ఖమ్మం: ఖమ్మం నగరంలో ఓ భర్త కిరాతకానికి పాల్పడ్డాడు, కట్టుకున్న భార్యను కత్తితో గొంతుకోసి కడతేర్చాడు. గురువారం ఉదయం జరిగిన ఈ ఘటన ఖమ్మం నగరంలో తీవ్ర కలకలం సృష్టించింది. ఖమ్మంలోని గట్టయ్య సెంటర్ లో ఈ ఘాతుకం జరిగింది. ప్రాథమిక సమాచారం ప్రకారం ఘటన పూర్వాపరాలు ఇలా ఉన్నాయి.
చింతకాని మండలం నేరెడకు చెందిన గోగుల భాస్కర్ తో, జగ్గయ్యపేటకు చెందిన సాయివాణికి కొన్నేళ్ల క్రితం వివాహమైంది. వీరి కాపురంలో కలిగిన సంతానంలో ఓ కుమార్తె (14), కుమారుడు (8) ఉన్నారు. భార్యాభర్తల మధ్య గత ఏడాది కాలంగా తీవ్ర గొడవలు ఉన్నట్లు సమాచారం. భర్తకు దూరంగా ఉంటున్న సాయివాణి ఖమ్మంలోని ఓ ప్రయివేట్ ఆసుపత్రిలో నర్సుగా పనిచేస్తోంది. భర్త భాస్కర్ మాత్రం పనీ పాటా చేయకుండా ఖాళీగా తిరుగుతున్నాడు. ఈ నేపథ్యంలోనే భార్యా భర్తలు విడివిడిగా ఉంటున్నారు.
అయితే గత రాత్రి తన భార్య సాయివాణి వద్దకు వచ్చిన భాస్కర్ ఆమెతో ఘర్షణకు దిగినట్లు తెలుస్తోంది. ఈ సందర్భంగా గురువారం తెల్లవారుజామున ఇరువురి మధ్య తీవ్ర వాగ్వాదం జరగ్గా, అకస్మాత్తుగా కత్తి తీసుకుని భాస్కర్ సాయివాణి గొంతును కోశాడు. భాస్కర్ ను అడ్డుకున్న పధ్నాలుగేళ్ల కూతురిపైన భాస్కర్ కర్కశంగా దాడి చేశాడు. తీవ్రంగా గాయపడిన ఆ బాలికను చికిత్స కోసం ఆసుపత్రికి తరలించారు. ఎనిమిదేళ్ల కుమారుడు తండ్రి ఘాతుక చర్యకు భయకంపితుడై ఇంటినుంచి పారిపోయినట్లు తెలుస్తోంది.
సాయివాణిని చంపిన భాస్కర్ ను స్థానికులు పట్టుకుని దేహశుద్ధి చేసి పోలీసులకు అప్పగించారు. హత్యకు దారి తీసిన నేపథ్యానికి సంబంధించిన పూర్తి సమాచారం కోసం ఖమ్మం టూ టౌన్ పోలీసులు కేసు నమోదు చేసుకుని దర్యాప్తు చేస్తున్నారు.
