ఖమ్మం: సైబర్ మోసాలపై ఖమ్మం పోలీస్ కమిషనర్ సునీల్ దత్ ఆదివారం కీలక ప్రకటన విడుదల చేశారు. సైబర్ మోసగాళ్లపట్ల అప్రమత్తంగా ఉండాలని ప్రజలకు సూచించారు. నకిలీ ఆన్ లైన్ ట్రేడింగ్ యాప్లు, వెబ్ సైట్లు రూపొందించి, తక్కువ పెట్టుబడితో అధిక లాభాలు వస్తాయని చెబుతూ పెట్టుబడిదారులను ఆకర్షించి సైబర్ మోసగాళ్లు మోసం చేస్తున్న నేపథ్యంలో ప్రజలు అప్రమత్తంగా ఉండాలన్నారు.
కొత్త కంపెనీ లేదా ప్రసిద్ధ సంస్థ పేరు మీద IPO (Initial Public Offering) వస్తుందంటూ, తక్కువ ధరలో షేర్లు అందుబాటులో ఉన్నాయని, ‘త్వరగా షేర్లు తీసుకుంటే ఎక్కువ లాభం వస్తుంది’ అంటూ వాట్సాప్. టెలిగ్రామ్, ఫేస్బుక్, ఇమెయిల్ ద్వారా లింక్ పంపుతారని చెప్పారు. ఇటువంటి వాగ్దానాలు చేసి డబ్బు బదిలీ చేయించుకుని మోసం చేశారని పలు ఫిర్యాదులు వస్తున్నాయని పోలీస్ కమిషనర్ పేర్కొన్నారు.
మోసగాళ్లు పెద్ద కంపెనీ IPO వచ్చిందని నమ్మదగిన ప్రకటనలు, నకిలీ వెబ్ సైట్ లు సృష్టిస్తారని చెప్పారు. ఆ లింక్ లేదా ఫారమ్ ద్వారా బ్యాంక్ అకౌంట్ వివరాలు, Aadhaar, PAN లేదా UPI ద్వారా చెల్లింపులు చేయమని చెబుతారని, డబ్బు బదిలీ చేసిన తర్వాత మోసగాళ్లు వెబ్ సైట్ మూసేసి మాయం అవుతారని హెచ్చరించారు. కొన్నిసార్లు నకిలీ షేర్ సర్టిఫికేట్లు లేదా రశీదులు కూడా పంపి మోసం చేస్తారన్నారు.
అందువల్ల ఇటువంటి అంశాల్లో ప్రజలు జాగ్రత్తలు తీసుకోవాలన్నారు. ఐపీవోలలో పెట్టుబడి పెట్టే ముందు SEBI లేదా NSE/BSE అధికారిక వెబ్ సైట్లలో ఆ కంపెనీ నిజంగా IPO నమోదు అయిందో లేదో ధృవీకరించుకోవాలన్నారు. సోషల్ మీడియా లేదా వ్యక్తిగత మెసేజ్ ల ద్వారా వచ్చిన IPO ఆఫర్లను నమ్మవద్దన్నారు. ఎవరైనా ముందుగా ‘అడ్వాన్స్ పేమెంట్’ లేదా ‘రిజిస్ట్రేషన్ ఫీజు’ అడిగితే డబ్బు పంపవద్దని సీపీ సునీల్ దత్ సూచించారు.
అదేవిధంగా తక్కువ పెట్టుబడితో లాభాలు వస్తాయని మోసగిస్తారని చెప్పారు. సోషల్ మీడియా, యూట్యూబ్ వీడియోలు, వాట్సాప్ గ్రూపులు లేదా టెలిగ్రామ్ ఛానెల్ ల ద్వారా ‘రోజుకు వేలల్లో లాభం’, ‘100% రిటర్న్’ అంటూ ప్రకటనలు చేస్తారని, మొదట యాప్ లేదా వెబ్ సైట్లో రిజిస్టర్ చేయమని చెబుతారన్నారు. చిన్న మొత్తంలో పెట్టుబడి పెట్టగానే కొంత లాభం చూపించి నమ్మకం కలిగిస్తారని, ఆ తరువాత పెద్ద పెట్టుబడి పెట్టాలని ప్రోత్సహిస్తారని పేర్కొన్నారు. విత్ డ్రా చేయాలంటే ‘ట్యాక్స్’, ‘సర్వీస్ ఛార్జ్’ పేరుతో డబ్బు అడుగుతారని, చివరికి వెబ్ సైట్ లేదా యాప్ యాక్సెస్ నిలిపివేసి, డబ్బుతో మాయమవుతారని వివరించారు.
ఇటువంటి అంశాల్లో ట్రేడింగ్ యాప్/వెబ్ సైట్ SEBI/RBI వద్ద రిజిస్టర్ అయిందా? లేదా? అని తప్పనిసరిగా చెక్ చేయాలన్నారు. గ్యారంటీడ్ రిటర్న్స్, డబుల్ మనీ అని చెప్పేవారిని నమ్మవద్దని, సోషల్ మీడియా ద్వారా వచ్చే నకిలీ యాప్లు లేదా వెబ్ సైట్ లను ఉపయోగించవద్దని, ఎవరైనా వీడియో కాల్, వాట్సాప్ లేదా మెసేజ్ ద్వారా పెట్టుబడి పెట్టాలని ఒత్తిడి చేస్తే వెంటనే కాల్ కట్ చేసి ఫిర్యాదు చేయాల్సిందిగా ఖమ్మం పోలీస్ కమిషనర్ సునీల్ దత్ ప్రజలకు సూచించారు.
