Monday, December 1, 2025

Top 5 This Week

Related Posts

ఎన్కౌంటర్ లో ఎస్ఐ మృతి

భోపాల్: మధ్యప్రదేశ్- ఛత్తీస్ గఢ్-మహారాష్ట్ర ట్రై జంక్షన్ లో మావోయిస్టు నక్సలైట్లకు, పోలీసులకు మధ్య జరిగిన ఎదురుకాల్పుల్లో ఎస్ఐ ఆశిష్ శర్మ మృతి చెందారు. వరుస ఎన్కౌంటర్లు, లొంగుబాట్ల పరిణామాల్లో మావోయిస్ట్ పార్టీ ఉనికికే ప్రమాదం ఏర్పడిందని భావిస్తున్న పరిస్థితుల్లో నక్సలైట్లు జరిపిన కాల్పుల్లో ఓ పోలీస్ అధికారి ప్రాణాలు కోల్పోవడం గమనార్హం. మధ్యప్రదేశ్ లోని ఎలైట్ యాంటీ మావోయిస్ట్ యూనిట్ కు ఈ ఘటన ఎదురుదెబ్బగా జాతీయ మీడియా సంస్థలు నివేదిస్తున్నాయి. వాస్తవానికి ఈ ఘటన బుధవారం జరిగినప్పటికీ, గత రాత్రి ఆలస్యంగా సమాచారం వెలుగులోకి వచ్చింది.

బుధవారం ఉదయం 8.30 గంటల ప్రాంతంలో నక్సల్స్ ఏరివేత చర్యల్లో భాగంగా హాక్ ఫోర్స్ పోలీస్ టీం దట్టమైన అడవుల నుంచి ముందుకు ప్రయాణిస్తుండగా, అకస్మాత్తుగా కాల్పులు జరిగాయి. యాంటి నక్సల్ ఆపరేషన్ చర్యలో ముందున్న ఎస్ఐ ఆశిష్ శర్మ తన టీంతో వెంటనే అప్రమత్తమై ఎదురుకాల్పులు ప్రారంభించారు. అయితే ఈ ఘటనలో నక్సల్స్ జరిపిన కాల్పుల్లో తొడ, పొట్టలో బుల్లెట్లు తగిలిన కారణంగా తీవ్రంగా గాయపడిన ఆశిష్ శర్మను ఛత్తీస్ గఢ్ లోని రాజ్ నంద్ గావ్ జిల్లాలోని ఢోంగర్ గఢ్ కమ్యూనిటీ హెల్త్ సెంటర్ కు తరలించారు. అతన్ని కాపాడేందుకు వైద్యులు చేసిన ప్రయత్నాలు ఫలించలేదు. రక్తస్రావం తీవ్రం కావడంతో ఎస్ఐ ఆశిష్ శర్మ ప్రాణాలు కోల్పోయారు.

నక్సల్స్ ఏరివేత చర్యల్లో ప్రసిద్ధి గాంచిన హాక్ ఫోర్స్ లోని అత్యంత ప్రతిభావంతమైన అధికారిగా ఎస్ఐ ఆశిష్ శర్మకు పేరుంది. విధినిర్వహణలో ప్రతిభను చాటినందుకు ప్రభుత్వం నుంచి ఆయన రెండుసార్లు శౌర్య పతకాలను కూడా స్వీకరించారు. నక్సల్స్ కాల్పుల్లో తీవ్రంగా గాయపడిన ఆశిష్ శర్మను కాపాడేందుకు తాము శతవిధాలుగా ప్రయత్నించామని, ఎయిర్ అంబులెన్స్ ను కూడా ఏర్పాటు చేశామని యాంటీ మావోయిస్ట్ ఆపరేషన్స్ స్పెషల్ డీజీ పంకజ్ శ్రీవాస్తవ జాతీయ మీడియా సంస్థలతో చెప్పారు.

కాగా ఆశిష్ శర్మ వివాహ నిశ్చితార్థం ఇటీవలే జరిగింది. వచ్చే జనవరిలో పెళ్లికి ఏర్పాట్లు జరుగుతున్న పరిస్థితుల్లో ఈ ఘటన శర్మ కుటుంబంలో తీవ్ర విషాదాన్ని నింపింది. నక్సల్స్ కాల్పుల్లో ఆశిష్ శర్మ ప్రాణాలు కోల్పోవడంపట్ల మధ్యప్రదేశ్ సీఎం డా. మోహన్ యాాదవ్ విచారం వ్యక్తం చేశారు. నక్సల్స్ ఏరివేతలో శర్మ చూపిన తెగువను, ధైర్యసాహసాలను గుర్తు చేస్తూ ఎక్స్ లో సంతాపం తెలిపారు.

Popular Articles