హైదరాబాద్: జూబ్లీహిల్స్ ఉప ఎన్నికల్లో ఓడిపోయినప్పటి నుంచి బీఆర్ఎస్ పార్టీకి పగలే చుక్కలు కనిపిస్తున్నాయని, అందుకే ఆ పార్టీ వర్కింగ్ ప్రెసిడెంట్ కేటీఆర్ ఇష్టానుసారంగా మాట్లాడుతున్నారని తెలంగాణా ఐటీ శాఖ మంత్రి దుద్దిళ్ల శ్రీధర్ బాబు వ్యాఖ్యానించారు. రాష్ట్రంలో భారీ భూకుంభకోణం జరుగుతోందని కేటీఆర్ ఆరోపించిన సంగతి తెలిసిందే. ఏకంగా నాలుగు లక్షల కోట్ల విలువచేసే భూమిని కొల్లగొట్టేందుకు సీఎం రేవంత్ రెడ్డి ప్రభుత్వంలో కుట్ర జరుగుతోందని కేటీఆర్ చేసిన ఆరోపణలకు మంత్రి శ్రీధర్ బాబు కౌంటర్ ఇచ్చారు. ఈమేరకు సెక్రటేరియట్ లో శుక్రవారం శ్రీధర్ బాబు మీడియాతో మాట్లాడారు.
ఫ్రీ హోల్డ్, లీజ్ ల్యాండ్ మధ్య పొంతన లేకుండా కేటీఆర్ మాట్లాడారని శ్రీధర్ బాబు అన్నారు. అర్థవంతమైన చర్చ మొదలు పెడితే సమాధానం చెప్పవచ్చని, కానీ సత్యదూరమైన మాట్లాడడంలో కేటీఆర్ తర్వాతే ఎవరైనా.. అని ఆయన అన్నారు. కేటీఆర్ ఇష్టారాజ్యంగా మాట్లాడుతున్నారని మంత్రి అన్నారు. ప్రభుత్వ భూములకు సంబంధించి గత ప్రభుత్వం ఒక గ్రిడ్ పాలసీ తెచ్చిందని, అప్పుడు వాళ్లు చేసిన పనులన్నీ ఇప్పుడు బయటకు తీయాల్సి ఉందన్నారు. అప్పుడు కన్వర్షన్ ఫీజు తీసుకుని పాలసీ తెచ్చారని, మరి ఇందులో ఎన్ని లక్షల కోట్ల మతలబు ఉందో కేటీఆర్ చెప్పాలని శ్రీధర్ బాబు నిలదీశారు.
ఆనాడు ప్రభుత్వం ఏ నిర్ణయం తీసుకున్నా రాష్ట్ర గౌరవం గురించి ఆలోచించి భయాందోళనలు సృష్టించ లేదన్నారు. రాష్ట్రానికి పెట్టుబడులు రాకుండా ఆదాయ వనరులకు గండి పెట్టాలని బీఆర్ఎస్ చూస్తోందని శ్రీధర్ బాబు ఆరోపించారు. పరిశ్రమలు కావాల్సిన వారు ఫీజు కట్టుకుంటారని, చేసిన ఆరోపణలకు ఆధారాలు ఉంటే మాట్లాడాలన్నారు. కేటీఆర్ ప్రస్తావించిన పేర్లు గల వ్యక్తులు ప్రభుత్వంలో లేరని, ఎవరితో ఒప్పందం చేసుకున్నామో ఆధారాలు బయట పెట్టాలని, తాము ఎలాంటి చర్యలు తీసుకుంటామో చూడాలన్నారు.
తమ ప్రభుత్వం పెట్టుబడులు రావాలని, ఉపాధి అవకాశాలు పెంచాలని ఆలోచన చేస్తున్నదని, గ్లోబల్ సిటీ చేయాలనే తమ ఆలోచనలను అడ్డుకోవాలని బీఆర్ఎస్ చూస్తున్నదని శ్రీధర్ విమర్శించారు. కేటీఆర్ గాలి మాటలు మాట్లాడడం మానుకోవాలని హితవు చెప్పారు. గత ప్రభుత్వం ఆర్థిక ఆరాచకానికి పాల్పడిందని, కేటీఆర్ ఆలోచనలో మార్పు రావడం లేదని మంత్రి శ్రీధర్ బాబు పేర్కొన్నారు.
