ఛత్తీస్ గఢ్: ఇంద్రావతి నేషనల్ పార్క్ అడవుల్లో మంగళవారం జరిగిన తాజా ఎన్కౌంటర్ ఘటనపై ఛత్తీస్ గఢ్ సీఎం విష్ణు దేవ్ సాయి కీలక వ్యాఖ్యలు చేశారు. నిన్నటి ఈ ఎన్కౌంటర్ లో ఆరుగురు మావోయిస్ట్ నక్సలైట్లు మరణించిన సంగతి తెలిసిందే. మృతుల్లో మద్దేడు ఏరియా కమిటీ ఇంఛార్జి బుచ్చన్న, మోస్ట్ వాంటెట్ మావోయిస్ట్ కమాండర్ పాపారావు భార్య ఊర్మిళ తదితరులు ఉన్నట్లు వస్తున్నవార్తలు ధ్రువపడాల్సి ఉంది. ఎన్కౌంటర్ లో చనిపోయినవారిని గుర్తించే ప్రక్రియ సాగుతోందని బస్తర్ ఐజీ సుందర్ రాజ్ ప్రకటించారు.
ఈ నేపథ్యంలోనే తాజా ఎన్కౌంటర్ పై ఛత్తీస్ గఢ్ సీఎం విష్ణు దేవ్ సాయి తన ‘ఎక్స్’ ఖాతాలో కీలక వ్యాఖ్యలు చేశారు. వామపక్ష తీవ్రవాదానికి వ్యతిరేకంగా ప్రచారం సాగుతోందని, నక్సలిజం అంతమవుతోందని, ముగింపు దశకు చేరుకుందని విష్ణు దేవ్ సాయి అన్నారు. బీజాపూర్ లో డీఆర్జీ, ఎస్టీఎఫ్ జాయింట్ గా నిర్వహించిన ఆపరేషన్ లో ఇప్పటి వరకు ఆరుగురు నక్సలైట్లు హతమైనట్లు పేర్కొన్నారు.
వామపక్ష తీవ్రవాదాన్ని పూర్తిగా నిర్మూలించడంలో భద్రతా దళాలు సాధించిన పెద్ద విజయంగా సీఎం ఎన్కౌంటర్ ఘటనను అభివర్ణించారు. భద్రతా బలగాల ధైర్యానికి సెల్యూట్ చేస్తున్నాని, వచ్చే మార్చి నెలాఖరునాటికి నక్సలిజాన్ని అంతం చేయాలనే ప్రధాని నరేంద్ర మోదీ, కేంద్ర హోం మంత్రి అమిత్ షాల సంకల్పాన్ని నెరవేర్చడంలో తాము విజయం సాధిస్తున్నట్లు ఛత్తీస్ గఢ్ సీఎం పేర్కొన్నారు.
