హైదరాబాద్: సౌదీ అరేబియాలో ఈ తెల్లవారుజామున జరిగిన ఘోర రోడ్డు ప్రమాదంలో బాధితులందరూ హైదరాబాద్ వాసులే. బస్సులో సజీవదహనమైన 45 మందిలో 18 మంది చొప్పున పురుషులు, మహిళలు, పది మంది చిన్నారులు ఉన్నారు. చిన్నారుల్లో ఐదుగురు చొప్పున బాల, బాలికలు ఉన్నారు. వీరందరూ హైదరాబాద్ వాసులుగానే ప్రాథమికంగా అధికారులు గుర్తించారు. ఈ ఘటనపై సేకరించిన ప్రాథమిక సమాచారాన్ని హైదరాబాాద్ జాయింట్ పోలీస్ కమిషనర్ తఫ్సీర్ ఇక్బాల్ మీడియాకు వివరించారు.
హైదరాబాదు నుంచి నాలుగు ఏజెన్సీల ద్వారా 54 మంది సౌదీకి వెళ్లినట్లు సమాచారం ఉందని తఫ్సీర్ ఇక్బాల్ చెప్పారు. ప్రమాదం జరిగిన సమయంలో హైదరాబాద్ ప్రాంతానికి చెందిన వాళ్ళు ఉన్నారని స్పష్టతనిచ్చారు. ప్రమాదంలో 45 మంది సజీవ దహనం కాగా, అబ్ధుల్ షోయబ్ అనే వ్యక్తి ఒక్కరు మాత్రమే ప్రాణాలతో బయటపడినట్లు చెప్పారు. అతని పరిస్థితి గురించి తెలియాల్సి ఉందన్నారు. మృతిచెందిన వారిలో 18 మంది మహిళలు, 18 మంది పురుషులు,10 మంది చిన్నారులు ఉన్నట్లు పేర్కొన్నారు.
సౌదీలోని ఇండియన్ ఎంబసీ ప్రతినిధులు ఘటన స్థలానికి వెళ్లారన్నారు. బాధితులు ఏ ఆసుపత్రిలో ఉన్నారో వారు చెక్ చేస్తున్నారన్నారు. హైదరాబాద్ నుంచి మొత్తం 54 మంది వెళ్లగా, 46 మంది బస్సులో మక్కాకు వెళ్లారని, మరో నలుగురు కారులో మదీనాకు బయలుదేరినట్లు చెప్పారు. ఇంకో నలుగురు మక్కాలోనే ఉండిపోయారని చెప్పారు. వెళ్లిన మొత్తం యాత్రీకుల్లో ఎనిమిది మంది క్షేమంగా ఉన్నట్లు చెప్పారు. బస్సు సౌదీ ప్రభుత్వానికి చెందినదిగా సమాచారం ఉందన్నారు. ప్రాథమిక సమాచారం ప్రకారం ప్రస్తుతానికి ఇవే వివరాలు ఉన్నాయని, పూర్తి సమాచారం అందిన తర్వాత మరిన్ని వివరాలు వెల్లడిస్తామని జాయిట్ పోలీస్ కమిషనర్ తఫ్సీర్ ఇక్బాల్ చెప్పారు.
