటి నగరానికి, విజయవాడ నుంచి రంపచోడవరం అటవీ ప్రాంతంలోకి హిడ్మా రాకపోకలు సాగిస్తూ పోలీసుల కంటపడి ఎన్కౌంటర్ కు గురయ్యాడా? అరెస్టయినవారిలో హిడ్మా అనుచరులుగా పేర్కొంటున్న నక్సల్స్ ‘రెక్కీ’ చేసినట్లు కూడా కొన్నివార్తలు వచ్చాయి. ఈ పరిణామాల్లో ఏపీ రాష్ట్రంలోకి అంత భారీ సంఖ్యలో మావోయిస్టులు ప్రవేశించడం వెనుక అసలు లక్ష్యమేంటి? ఇదీ ఇప్పుడు తీవ్ర చర్చకు దారి తీసిన ప్రశ్న.
నిజంగా షెల్టర్ కోసమే నక్సల్స్ వస్తే ఆయుధాలు, ఇతర పేలుడు సామాగ్రిని వెంట తీసుకురాకపోవచ్చనేది ఓ వాదన. అందుకు విరుద్ధంగా అరెస్టుల ‘సీన్’లో కనిపిస్తున్న పరిస్థితులు విజయవాడను కేంద్రంగా చేసుకుని మావోయిస్టులు ఏదేని పెను సంచలన ఘటనకు పాల్పడేందుకు స్కెచ్ వేసి ఉంటారా? ఇంటెలిజెన్స్ అప్రమత్తం వల్ల మావోయిస్టుల ప్రణాళిక బెడిసికొట్టిందా? ఇటువంటి అనేక ప్రశ్నలకు అరెస్టయిన నక్సల్స్ నుంచి పోలీసులు తమ ఇంటరాగేషన్ లో రాబట్టే సమాచారం మాత్రమే సమాధానం కాగలదనేది నిర్వివాదాంశం.
