హైదరాబాద్: ప్రముఖ కవి అందెశ్రీ ఆకస్మిక మరణంపై గాంధీ హాస్పిటల్ వైద్య వర్గాలు క్లారిటీ ఇచ్చాయి. గుండెపోటువల్ల అందెశ్రీ ప్రాణాలు కోల్పోయినట్లు గాంధీ ఆసుపత్రికి చెందిన డాక్టర్ సునీల్ కుమార్ మీడియాకు వెల్లడించారు. తీవ్ర అస్వస్థతకు గురైన అందెశ్రీని ఉదయం 7.20 గంటలకు కుటుంబ సభ్యులు గాంధీ ఆసుపత్రికి తీసుకువచ్చారని, అయితే అప్పటికే ఆయన చనిపోయారని చెప్పారు. తమ ఆసుపత్రికి తీసుకువచ్చేసరికే ఆయన ప్రాణాలు కోల్పోయి 5-6 గంటలు గడిచినట్లు చెప్పారు.
వాస్తవానికి అందెశ్రీకి గత కొన్నేళ్లుగా బీపీ ఉందని, బీపీ నియంత్రణ కోసం నిర్దేశించిన టాబ్లెట్లలను అందెశ్రీ గడచిన నెల రోజులగా వాడడం లేదని తెలిసిందని డాక్టర్ సునీల్ కుమార్ చెప్పారు. ఆరోగ్యం విషయంలో అందెశ్రీ నిర్లక్ష్యం చేశారని, మూడు రోజులగా ఆయన ఆయాసంతో బాధపడుతున్నారని చెప్పారు. గత రాత్రి భోజనం చేశాక మామూలుగానే ఆయన పడుకున్నారని, ఉదయం 6.20 గంటల ప్రాతంలో కుటుంబ సభ్యులు లేచి చూసేసరికి ఆయన బాత్ రూం వద్ద పడిపోయి ఉన్నారని తెలిపారు. మూడు రోజులుగా అనారోగ్యంతో ఉన్నప్పటికీ అందెశ్రీ వైద్యున్ని సంప్రదించలేదని డాక్టర్ సునీల్ కుమార్ వివరించారు.
