వాస్తవానికి ఈ అంశంలో వ్యవసాయ శాఖ మంత్రి తుమ్మల నాగేశ్వర్ రావు ‘పద్ధతి’ అభినందనీయం, ప్రశంసనీయం కూడా. ఉమ్మడి ఖమ్మం జిల్లాలో దశాబ్ధాల తన రాజకీయ జీవితంలో తన పద్ధతి తనదే. తనకంటూ ఓ శైలి., విశిష్టత ఉన్నాయి. రాజకీయంగా ఆయన అనుసరిస్తున్న పద్ధతి మంచిదే కావచ్చు.. కానీ ఇప్పుడున్న పరిస్థితుల్లో తేడా కొడితే ఎలా? ఇదీ ఇప్పుడు ఖమ్మం నియోజకవర్గంలో జరుగుతున్న అసలు రాజకీయ చర్చ. ఇంతకీ విషయం ఏమిటంటే..?
వాణిజ్య, వ్యాపార రంగంలో అత్యంత ప్రతిష్టాత్మకంగా భావిస్తున్న ఖమ్మం ఛాంబర్ ఆఫ్ కామర్స్ పాలకవర్గానికి ఈనెల 16వ తేదీన ఎన్నికలు జరుగుతున్నాయి. ఈ ఎన్నికల్లో పలువురు వ్యాపార ప్రముఖులు వివిధ పదవులకు పోటీ పడుతున్నారు. అధ్యక్ష, ప్రధాన కార్యదర్శి పదవులకు హోరాహోరీ పోరు జరుగుతోంది. ఒక్క ముక్కలో చెప్పాలంటే హైదరాబాద్ జూబ్లీ హిల్స్ ఉప ఎన్నికల ప్రచారానికి తీసిపోని విధంగా ఖమ్మం ఛాంబర్ ఆప్ కామర్స్ ఎన్నికల ప్రచారం సాగుతోందంటే అతిశయోక్తి కాదు. ఆత్మీయ సమ్మేళనాలు, స్థానిక టూ స్టార్ హోటల్స్ లో భేటీలు, ఛీర్ పార్టీలు.. ఇదీ స్థూలంగా ఛాంబర్ ఎన్నికల ప్రచారంలో ఓ ఆసక్తికర దృశ్యం. కేవలం 1,305 మంది సభ్యులు ఓటర్లుగా ఉన్నటువంటి ఛాంబర్ ఎన్నికల్లో గెలుపుకోసం పోటీదాదారులు ఇంతగా శ్రమిస్తున్నారంటే దానికి గల ప్రాముఖ్యతను, ప్రాధాన్యతను అర్థం చేసుకోవచ్చు.
అయితే ఖమ్మం ఖమ్మం ఛాంబర్ ఆఫ్ కామర్స్ ఎన్నికల్లో ‘రాజకీయం’ ఉండకూడదనే ఉద్ధేశంతో తుమ్మల నాగేశ్వర్ రావు ఇటీవల ఓ కీలక పత్రికా ప్రకటన జారీ చేశారు. తన నలభై ఏళ్ల రాజకీయ జీవితంలో ఏనాడూ ఇటువంటి యూనియన్ల ఎన్నికల్లో జోక్యం చేసుకోలేదని, కార్మిక సంఘాలు, ట్రేడర్స్ యూనియన్ ఎన్నికలు పార్టీలకతీతంగా, సభ్యులకు ఇష్టమొచ్చినవారిని ఎన్నుకునే ప్రజాస్వామ్యం ఉండాలని మంత్రి తుమ్మల నాగేశ్వర్ రావు అభిలషించారు. అందువల్ల ఈ ఎన్నికల్లో తన పేరును ఎక్కడా, ఎవరూ వాడుకోరాదని, ఒకకవేళ ఇందుకు విరుద్ధంగా వ్యవహరిస్తే గుర్తించి చర్యలు తీసుకునేందుకు కూడా రాజీపడేది లేదని తుమ్మల హెచ్చరించారు.
ఇదీ చదవండి:
ఈ నేపథ్యంలోనే తుమ్మల తన ప్రకటనలో మరో కీలక అంశాన్ని కూడా ప్రస్తావించారు. ఖమ్మంలో ప్రశాంతంగా వాణిజ్య, వ్యాపార కార్యకలాపాలు జరిగేలా ప్రభుత్వం చర్యలు చేపడుతుందని కూడా స్పష్టం చేశారు. వాస్తవానికి గత అసెంబ్లీ ఎన్నికల సందర్భంగా కూడా తుమ్మల నాగేశ్వర్ రావు ‘ఖమ్మంలో ప్రశాంతత’ ప్రామాణికంగా ప్రచారం నిర్వహించారు. ఫలితంగానే రికార్డు స్థాయిలో 49,381 ఓట్ల ఆధిక్యతతో తుమ్మలను ఖమ్మం నియోజకవర్గ ప్రజలు గెలిపించారు. ఖమ్మం అసెంబ్లీ నియోజకవర్గ చరిత్రలోనే ఇంత భారీ ఆధిక్యతతో విజయాన్ని దక్కించుకున్న రాజకీయ నేతలెవరూ గతంలో లేరనే చెప్పాలి. నియోజకవర్గ వ్యాప్తంగా వచ్చిన ఆయా మొత్తం ఆధిక్యతలో 99 శాతం ఖమ్మం నగరంలోనే తుమ్మలకు లభించడం గమనార్హం. నియోజకవర్గంలో గల ఏకైక మండలం రఘునాథపాలెంలో స్వల్పంగా కేవలం మూడు వేల లోపు ఓట్ల ఆధిక్యత మాత్రమే తుమ్మలకు వచ్చింది. మిగతా మెజారిటీ మొత్తం ఖమ్మం నగరంలోనే దక్కింది.
అప్పటి ఎన్నికల ప్రస్తావన ఛాంబర్ ఎన్నికల నేపథ్యంలో ఎందుకనే ప్రశ్నకు వస్తే.. తుమ్మల నినదించిన ‘ప్రశాంత ఖమ్మం’ వాతావరణం కోసమే నగర ప్రజలు తపించి తీర్పు ఇచ్చారనేది సుస్పష్టం. కేవలం నగర ప్రజలే కాదు, ఖమ్మం నియోజకవర్గంలో ఎన్నికల ఫలితాలను తారుమారు చేయగలిగే నగర వర్తక, వ్యాపారులు సైతం మొన్నటి ఎన్నికల్లో తుమ్మల నినదించిన ‘ప్రశాంత ఖమ్మం’ కోసమే తమదైన శైలిలో పావులు కదిపారనేది బహిరంగ రహస్యం. ఈ నేపథ్యంలోనే ఖమ్మం ఛాంబర్ ఆఫ్ కామర్స్ ఎన్నికలు జరుగుతున్నాయి. అయితే ఈ ఎన్నికల్లో తుమ్మల కోరుకున్న ‘ప్రశాంత ఖమ్మం’ కోసం పాటుపడిన వ్యాపారులు మత్రమే విజయం సాధించాలనే డిమాండ్ వర్తక వర్గాల్లోనే వినిపిస్తుండం గమనార్హం. ఇందుకు విరుద్ధంగా జరిగితే మూడేళ్ల తర్వాత రాజకీయ పరిస్థితులు కూడా తుమ్మలకు వ్యతిరేకంగా తిరగబడే అవకాశం లేకపోలేదని ఆ వర్గాలు ప్రస్తావిస్తున్నాయి.
ఎందుకంటే ఖమ్మం నియోజకవర్గంలో రాజకీయాన్ని శాసించగలిగే ముఖ్య వర్గాల్లో ఖమ్మం ఛాంబర్ ఆఫ్ కామర్స్ కు చెందిన వ్యాపారులదీ ప్రముఖ పాత్రే. ‘ప్రశాంత ఖమ్మం’ నినాదానికి వ్యతిరేకంగా ఛాంబర్ ఎన్నికల్లో ఫలితాలు వస్తే అది మున్ముందు తుమ్మల నాగేశ్వర్ రావు లేదా ఆయన తనయుడు యుగంధర్ రాజకీయ అడుగులకు కూడా ప్రతికూలంగా మారే అవకాశాలు లేకపోలేదనే వ్యాఖ్యలు ఈ సందర్భంగా పరిశీలకుల నుంచి వినిపిస్తున్నాయి. దీంతో ‘ప్రశాంత ఖమ్మం’ ప్రామాణికంగా తుమ్మల తన ‘పద్ధతి’కి భంగం కలగకుండా యోచిస్తారనే అభిప్రాయాన్ని వర్తక, వ్యాపార వర్గాలు వ్యక్తం చేస్తుండడం గమనార్హం. ఛాంబర్ ఎన్నికల్లో ‘రాజకీయం’ తగదనే తుమ్మల అభీష్టం అభినందనీయమే అయినప్పటికీ, అది మున్ముందు, ముఖ్యంగా వచ్చే ఎన్నికలనాటికి ప్రత్యర్థికి అనుకూలంగా రాజకీయ ‘రంగు’ పులుముకునేందుకు దారి తీయవద్దన్నదే ఖమ్మం నగర వర్తక, వ్యాపార వర్గాల ఆకాంక్ష.
✍ ఎడమ సమ్మిరెడ్డి
