బస్తర్: ఛత్తీస్ గఢ్ లోని ఇంద్రావతి నేషనల్ పార్క్ అడవుల్లో మంగళవారం జరిగిన భారీ ఎన్కౌంటర్ లో మృతి చెందిన మావోయిస్ట్ నక్సలైట్ల ఫొటోలను బీజాపూర్ జిల్లా పోలీసులు గురువారం విడుదల చేశారు. ఈమేరకు ఎన్కౌంటర్ లో చనిపోయినవారి చిత్రాలతో కూడిన వివరాలను పోలీసులు వెల్లడించారు. చనిపోయినవారిలో మద్దేడు ఏరియా కమిటీ ఇంఛార్జి బుచన్న, మోస్ట్ వాంటెడ్ మావోయిస్ట్ కమాండర్ పాపారావు భార్య ఊర్మిళ ఉన్నట్లు ఈ వివరాల ద్వారా స్పష్టమవుతోంది.
నేషనల్ పార్క్ అడవుల్లో జరిగిన ఈ ఎన్కౌంటర్ లో డీవీసీఎంలు మన్నా అలియాస్ బుచ్చన్న (35), పాపారావు భార్య ఊర్మిళ (40), పామేడు ఏరియా కమిటీ సభ్యురాలు దేవె(25), మద్దేడు ఏరియా కమిటీ ఏసీఎం జగత్ తామో అలియాస్ మోటు (25), ఇదే కమిటీ సభ్యులు భగత్ (30), మంగళి ఓయమ్ (25) లు ఉన్నట్లు పోలీసులు ప్రకటించారు. ఎన్కౌంటర్ లో మృతి చెందిన మావోయిస్టుల నుంచి స్వాధీనం చేసుకున్న ఆయుధాలను కూడా పోలీసులు ప్రదర్శించారు.
కాగా ఎన్కౌంటర్ లో చనిపోయిన మొత్తం ఆరుగురు మావోయిస్టుల్లోని ఇద్దరు డీవీసీఎంలపై రూ. 8.00 లక్షల చొప్పున, ఏసీఎంపై రూ. 5.00 లక్షలు, మిగతా ముగ్గురు సభ్యులపై రూ. 2.00 లక్షల చొప్పున నగదు రివార్డు ఉన్నట్లు పోలీసులు పేర్కొన్నారు.
