సౌదీ ఆరేబియాలో సోమవారం తెల్లవారు జామున 1.30 గంటలకు జరిగిన ఘోర రోడ్డు ప్రమాదంలో 42 మంది భారతీయులు సజీవ దహనమయ్యారు. యాత్రీకులతో వెడుతున్న బస్సును ఓ డీజిల్ ట్యాంకర్ ఢీకొన్న పరిస్థితుల్లో ఈ ఘోర ప్రమాదం చోటు చేసుకున్నట్లు ఇంగ్లీష్ మీడియా సంస్థలు నివేదిస్తున్నాయి.
డీజిల్ ట్యాంకర్ ఢీకొనగానే మంటలు బస్సు మొత్తం వ్యాపించడం, ప్రమాద సమయంలో యాత్రీకులు నిద్రలో ఉండడం వల్ల మృతుల సంఖ్య భారీగా ఉన్నట్లు భావిస్తున్నారు. చనిపోయిన వారిలో ఎక్కువ మంది హైదరాబాద్ వాసులు ఉన్నట్లు సమాచారం. ముఖ్యంగా బజార్ ఘాట్, మల్లేపల్లి ప్రాంతవాసులే 16 మంది వరకు ఉన్నట్లు తెలుస్తోంది. మృతుల్లో 11 మంది చిన్నారులు, 20 మంది మహిళలు ఉన్నట్లు ఆంగ్ల మీడియా సంస్థల కథనం. కాగా ఈ ఘటనపై స్పష్టత రావలసి ఉందని హజ్ కమిటీకి చెందినవారు పేర్కొంటున్నారు.
తెలంగాణా సీఎం రేవంత్ దిగ్భ్రాంతి:
సౌదీ అరేబియాలో భారతీయ యాత్రికులతో ఉన్న బస్సు ఘోర ప్రమాదానికి గురి కావడంపై తెలంగాణా ముఖ్యమంత్రి ఎ. రేవంత్ రెడ్డి దిగ్బ్రాంతి వ్యక్తం చేశారు. మక్కా నుంచి మదీనాకు వెళ్తుండగా ఈ ప్రమాదం జరిగిందని, అందులో హైదరాబాద్ వాసులు కూడా ఉన్నట్లు వస్తున్న వార్తలపై వెంటనే స్పందించిన సీఎం పూర్తి వివరాలు తెలుసుకోవాలని సీఎస్, డీజీపీని అదేశించారు. తెలంగాణకు చెందినవారు ఎంత మంది ఉన్నారని ఆరా తీశారు.
కేంద్ర విదేశాంగ శాఖ, సౌదీ ఎంబసీ అధికారులతో మాట్లాడాలని సూచించారు. అవసరమైతే వెంటనే తగిన సహాయక చర్యలకు రంగంలోకి దిగాలని అదేశించారు. సీఎం అదేశాలతో సీఎస్ రామకృష్ణారావు ఢిల్లీలో ఉన్న కోఆర్డినేషన్ సెక్రటరీ గౌరవ్ ఉప్పల్ ను అప్రమత్తం చేశారు. ప్రమాదంలో మన రాష్ట్రానికి చెందిన వారు ఎంత మంది ఉన్నారనే వివరాలు సేకరించి వెంటనే అందించాలని అదేశించారు. సచివాలయంలో కంట్రోల్ రూమ్ ఏర్పాటు చేశారు.
