ఛత్తీస్ గఢ్: మోస్ట్ వాంటెడ్ మావోయిస్ట్ లీడర్ మడ్వి హిడ్మా నివాసానికి ఛత్తీస్ గఢ్ డిప్యూటీ సీఎం విజయ్ శర్మ వెళ్లారు. హోం మంత్రిత్వ శాఖను నిర్వహిస్తున్న డిప్యూటీ సీఎం విజయ్ శర్మ రాజధాని రాయపూర్ కు 530 కిలోమీటర్ల దూరంలో గల నక్సల్ నేత హిడ్మా ఇంటికి వెళ్లి అతని తల్లితో మాట్లాడారు. కుంట బ్లాక్ లోని సుక్మా జిల్లాలో గల హిడ్మా స్వగ్రామమైన పువర్తికి వెళ్లిన హోం మంత్రి విజయ్ శర్మ మరో నక్సల్ లీడర్ దేవా తల్లిని కూడా ఇక్కడే కలిసి మాట్లాడారు.
హిడ్మా ప్రస్తుతం మావోయిస్ట్ పార్టీ కేంద్ర కమిటీ సభ్యునిగా వ్యవహరిస్తున్నారు. హిడ్మా స్థానంలో బెటాలియన్ నంబర్ – 1 కమాండర్ గా దేవా నియమితులయ్యారు. ఈ ఇద్దరు నక్సల్ లీడర్ల నాయకత్వంలో మావోయిస్ట్ పార్టీ బస్తర్ ఏరియాలో బలమైన ఆర్మీ కేడర్ ను కలిగి ఉన్నట్లు పోలీసులు భావిస్తున్నారు. దక్షిణ బస్తర్ లోని అనేక ప్రాంతాల్లో పోలీసులపై ప్రాణాంతక దాడుల నిర్వహణలో బెటాలియన్ నెంబర్ – 1 కీలక పాత్ర పోషించినట్లు పోలీసు నివేదికలు ఉన్నాయి. హిడ్మాతో పాటు దేవా కూడా పువర్తి గ్రామానికి చెందిన మావోయిస్ట్ నేతలే కావడం గమనార్హం.
ఈ నేపథ్యంలోనే ఛత్తీస్ గఢ్ హోం మంత్రి విజయ్ శర్మ పువర్తి గ్రామానికి వెళ్లి హిడ్మా, దేవాల తల్లులతో కలిసి భోజనం చేశారు. హిడ్మా, దేవాలను ప్రభుత్వానికి లొంగిపోవాలని చెప్పాల్సిందిగా విజయ్ శర్మ ఆ ఇద్దరు తల్లులను కోరారు. వచ్చే మార్చి నెలాఖరునాటికి మావోయిస్ట్ రహిత దేశంగా ప్రకటించేందుకు ప్రభుత్వం కార్యాచరణను అమలు చేస్తోందని, అందువల్ల ప్రభుత్వానికి లొంగిపోవాలని సూచించాల్సిందిగా ఆయన కోరారు. హిడ్మా లొంగుబాటను ఆశ్రయిస్తే సాయుధపరంగా మావోయిస్ట్ పార్టీని దాదాపుగా నిలువరించినట్లేనని అక్కడి పాలకవర్గాలు భావిస్తున్నట్లు సమాచారం.
