ఖమ్మం: ఖమ్మం వర్తక సంఘం (ఛాంబర్ ఆఫ్ కామర్స్)కు ఎన్నికలు జరుగుతున్న వేళ రాష్ట్ర వ్యవసాయ శాఖ మంత్రి తుమ్మల నాగేశ్వర్ రావు చేసిన ‘హెచ్చరిక’ వర్తక, వ్యాపార వర్గాల్లో తీవ్ర చర్చనీయాంశంగా మారింది. ఇంతకీ ఛాంబర్ ఎన్నికల అంకంలో తుమ్మల నాగేశ్వర్ రావుకు ఆగ్రహం కలిగించిన ఘటన ఏమిటి? అందుకు దారి తీసిన పరిస్థితులు ఏమిటి? అనే ప్రశ్నలపై భిన్న చర్చ జరుగుతోంది. ఈ అంశంలో కేబినెట్ మినిస్టర్ స్వయంగా స్పందిస్తూ వార్నింగ్ స్టేట్మెంట్ ఇచ్చేవరకు దారి తీసిన పరిణామాల్లోకి వెళ్లే ముందు మరో ముఖ్యాంశం కూడా వెలుగులోకి రావడం విశేషం. అదేమిటంటే..?
ఖమ్మంలో బడా వ్యాపారవేత్తగా చెలామణిలో గల ఓ వ్యక్తి దాదాపు పదిహేను రోజుల క్రితం తనకు సన్నిహితుడైన సీనియర్ జర్నలిస్టును ఒకరిని వెంటేసుకుని డిప్యూటీ సీఎం మల్లు భట్టి విక్రమార్కను కలిసేందుకు నగరంలోని ఆయన క్యాంపు కార్యాలయానికిి వెళ్లాడు. కాసేపు వేచి ఉన్న తర్వాత డిప్యూటీ సీఎం విజిటర్స్ ను కలిసేందుకు అక్కడికి వచ్చారు. తనకోసం వచ్చినవారి అవసరాలేంటో భట్టి వరుసగా తెలుసుకుంటున్నారు. ఈ క్రమంలోనే సదరు వ్యాపారవేత్తను ఆ సీనియర్ జర్నలిస్ట్ డిప్యూటీ సీఎం భట్టికి పరిచయం చేసేందుకు ఉద్యుక్తమయ్యాడు.
ఈ వ్యాపారి చాల గొప్ప వ్యక్తి అని, ఆది నుంచీ కాంగ్రెస్ పార్టీకి వెన్నుదన్నుగా ఉన్నారని, ఛాంబర్ ఎన్నికల్లో పోటీ చేసే యోచనలో ఉన్నారని, తమరి మద్దతు అవసరమనే భావనను వ్యక్తం చేస్తూ వివరం చెబుతుండగానే, డిప్యూటీ సీఎం భట్టి సదరు జర్నలిస్టు చెప్పే విషయాన్ని పెద్దగా పట్టించుకోలేదట. ఇదే సమయంలో అక్కడే గల భట్టి ముఖ్య అనుచరులిద్దరు వెంటనే కల్పించుకుని ‘సార్ ఈ వ్యాపారి బీఆర్ఎస్ ప్రభుత్వంలో చెలాయించిన ఆధిపత్యం అంతా ఇంతా కాదు, మన కాంగ్రెస్ అభిమాన వర్తకులను, వ్యాపారులను నానా ఇబ్బందులకు గురి చేశాడు. ఓ మాజీ మంత్రి పేరును అప్పట్లో తెగ వాడుకుని చేయరాదని అకృత్యాలన్నీ ఇతను చేశాడు’ అంటూ సదరు వ్యాపారి చరిత్రను అతని ముందే డిప్యూటీ సీఎం భట్టికి నివేదించారట. దీంతో ‘నిలువెల్లా’ వణికిన ఆ వ్యాపారి దిక్కుతోచని పరిస్థితుల్లో బిక్క ముఖం వేసుకుని మెల్లగా అక్కడి నుంచి జారుకున్నారట.
ఇదీ చదవండి:
ఇప్పుడు అసలు విషయంలోకి వస్తే.. ఖమ్మం ఛాంబర్ ఆఫ్ కామర్స్ కు నవంబర్ 16వ తేదీన ఎన్నికలు జరుగుతున్నాయి. మొత్తం 76 పదవులకు 118 నామినేషన్లు దాఖలయ్యాయి. నామినేషన్ల పర్వం కూడా నిన్నటితో ముగిసింది. ఖమ్మం వ్యవసాయ మార్కెట్ కార్యకలాపాలతోనే ఎక్కువగా ముడిపడి ఉన్న ఛాంబర్ ఆఫ్ కామర్స్ ఎన్నికలను పోటీదారులు అత్యంత ప్రతిష్టాత్మకంగా తీసుకుంటుంటారు. ఒక శాతం సెస్సు ద్వారా ఏటా రూ. 30.00 కోట్ల ఆదాయాన్ని సముపార్జించుకుంటున్న ఖమ్మం వ్యవసాయ మార్కెట్ ప్రాధాన్యత ఏమిటో అర్థం చేసుకోవచ్చు. సెస్సుల్లేని మరికొన్ని ఉత్పత్తుల లావాదేవీలు ఇందుకు అదనం కావడం గమనార్హం. దాదాపు అయిదు నుంచి ఆరు వేల కోట్ల రూపాయల వ్యవసాయ ఉత్పత్తుల క్రయ, విక్రయాల లావాదేవీలు ఏటా ఖమ్మం వ్యవసాయ మార్కెట్ లో జరుగుతుంటాయి. మిర్చి వ్యాపార లావాదేవీల్లో గుంటూరు మార్కెట్ తర్వాత స్థానాన్ని ఖమ్మం మార్కెట్ ఆక్రమించిందంటే ప్రాముఖ్యతను అవగతం చేసుకోవచ్చు.
ఇదీ చదవండి:
ఈ నేపథ్యంలో మొత్తం 1,305 మంది సభ్యులు గల ఖమ్మం ఛాంబర్ ఆఫ్ కామర్స్ ఎన్నికలు ఈసారి కూడా ఎప్పటిలాగే అత్యంత ప్రాముఖ్యతను, ప్రాధాన్యతను సంతరించుకున్నాయి. ఎన్నికల్లో పోటీ చేస్తున్న ప్యానెల్స్ విజయం కోసం ఎవరి ప్రయత్నాల్లో వారు నిమగ్నమయ్యారు. అయితే ఇందులో కొందరు పోటీదారులు తన పేరును ఉపయోగించుకుటుండడంపై మంత్రి తుమ్మల నాగేశ్వర్ రావు ఆగ్రహం వ్యక్తం చేశారు. ఛాంబర్ ఎన్నికల్లో తన పేరు చెప్పి కొందరు పోటీదారులు ప్రచారం చేయడాన్ని ఆయన ఖండించారు. ఏ యూనియన్ ఎన్నికల్లో కూడా తన నలబై ఏళ్ల రాజకీయ జీవితంలో ఏనాడూ జోక్యం చేసుకోలేదన్నారు. కార్మిక సంఘాలు, ట్రేడర్స్ యూనియన్ ఎన్నికలు పార్టీలకతీతంగా సభ్యులకు ఇష్టమొచ్చిన వారిని ఎన్నుకునే ప్రజాస్వామ్యం ఉండాలని మంత్రి తుమ్మల ఆకాంక్షించారు.
నవంబర్ 16వ తేదీన జరగనున్న ఖమ్మం ఛాంబర్ ఆఫ్ కామర్స్ ఎన్నికల్లో ఎవరికీ తాను బహిరంగ మద్దతు తెలుపలేదన్నారు. కొందరు పోటీదారులు తన పేరుతో ప్రచారం చేయడం పట్ల మంత్రి తుమ్మల ఆగ్రహం వ్యక్తం చేశారు. ఏ ప్యానెల్ ఎన్నికైనా వర్తక, వ్యాపార సంస్థలు, వ్యాపారులు ఖమ్మం అభివృద్ధిలో భాగస్వాములు కావాలన్నారు. ఎవరు యూనియన్ లో ఉన్నా అరాచకం, బెదిరింపులు లేకుండా ఖమ్మంలో ప్రశాంతంగా వాణిజ్య, వ్యాపార కార్యకలాపాలు జరిగేలా ప్రభుత్వం చర్యలు చేపడుతుందని మంత్రి తుమ్మల పేర్కొన్నారు. ఛాంబర్ ఆఫ్ కామర్స్ ఎన్నికల్లో ఏ వ్యాపారి కూడా తన పేరుతో ప్రచారం చేయవద్దని, ఎవ్వరినీ ప్రలోభ పెట్టొద్దన్నారు. ఇందుకు పాల్పడేవారిని గుర్తించి చర్యలు తీసుకునే విషయంలో రాజీ పడేది లేదని కూడా మంత్రి తుమ్మల హెచ్చరించడం గమనార్హం.
అయితే ఛాంబర్ ఎన్నికల వేళ తన పేరును ఉపయోగించుకుంటూ జరుగుతున్న ‘రాజకీయం’పై తుమ్మల ఆగ్రహించడానికి అనేక కారణాలు ఉన్నట్లు వ్యాపార వర్గాలు చెబుతున్నాయి. ముఖ్యంగా ఈ ఎన్నికల్లో పోటీ చేస్తున్న కొందరు తమను తాము ‘శిన్న మంత్రి’గా అభివర్ణించుకుంటూ, తాము చెబితే తుమ్మల చెప్పినట్లేనని ఓటు హక్కు గల వర్తకులపై బెదిరింపులకు దిగుతున్నారనే ఆరోపణలు ఉన్నాయి. ఇటువంటి వ్యవహారాలే కాదు, గడచిన కొన్ని సంవత్సరాలుగా కొన్ని ముఖ్యాంశాల్లో ఛాంబర్ నాయకులు వ్యవహరించిన తీరుపైనా వ్యాపార వర్గాల్లోనే విమర్శలున్నాయి. ముఖ్యంగా రూ. వందల కోట్ల అప్పులు చేసి తమ దుకాణపు షట్టర్ దించేస్తున్న ప్రముఖ వ్యాపారుల అంశంలో సైతం ఛాంబర్ సరైన రీతిలో వ్యవహరించడం లేదనేది ఆయా విమర్శల సారాంశం.
ముఖ్యంగా కొంత కాలం క్రితం ఛాంబర్ పాలకవర్గంలోని ఒకరి సోదరుని ఆత్మహత్య ఘటన, అప్పుల చెల్లింపుల్లో బాధితులకు న్యాయం చేసే అంశంలో ఇచ్చిన హామీ ఇప్పటికీ నెరవేరలేదనే విమర్శలు ఉన్నాయి. దాదాపు రూ. 40 కోట్ల అప్పులకు సంబంధించిన అప్పటి ఈ వ్యవహారంలో చేసిన ‘బాస’ను నెరవేర్చలేదనే వ్యాఖ్యలున్నాయి. అదేవిధంగా ఖమ్మం నగరంలోని ఓ ప్రముఖ వ్యాపారి ఏడాది క్రితం తన వ్యాపార సంస్థకు షట్టర్ దించేసి ఉడాయించిన ఉదంతం ఇప్పటికీ వివాదాస్పదంగానే ఉంది. దాదాపు రూ. 300 కోట్ల మేర అప్పులు చేసి, రుణదాతలను వంచించి, నిండా ముంచిన సదరు ప్రముఖ వ్యాపారి చెందిన అస్తులను తన ‘దళారీతనం’తో నగరానికి చెందిన ఓ వివాదాస్పద వ్యక్తి దక్కించుకుంటున్నట్లు ఆరోపణలు ఉన్నాయి. అటు ఐపీ దాఖలు చేయకుండా, ఇటు అప్పులు చెల్లించకుండా తన దళారీతనంతో ఆస్తులను దొడ్డిదారిన బదలాయించుకుంటున్నట్లు బాధితులు బావురుమంటున్నా సరే ఛాంబర్ తన విద్యుక్త ధర్మాన్ని నెరవేర్చలేదనే విమర్శలు ఉన్నాయి.
ఈ నేపథ్యంలోనే ఛాంబర్ ఆఫ్ కామర్స్ ఎన్నికల్లో తన పేరును కొందరు వాడుకుంటుండడంపై మంత్రి తుమ్మల ఆగ్రహం వ్యక్తం చేశారని వ్యాపార వర్గాలు చర్చించుకుంటున్నాయి. ఇదే దశలో తన మద్దతు కోసం వచ్చిన మరో వ్యాపారి అంశంలో కూడా డిప్యూటీ సీఎం మల్లు భట్టి విక్రమార్క స్పందించిన తీరును సైతం పలువురు వ్యాపారులు ఈ సందర్భంగా ప్రశంసిస్తుండడం విశేషం. వ్యాపార రంగంలోకి రాజకీయాన్ని జొప్పిస్తూ పబ్బం గడుపుకునేవారికి తాజా పరిణామాలు ఓ హెచ్చరికగా ఖమ్మం వర్తక, వాణిజ్య వర్గాలు అభివర్ణిస్తున్నాయి.
