ఖమ్మం: ఖమ్మం ఛాంబర్ ఆఫ్ కామర్స్ పాలకవర్గానికి మరికాసేపట్లో ఎన్నికలు జరగనున్నాయి. ఆదివారం ఉదయం 8 గంటల నుంచి సాయంత్రం 4 గంటల వరకు పోలింగ్ నిర్వహించేందుకు అవసరమైన ఏర్పాట్లు పూర్తయ్యాయి. ఛాంబర్ ఆఫ్ కామర్స్ ఎన్నికల్లో నెగ్గేందుకు పోటీకి దిగిన ప్రముఖ వ్యాపారులు తమ శక్తి వంచన లేకుండా ప్రయత్నాలు చేస్తున్నారు. ఓ ప్యానల్ సంప్రదాయ పద్ధతుల్లో ప్రచారం నిర్వహించగా, మరో ప్యానల్ తమదైన ఈవెంట్ల తరహా వ్యాపారం తరహాలోనే ‘మందు., విందు’ ప్రాతిపదికగా వర్తక, వ్యాపార ఓటర్లను ఆకట్టుకునే ప్రయత్నం చేసింది. ఈ తరహా ‘కల్చర్’కు ఓటు హక్కు గల వ్యాపారులు మొగ్గు చూపుతారా? లేదా? అనేది వేరే విషయం.
ఈ నేపథ్యంలో ఛాంబర్ కు ‘రాజకీయ’ రంగు పులిమేందుకు కొందరు చేసిన ప్రయత్నాలపై జిల్లాకు చెందిన ఇద్దరు ముఖ్య నేతలు నీళ్లు చల్లారనే చెప్పాలి. ముఖ్యంగా తన ఆశీర్వాదం కోసం వచ్చిన ఓ వ్యాపారికి, అతన్ని వెంటేసుకుని వచ్చిన సీనియర్ జర్నలిస్టుకు డిప్యూటీ సీఎం మల్లు భట్టి విక్రమార్క తనదైన శైలిలో ‘సీన్’ చూపించారనే కథనం ప్రచారంలో ఉంది. ఈ వ్యాపారి గతంలో ఓ మాజీ మంత్రి అండ చూపుకుని, అతని పేరు చెప్పుకుని చేసినట్లు ఆరోపణలు గల అనేక అంశాలపై భట్టి అనుచరులు కొందరు ఆ ఇద్దరి సమక్షంలోనే భగ్గుమన్నారట. ఏ ఎండకు ఆ గొడుగు పట్టే వీళ్లను దరికి రానీయవద్దని భట్టిని కోరారట. దీంతో బిక్కమొహం వేసుకుని వ్యాపారితోపాటు సదరు సీనియర్ జర్నలిస్టు సైతం తిరుగుముఖం పట్టక తప్పలేదు.
ఈ నేపథ్యంలోనే ఖమ్మం నియోజకవర్గానికి ప్రాతినిధ్యం వహిస్తున్న వ్యవసాయ శాఖ మంత్రి తుమ్మల నాగేశ్వర్ రావు ఛాంబర్ ఎన్నికలపై కీలక ప్రకటన జారీ చేశారు. ఖమ్మం ఛాంబర్ ఆఫ్ కామర్స్ ఎన్నికల్లో ఏ వర్గం కూడా తన పేరుతో ప్రచారం చేయవద్దని, ఎవరినీ ప్రలోభపెట్టవద్దన్నారు. ఇందుకు పాల్పడేవారిని గుర్తించి చర్యలు తీసుకునే విషయంలో రాజీ పడేది లేదని కూడా తుమ్మల హెచ్చరించారు. అయినప్పటికీ తుమ్మల ముఖ్య అనుచరులు ఒకరిద్దరు ఓ మాజీ మంత్రి పేరు చెప్పుకుని గతంలో ‘వ్యాపారం’ చేసుకున్నవారికి ఈ ఎన్నికల్లో లోపాయికారిగా సహకరిస్తున్నారనే వార్తలు కూడా వ్యాప్తిలోకి వస్తున్నాయి. తుమ్మల మనోభీష్టానికి వ్యతిరేకంగా, ఆయన ‘పద్ధతి’కి విరుద్ధంగా మంత్రి వెన్నంటి ఉండే ఒకరిద్దరు ముఖ్య అనుచరులు వ్యవహరిస్తున్నారనే విమర్శలు కూడా వచ్చాయి.
ఈ నేపథ్యంలోనే ఛాంబర్ పాలకవర్గంలో కీలక పదవికోసం తపిస్తున్న మాజీ మంత్రి ‘వీరాభిమాని’ ఒకరు ఎన్నికల ప్రక్రియ ప్రారంభానికి ముందే మంత్రి తుమ్మలను కలిసినట్లు తాజాగా వ్యాప్తిలోకి రావడం విశేషం. ఎక్కడ పవర్ ఉంటుందో., అక్కడ వాలిపోగలడనే పేరు గల ఈ వ్యాపారి మంత్రి తుమ్మలను కలిసి అతి వినయాన్ని ప్రదర్శిస్తూ, తనకు ఛాంబర్ ఎన్నికల్లో పోటీచేసే ఆలోచన ఉందని, తమరి ఆశీర్వాదం కావాలని అభ్యర్థించాడట. ఇందుకు మంత్రి తుమ్మల చిరునవ్వుతో స్పందిస్తూ, ‘నువ్వు ఎమ్మెల్యే స్థాయి వ్యక్తివి, ఛాంబర్ లో కీలక పదవి నీ స్థాయికి సరిపోదు’ అని వ్యాఖ్యానించినట్లు వ్యాపార వర్గాలు చర్చించుకుంటున్నాయి. ఇందులో అసలు విశేషం ఏమిటీ అనుకుంటున్నారా..? అదే మరి అసలు ట్విస్టు..!
మంత్రి తుమ్మల తనను ఎమ్మెల్యే స్థాయి నాయకుడిగా అభివర్ణించారని ఈ వ్యాపారి తెగ మురిసిపోతున్నాడట. తనను పొగిడారని సంతోషపడిపోతున్నాడట. అయితే మంత్రి తుమ్మల వ్యాఖ్యల్లోని అసలు భావం గురించి తెలిసినవారు ఆ వ్యాపారి అత్యుత్సాహంపై సెటైర్లు వేసుకుంటున్నట్లు వర్తక వర్గాల్లో చర్చ జరుగుతోంది. ‘నువ్వు ఎమ్మెల్యే స్థాయి లీడర్ వి’ అని తుమ్మల వ్యాఖ్యానించారంటే.. ‘ఛాంబర్’ పదవి నీకు అక్కర్లేదు’ అని తుమ్మల వ్యాఖ్యల్లోని అసలు అర్థపు పరమార్థంగా వ్యాపార వర్గాలు అభివర్ణిస్తున్నాయి. ఛాంబర్ ఎన్నికల వ్యవహారంలో తుమ్మల ‘ప్రశాంత ఖమ్మం’ను మాత్రమే కోరుకుంటున్నారని స్పష్టమవుతోందంటున్నారు. ఛాంబర్ పదవిని అధిష్టిస్తే తన ఇతర వ్యాపారాలకు బాగా ఉపకరిస్తుందని ‘నిలువెల్లా’ తపిస్తున్నట్లు ప్రచారంలో గల ఆ వ్యాపారి అంశంలో తుమ్మల వ్యాఖ్యల్లోని అసలు భావం అర్థమైందా రాజా..? అని ఖమ్మం ఛాంబర్ వర్గాలు వ్యాఖ్యానిస్తున్నాయి.
