ఖమ్మం: భవన నిర్మాణ కార్మికుల బీమా పెంపు, వివిధ సంక్షేమ పథకాలపై కీలక అవగాహనా కార్యక్రమాన్ని నిర్వహిస్తున్నట్టు కార్మిక శాఖ ఖమ్మం డిప్యూటీ లేబర్ కమిషనర్ కె. విజయభాస్కర్ రెడ్డి ఒక ప్రకటనలో తెలిపారు. ఖమ్మం నగరంలోని మోతీనగర్, రోడ్ నెం. 7లో గల పట్టణ తాపీ మేస్త్రీల భవనంలో (TM FUNCTION HALL) ఈనెల 24వ తేదీన ఉదయం 9 గంటలకు కార్యక్రమం ప్రారంభమవుతుందని చెప్పారు.
ఈ సందర్భంగా కార్యక్రమం ముఖ్యాంశాలను డీసీఎల్ విజయభాస్కర్ రెడ్డి వివరించారు. బీమా పెంపుపై అవగాహనతో పాటు క్లెయిమ్ లు ఏవిధంగా దాఖలు చేసుకోవాలి? కొత్తగా పని వారు ఏ విధంగా నమోదు చేసుకోవాలి? రెన్యువల్ ఎలా చేసుకోవాలి? వివిధ సంక్షేమ పథకాలను మీసేవా ద్వారా ఏ విధంగా దరఖాస్తు చేసుకోవాలి? అనే పలు అంశాలపై పూర్తిగా అవగాహన కల్పించనున్నట్లు చెప్పారు.
ఈ అవకాశాన్ని భవన నిర్మాణ కార్మికులందరూ సద్వినియోగపరచుకోవాలని ఆయన కోరారు. ముఖ్యంగా భవన నిర్మాణ కార్మిక సంఘాలకు చెందిన AITUC, CITU, IFTU , TUCI, ఖమ్మం పట్టణ తాపీ మేస్త్రీల సొసైటీ నాయకులకు, పనివారలను అందరినీ ఆహ్వానిస్తున్నట్లు చెప్పారు. కార్మిక సంక్షేమం, వారి ప్రయోజనాలే ప్రధాన లక్ష్యంగా ఏర్పాటు చేస్తున్న అవగాహనా కార్యక్రమాన్ని విజయవంతం చేయాలని డీసీఎల్ విజయ భాస్కర్ రెడ్డి ఆయా ట్రేడ్ యూనియన్లను, కార్మికులను కోరారు.
