ఖమ్మం: రెక్కలు ముక్కలు చేసుకుని కష్టపడిన సొమ్మును లక్షలు, లక్షలుగా ధారపోసి కార్పొరేట్ కాలేజీల్లో తమ పిల్లలను చేర్పించే విద్యార్థుల తల్లిదండ్రులకు కనువిప్పు కలిగించే ఘటన ఇది. ఒక్కరు కాదు, ఇద్దరు కాదు.. వందలాది మంది విద్యార్థులు రోడ్డెక్కి కార్పొరేట్ కళాశాల నిర్వాహకులు అందిస్తున్న ఆహారం నాణ్యతపై హాహాకారాలు చేసిన ఘటన ఖమ్మం నగరంలో తీవ్ర సంచలనం కలిగించింది. ఖమ్మం నగరంలో అనేక బ్రాంచ్ లతో గల శ్రీ చైతన్య విద్యా సంస్థకు చెందిన ఇంటర్ విద్యార్థులు తమకు అందిస్తున్న ఆహారం నాణ్యతపై నిన్న రోడ్లపైకి వచ్చి ర్యాలీలు నిర్వహించి నిరసనకు దిగిన ఘటన తీవ్ర కలకలం రేపింది.
వాస్తవానికి భోజనం నాణ్యతపై ప్రభుత్వం హాస్టళ్ల, గురుకుల పాఠశాల విద్యార్థులు ఇటువంటి కార్యక్రమాలు నిర్వహించడం తరచూ వార్తల్లో కనిపిస్తుంటుంది. కానీ లక్షలాది రూపాయల చొప్పున విద్యార్థుల నుంచి ఫీజులను వసూలు చేస్తున్న కార్పొరేట్ కళాశాలల యాజమాన్యాలే ఈ తరహా ఆరోపణలు ఎదుర్కోవడం గమనార్హం. ఖమ్మంలోని శ్రీచైతన్య విద్యా సంస్థకు చెందిన ఖానాపురంలోన వేదా బ్రాంచ్, వైరా రోడ్డలోని హర్ష బ్రాంచ్ లకు చెందిన విద్యార్థులు ఖాళీ ప్లేట్లతో రోడ్డెక్కారు.తమ బ్రాంచ్ ల నుంచి మెయిన్ క్యాంపస్ వరకు రోడ్ల వెంట ర్యాలీలు నిర్వహించారు.
తమకు నాణ్యమైన భోజనం అదించడం లేదని, నీళ్ల చారు, కుళ్లిన కూరలతో, రాళ్ల అన్నం పెడుతున్నారనేది విద్యార్థుల ప్రధాన ఆరోపణ. ఆహార నాణ్యతపై ప్రశ్నించినవారిని బెదిరిస్తున్నారని కూడా విద్యార్థులు ఆందోళన వ్యక్తం చేశారు. తమకు అందిస్తున్న ఆహారాన్ని పశువులు కూడా తినవని విద్యార్థులు వ్యాఖ్యానించారు. ఉదయం వేళ అందించే పొంగల్ లో రాళ్లు, కూరల్లో పురుగులు కూడా వస్తున్నాయని చెబుతున్నారు. ‘వియ్ వాంట్ జస్టిస్’ అంటూ విద్యనభ్యసించాల్సిన విద్యార్థులు రోడ్డెక్కి నినదించారంటే శ్రీ చైతన్య కళాశాలల నిర్వాహకులు అందిస్తున్న భోజనం క్వాలీటీ ఏమిటో అర్థం చేసుకోవచ్చు.
వాస్తవానికి శ్రీ చైతన్య విద్యా సంస్థలకు క్యాంపస్ ల వారీగా కాకుండా ఒకే చోట కిచెన్ ఉన్నట్లు ప్రభుత్వ నిఘా వర్గాలు చెబుతున్నాయి. ఆ ప్రాంతంలోనే వంట చేసి అన్ని బ్రాంచ్ లకు ఆటోల్లో, ఇతర వాహనాల్లో ఆహారాన్ని తరలిస్తుంటారని చెబుతున్నాయి. దీంతో ఏ బ్రాంచ్ లో చూసినా ఫుడ్ క్వాలిటీ ఒకే రకంగా ఉంటుందని సమాచారం. ఈ నేపథ్యంలోనే కేవలం హర్ష, వేద బ్రాంచ్ విద్యార్థులే కాదు, దాదాపు అన్ని బ్రాంచుల్లో చదివే విద్యార్థులు సైతం ఆహార నాణ్యతపై ఆందోళనగానే ఉన్నట్లు తెలుస్తోంది. కాకపోతే రెండు బ్రాంచ్ ల విద్యార్థులు మాత్రమే నిన్న ‘చైతన్యం’తో రోడ్లపైకి వచ్చి ర్యాలీలు నిర్వహించిన, నిరసన తెలుపుతూ ఆందోళనకు దిగారు.
ఎక్కడో చిన్న చిన్న టీ స్టాళ్లలో, బడ్డీ కొట్లలో ఆహారం రుచిగా, శుచిగా లేదని దాడులు నిర్వహించి,కేసులు నమోదు చేసే ఫుడ్ ఇన్స్పెక్టర్లు శ్రీచైతన్య విద్యా సంస్థల్లో అందించే నాసిరకం ఫుడ్డుపై ఏం చేస్తున్నారనే ప్రశ్నకు వస్తే.. కార్పొరేట్ కళాశాలల ఆహార నాణ్యతపై తనిఖీలు నిర్వహించే తీరిక వాళ్లకు ఉండకపోవచ్చనే వాదన ఈ సందర్భంగా వినిపిస్తోంది. ఎందుకంటే అది కార్పొరేట్ కళాశాల కాబట్టి.. ఇటువంటి బడా సంస్థల అంశంలో ఫుడ్ ఇన్స్పెక్టర్ల వైఖరి, వ్యవహార శైలిపై జనంలో గల సహజమైన అభిప్రాయాలే శ్రీచైతన్య విద్యా సంస్థకు చెందిన ఫుడ్ క్వాలిటీపైనా వ్యక్తమవుతున్నాయి. విద్యార్థులు రోడ్లపైకి వచ్చి ఆందోళన చేసినా సరే ఫుడ్ ఇన్స్పెక్టర్లకు తనిఖీలు చేయాలనే కనీస చైతన్యం కలగకపోతే అది వారి తప్పిదం కానే కాదనే వెటకరింపులు వినిపిస్తున్నాయి.
శ్రీ చైతన్య విద్యా సంస్థకు చెందిన వివిధ క్యాంపస్ ల విద్యార్థులు ఖమ్మం నగర వీధుల్లోకి వచ్చి ర్యాలీలు, నిరసనలు చేస్తున్న పరిస్థితుల్లో మధ్యలో కష్టం వచ్చింది ఎవరికంటే.. నగర పోలీసులకు అని చెప్పకతప్పదు. రోడ్లపైకి వచ్చిన విద్యార్థుల ఆందోళన సందర్భంగా వారికి వచ్చీపోయే వాహనాల వల్ల ఏ ఇబ్బందీ కలగకుండా పోలీసులు శ్రమించాల్సి వచ్చింది. ఇంత జరిగినా మెయిన్ స్ట్రీమ్ మీడియాలో విద్యార్థుల ఆందోళనకు సంబంధించిన వార్తలుగాని, ఫొటోలుగానీ ప్రచురితం కాలేదని మాత్రం ప్రశ్నించకండి. ఎందుకంటే కార్పొరేట్ కళాశాలల్లో వెలుగు చూసే ఇటువంటి ఘటనలపై మెయిన్ స్ట్రీమ్ మీడియాకు లక్షలాది రూపాయల ‘యాడ్స్’ రెవెన్యూ భయం ఉంటుందని తెలిసిందే. విద్యార్థుల ప్రయోజనం కన్నా ‘యాడ్స్’ రెవెన్యూ లబ్ధి మాత్రమే మెయిన్ స్ట్రీమ్ మీడియాకు ఇక్కడ ముఖ్యం.
ఫొటోలు: ఖమ్మం శ్రీ చైతన్య సంస్థలో చదువుతున్న ఇంటర్ విద్యార్థుల ఆందోళన దృ శ్యాలు
