ఖమ్మం ఛాంబర్ ఆఫ్ కామర్స్ ఒకప్పుడు నగరంలో అత్యంత ప్రభావవంతమైన శక్తి, నాయకులను తయారు చేసే ఒక ఫ్యాక్టరీగా గుర్తింపు పొందింది. ఏ రాజకీయ పార్టీ అయినా ఛాంబర్‌ను గౌరవించేది, వ్యాపార వర్గాల గొంతుకగా భావించేది.
కానీ కాలం మారింది… ఛాంబర్ మాత్రం మారినట్లు లేదు. ఇది పాతకాలం వ్యాపారాలతో నిండిపోయిన సంస్థగా మారిపోయిందనే అభిప్రాయాలు ఉన్నాయి. నూతన తరానికి, కొత్త వరవడిలో పుట్టిన వ్యాపారాలకు ఇది ప్రతినిధిగా లేదనే విమర్శలూ లేకపోలేదు. ఇప్పుడు ఇది కేవలం అగ్రికల్చరల్ మార్కెట్, కొద్దిమంది వ్యాపారాలకే ప్రతినిధిగా కనిపిస్తోందనే వ్యాఖ్యలు సైతం వినిపిస్తున్నాయి.
ఛాంబర్‌ను మళ్లీ ప్రభావవంతంగా, గౌరవనీయంగా మార్చాలంటే దాని పరిధిని విస్తరించి, అన్ని కొత్త వ్యాపారాలు, స్టార్టప్స్, సర్వీస్ రంగాలు కూడా సభ్యులుగా చేయాలనేది ప్రముఖ వ్యాపార వర్గాలు ఇస్తున్న సూచన. అప్పుడు మాత్రమే ఛాంబర్ తన ప్రతిష్టను తిరిగి పొందగలదంటున్నారు. కానీ ఆ స్థాయి నాయకత్వాన్ని ఛాంబర్ ఉత్పత్తి చేసే స్థితిలో ఉందా..? అనేదే అసలు ప్రశ్న.
ఇదీ చదవండి:
గత మూడు దశాబ్దాలుగా ఛాంబర్ నుండి బలమైన నాయకత్వం వెలువడలేదనేది వ్యాపార వర్గాల భావన. సమస్యలపై పోరాడే నాయకత్వం కనిపించలేదనే విమర్శలు. ఇప్పటి కాలంలో వచ్చిన కొన్ని మార్కెట్ వ్యవహారాల్లో అనేక మంది వ్యాపారులు నష్టపోయారు. వారు సభ్యులకు ఇవ్వాల్సిన బాకీలను వసూలు చేయడంలో ఛాంబర్ పూర్తిగా విఫలమైందనే విమర్శలూ వచ్చాయి. ప్రస్తుత పాలకవర్గంలోని ఓ ముఖ్య వ్యక్తి కుటుంబ సభ్యులు ఇవ్వాల్సిన బాకీల విషయంలో కూడా ఛాంబర్ కనీస ప్రయత్నం చేయలేదనే ఆరోపణలు ఉన్నాయి. ఇప్పుడున్న అభ్యర్థులలో ఎవరూ కూడా ఇలాంటి సమస్యలపై తమ కార్యాచరణ ఏమిటి అనే ప్రశ్నకు సమాధానం చెప్పడం లేదంటున్నారు. ఇప్పుడు విప్లవాత్మక మార్పులు తీసుకురావాల్సిన సమయం వచ్చిందనే వాదన తాజాగా తెరపైకి వస్తోంది.
ఇప్పటి పరిస్థితుల్లో చాలా వ్యాపారాల్లో రెండవ తరం ఆసక్తి చూపడం లేదని, దీంతో భవిష్యత్తులో ఒక పెద్ద లోటు ఏర్పడే ప్రమాదం ఉందనే ఆందోళనలు వ్యక్తమవుతున్నాయి. ఈ నేపథ్యంలో కొత్త తరం వ్యాపారవేత్తలను, ఆధునిక రంగాలను ఛాంబర్‌లోకి ఆహ్వానించి, సంస్థను ఉత్సాహభరితంగా, భవిష్యత్‌ దృష్టితో తీర్చిదిద్దాలంటున్నారు.
కానీ, దురదృష్టవశాత్తు ఖమ్మం ఛాంబర్ ఎన్నికలు కూడా ఇప్పుడు రాజకీయ ఎన్నికలను మరిపిస్తున్నాయి. ఒక సామాజిక సేవా సంస్థగా మర్యాద, నిబద్ధత, నైతికతతో నడుచుకోవాలనే అభిప్రాయాలు వ్యక్తమవుతున్నాయి. ఇప్పుడు ఎన్నికల విధానాన్ని పూర్తిగా మార్చాల్సిన అవసరం ఉందంటున్నారు. లయన్స్, రోటరీ సంస్థల మాదిరిగా — ప్రస్తుత కాలానికి కాదు, తదుపరి కాలానికి ఎన్నికలు జరగాలనేదే ఇందులోని ఆంతర్యం. ఇలా చేస్తే కొనసాగింపు, బాధ్యత, నిరంతరత వస్తాయనేది వ్యాపార వర్గాల అంచనా, ఆశ కూడా. అనుభవం లేని వ్యక్తులు ఈ సంస్థను ముందుకు తీసుకుపోలేరనే ఖచ్చతాభిప్రాయానికి వ్యాపార వర్గాలు వస్తున్నాయి. ఇప్పుడు ఒక వర్గానికి అనుకూలంగా వ్యక్తిగత ప్రయోజనాల కోసం పనిచేస్తున్న నాయకులు తమ స్వప్రయోజనాల కోసమే రంగంలోకి దిగుతున్నారని స్పష్టంగా కనిపిస్తోందనే విమర్శలు వినిపిస్తున్నాయి.
ఇదీ చదవండి:
ప్రచారం, వాగ్దానాల ఆధారంగా కాకుండా ప్రతిభ, సేవా దృక్పథం, సామాజిక స్పృహ ఆధారంగా నాయకులను ఎన్నుకోవాలని వ్యాపార వర్గాలు భావిస్తున్నాయి. ఛాంబర్ మళ్లీ ఖమ్మం వ్యాపార ప్రపంచానికి ఆధారంగా, ఐక్యతకు ప్రతీకగా, బాధ్యతాయుత నాయకత్వానికి మార్గదర్శకంగా నిలవాలని ఆ వర్గాలు అభిలషిస్తున్నాయి.
‘మార్పు మన చేతుల్లోనే ఉంది. మనమంతా కలసి ఛాంబర్‌ను మళ్లీ గౌరవనీయంగా, శక్తివంతంగా, స్ఫూర్తిదాయకంగా మార్చుకుందాం’ అనే భావనను ఖమ్మం నగర వ్యాపార వర్గాలు వ్యక్తం చేస్తున్నాయి. ఈనెల 16న జరిగే ఖమ్మం ఛాంబర్ ఆఫ్ కామర్స్ ఎన్నికల సందర్భంగా రచయిత పేరు లేకుండా ‘సమీక్ష’కు అందిన పోస్టులోని సారాంశమిది.
