హైదరాబాద్: చోరీకి గురైన సొత్తును పోలీసులు రికవరీ చేస్తారు. దొంగల నుంచి స్వాధీనం చేసుకున్న సొత్తును బాధితులకు అందిస్తారు. దోపిడీ, దొంగతనాల కేసుల్లో ఇదీ పోలీసుల విధినిర్వహణ. కానీ అంబర్ పేట క్రైం ఎస్ఐ భాను ప్రకాష్ స్టైలే వేరు. ఆ ఎస్ఐ వ్యవహార శైలి ఇప్పుడు హైదరాబాద్ పోలీస్ కమిషనరేట్ పోలీస్ వర్గాల్లో తీవ్ర కలకలం రేపుతోంది. ఇంతకీ అతనేం చేశాడంటారా? అయితే చదవండి.. ఈ ఎస్ఐ సంచలన ‘క్రైం’ స్టోరీ.
అంబర్ పేట్ పోలీస్ స్టేషన్ లో క్రైం విబాగంలో విధులు నిర్వహించే చూసే ఎస్ఐ భాను ప్రకాష్ ఓ చోరీ ఘటనలో నాలుగు తులా బంగారాన్ని నొక్కేసినట్లు అధికారులు గుర్తించారు. చోరీ ఘటనను డిటెక్ట్ చేయాల్సిన ఎస్ఐ దోపిడీ దొంగల నుంచి స్వాధీనం చేసుకున్న చోరీ సొత్తులోని నాలుగు తులాల బంగారాన్ని నొక్కేశాడనేది ప్రధాన ఆరోపణ. బంగారాన్ని నొక్కేసినపుడు కేసును కూడా తెలివిగా క్లోజ్ చేసినట్లు అధికారులు గుర్తించారు.
స్వాధీనం చేసుకున్న బంగారాన్ని బాధితులకు చట్టప్రకారం అప్పగించకుండా, మీ బంగారం మీకు అప్పగిస్తానని చెప్పి లోక్ అదాలత్ లో కేసును క్లోజ్ చేయించాడట. ఆ తర్వాత నొక్కేసిన నాలుగు తులాల బంగారాన్ని అమ్మేసుకున్నట్లు అధికారులు గుర్తించారు. దీంతో ఎస్ఐ భానుప్రకాష్ పై కేసు నమోదు చేసినట్లు సమాచారం. అంతేకాదు దొంగ బంగారాన్ని నొక్కేశాడనే అభియోగంపై ఉన్నాధికారులు ఎస్ఐ భానుప్రకాష్ పై సస్పెన్షన్ వేటు కూడా వేశారు. ఎస్ఐ ‘కత’ ఇంకా సమాప్తం కాలేదు.
ఎస్ఐ భానుప్రకాష్ సారువారి మరో నిర్వాకం కూడా హైదరాబాద్ పోలీస్ శాఖలో సంచలన చర్చకు దారి తీసింది. విధినిర్వహణ కోసం, ఆత్మరక్షణకోసం ప్రభుత్వం అప్పగించిన 9MM పిస్టల్ కూడా ఎస్ఐ భాను ప్రకాష్ ఎక్కడో పారేసుకున్నాడట. అలా..ఎలా పారేసుకుంటాడు.. అనుకుంటున్నారా? ఎస్ఐ భాను ప్రకాష్ వద్ద అధికారికంగా ఉండాల్సిన 9MM పిస్టల్ కనిపించడం లేదన్నది వాస్తవం. ఇంతకీ పిస్టల్ ఏమైందంటారా?
సస్పెన్షన్ వేటు పడిన తర్వాత ఎస్ఐ భాను ప్రకాష్ ఇటీవల అంబర్ పేట్ పీఎస్ కు వచ్చాడట. తనకు ఏపీలో గ్రూప్-2 ఉద్యోగం వచ్చిందని, ఇక తాను ఇక్కడి నుంచి వెళ్ళిపోతాననని, ఏపీలోనే ఉద్యోగంలో చేరుతానని చెప్పాడట. స్టేషన్ లో తన వస్తువులను తీసుకోవడానికి వచ్చానని చెప్పిన ఎస్ఐ భానుప్రకాష్ ఆ తర్వాత స్టేషన్ ఇన్ స్పెక్టర్ వద్దకు వెళ్ళి తన టేబుల్ సొరుగులో పెట్టిన 9MM పిస్టల్ కనపడడం లేదని, కొంచెం సీసీ టీవీ కెమెరాల ఫుటేజీని పరిశీలించాలని కోరాడట.
దీంతో ఒక్కసారిగా పోలీసు ఉన్నతాధికారుల్లో తీవ్ర కలకలం. పోలీసు స్టేషన్ ఉన్నతాధికారుల సమక్షంలో టేబుల్ డ్రాయర్ లో వెతకగా బుల్లెట్లు మాత్రమే దొరికాయట. కానీ పిస్టల్ దొరకలేదట. పిస్టల్ మిస్సయిన ఘటనపై ఉన్నతాధికారులకు సమాచారం ఇచ్చి భాను ప్రకాష్ ను టాస్క్ ఫో ర్స్ పోలీసులు అదుపులోకి తీసుకుని విచారిస్తున్నట్లు సమాచారం. అయితే సీసీ కెమెరాలను పరిశీలించినపుడు దొంగల నుంచి రికవరీ చేసిన 4 తులాల బంగారం ఆభరణాలను డ్రాయర్ లో పెట్టి, ఆ తర్వాత వాటిని భానుప్రకాష్ తీసుకెళ్ళిన దృశ్యాలు పోలీసులకు కనిపించినట్లు తెలుస్తోంది.
మొత్తంగా అటు దొంగ బంగారం నొక్కేసినట్లు ఆరోపణలు ఎదుర్కుని, సస్పెన్షన్ కు గురైన ఎస్ఐ భాను ప్రకాష్ తన సర్వీస్ పిస్టల్ ను కూడా పోగొట్టుకున్నట్లు తెలుస్తున్న సమాచారం హైదరాబాద్ పోలీస్ కమిషనరేట్ లోనే కాదు, రాష్ట్ర పోలీస్ శాఖలోనే తీవ్ర సంచలనానికి దారి తీసింది. ఎస్ఐ భాను ప్రకాష్ మాత్రం పిస్టల్ గురించి తనకు తెలియదని, టేబుల్ డ్రాయర్ లోనే పెట్టానని విచారిస్తున్న అధికారులకు వివరిస్తున్నట్లు తెలిసింది. ఏ విషయాన్ని పోలీసులు అధికారికంగా ధ్రువీకరించడం లేదు. మిస్సయినట్లు భావిస్తున్న 9MM పిస్టల్ దొరికిన తర్వాతే అధికారులు మీడియా ముందుకు వచ్చే అవకాశం ఉందంటున్నారు.
