హైదరాబాద్: తెలంగాణా రాజకీయాల్లో ఇదో కీలక మలుపు.. జూబ్లీ హిల్స్ ఉప ఎన్నికల వేళ కాంగ్రెస్ పార్టీ అధిష్టానం రాజకీయంగా అత్యంత కీలక నిర్ణయం తీసుకుందనే వ్యాఖ్యలు వినిపిస్తున్నాయి. ఇందులో భాగంగానే సీఎం రేవంత్ రెడ్డి కేబినెట్ జట్టులోకి అజారుద్దీన్ ను తీసుకునేందుకు అడుగు వేసింది. ఈమేరకు ఈనెల 31వ తేదీన తెలంగాణా మంత్రివర్గ విస్తరణ జరగనుంది. కేబినెట్ మంత్రిగా అజారుద్దీన్ ప్రమాణ స్వీకారం చేసే అవకాశం ఉంది. తెలంగాణా మం్రతివర్గంలో ఇంకా ముగ్గురికి అవకాశం ఉండగా, ప్రస్తుతానికి అజారుద్దీన్ కు మాత్రమే అవకాశం కల్పిస్తున్నారు.
మాజీ క్రికెటర్, టీమిండియా కెప్టెన్ గా గతంలో వ్యవహరించిన మహ్మద్ అజారుద్దీన్ 2009 ఫిబ్రవరి 19వ తేదీన కాంగ్రెస్ పార్టీలో చేరారు. ఉత్తరప్రదేశ్ లోని మురాదాబాద్ ఎంపీగా కాంగ్రెస్ నుంచి 2009లో విజయం సాధించారు. ఆ తర్వాత రాజస్థాన్ లోని టోంక్ నియోజకవర్గం నుంచి 2014 ఎన్నికల్లో పోటీ చేసి ఓటమి చెందారు. అనంతరం తెలంగాణాకు తిరిగి వచ్చిన అజారుద్దీన్ హైదరాబాద్ క్రికెట్ అసోసియేషన్ (HCA) అధ్యక్షునిగా సేవలందించారు. గత అసెంబ్లీ ఎన్నికల్లో జూబ్లీ హిల్స్ స్థానం నుంచి కాంగ్రెస్ అభ్యర్థిగా పోటీ చేసి స్వల్ప ఓట్ల తేడాతో ఓడిపోయారు.
ప్రస్తుతం జరుగుతున్న జూబ్లీహిల్స్ ఉప ఎన్నికల్లోనూ పోటీకి అజారుద్దీన్ సిద్దపడ్డారు. అయితే గవర్నర్ కోటాలో ఎమ్మెల్సీగా అవకాశం కల్పించాలని పార్టీ నిర్ణయించడంతో పోటీ విషయంలో పార్టీ నిర్ణయానికే అజారుద్దీన్ కట్టుబడి ఉన్నారు. గవర్నర్ కోటాలో ప్రొఫెసర్ కోదండరాంతోపాటు అజారుద్దీన్ ను కూడా ఎంపిక చేస్తూ తీసుకున్న నియామకపు నిర్ణయానికి ఇంకా గవర్నర్ ఆమోదం లభించలేదు. ఈ ఆమోదం విషయంలో ఏదేని సాంకేతిక సమస్య తలెత్తినా, ఆరు నెలల్లోపు మరేదైనా కోటాలోనూ అజారుద్దీన్ ఎమ్మెల్సీగా ఎన్నికయ్యే అవకాశం ఉంది.
ఈ నేపథ్యంలో అజారుద్దీన్ ను మంత్రివర్గంలోకి తీసుకునేందుకు పార్టీ అధిష్టానం పచ్చ జెండా ఊపడం విశేషం. మైనార్టీ ఓట్లు గణనీయ సంఖ్యలో గల జూబ్లీ హిల్స్ ఉప ఎన్నిక నేపథ్యంలో కేబినెట్ లోకి అజారుద్దీన్ ను తీసుకుంటుండం గమనార్హం. తద్వారా మైనార్టీల అంశంలో తమ ప్రాధాన్యత ఏమిటో కాంగ్రెస్ పార్టీ చెప్పకనే చెప్పినట్లయిందనే వ్యాఖ్యలు ఈ సందర్భంగా వినిపిస్తున్నాయి. గత అసెంబ్లీ ఎన్నికల్లో రాష్ట్రంలోని ఏ స్థానం నుంచి కూడా మైనార్టీ అభ్యర్థి విజయం సాధించకపోవడంతో ఆ సామాజికవర్గానికి కేబినెట్ లో స్థానం దక్కలేదు. మంత్రివర్గంలో మైనార్టీలెవరూ లేరనే వ్యాఖ్యలకు తెరదించుతూ ప్రస్తుతం అజారుద్దీన్ ను కేబినెట్ లోకి తీసుకుంటున్నారు.
