ఛత్తీస్ గఢ్: మోస్ట్ వాంటెడ్ మావోయిస్ట్ పార్టీ లీడర్ హిడ్మా ఎన్కౌంటర్ ఘటనపై మావోయిస్ట్ పార్టీ స్పందించింది. ఈమేరకు ఆ పార్టీ కేంద్ర కమిటీ అధికార ప్రతినిధి అభయ్ పేరుతో శుక్రవారం ఓ ప్రకటన విడుదలైంది.
కేంద్ర కమిటీ సభ్యుడు, దండకారణ్యం స్పెషల్ జోనల్ కమిటీ కార్యదర్శి మడివి హిడ్మాను, అతని భార్య రాజేతోపాటు మరికొంత మందిని పోలీసులు పట్టుకుని కాల్చి చంపారని అభయ్ ఆరోపించారు. చికిత్స కోసం విజయవాడకు వెళ్లి తమవారిని కొందరు చేసిన ద్రోహంవల్ల స్పష్టమైన సమాచారంతో పోలీసులు ఈనెల 15వ తేదీన పట్టుకుని క్రూరంగా హత్య చేసి మారేడుమిల్లి ఎన్కౌంటర్ కట్టుకథను అల్లారని ఆయన ఆరోపించారు.
అదేవిధంగా రాష్ట్ర కమిటీ సభ్యుడు టెక్ శంకర్ ను మరికొందరిని కూడా పట్టుకుని హత్య చేసి రంపచోడవరం ఏరియాలో ఎన్కౌంటర్ జరిగిందని కట్టుకథలు అల్లారని ఆరోపించారు. ఈ హత్యాకాండకు వ్యతిరేకంగా ఈనెల 23వ తేదీన దేశవ్యాప్త నిరసన దినంగా పాటించాలని అభయ్ కోరారు. అభయ్, శంకర్ లతోపాటు ఎన్కౌంటర్లలో చనిపోయిన మిగతావారి నేపథ్యాన్ని, పార్టీకి వారు చేసిన సేవలను అభయ్ తన ప్రకటనలో కొనియాడారు.వాళ్లు కొనసాగించిన విప్లవ సంప్రదాయాలను, ఉద్యమ స్ఫూర్తిని నింపుకుని ఉద్యమాన్ని కొనసాగిస్తామని కేంద్ర కమిటీ శపథం చేస్తోందని అభయ్ తన ప్రకటనలో పేర్కొన్నారు.
