విజయవాడ: ఆంధప్రదేశ్ లోని ఐదు జిల్లాల్లో యాభై మంది మావోయిస్టు పార్టీ నక్సలైట్లు అరెస్టయ్యారు. ఎన్టీఆర్, కాకినాడ, ఏలూరు, కోనసీమ, కృష్ణా జిల్లాలో వీరిని అరెస్ట్ చేసినట్లు ఏపీ ఇంటెలిజెన్స్ అదనపు డీజీపీ మహేష్ చంద్ర లడ్హా బుధవారం మీడియా సమావేశంలో ప్రకటించారు. అరెస్ట్ చేసిన నక్సలైట్లలో ముగ్గురు స్పెషల్ జోనల్ కమిటీ సభ్యులు, ఐదుగురు డివిజనల్ కమిటీ సభ్యులు, 19 మంది ఏరియా కమిటీ సభ్యులు, 23 మంది సాధారణ సభ్యులు ఉన్నట్లు తెలిపారు. వీరి వద్ద నుంచి 45 ఆయుధాలను, 272 తుపాకీ గుళ్లను, ఇతరత్రా సామాగ్రిని స్వాధీనం చేసుకున్నట్లు చెప్పారు. హిడ్మా దళానికి చెందిన 27 మందితోపాటు సౌత్ బస్తర్ ఏరియా నుంచి, స్థానిక కేడర్ సహా అరెస్టయివాళ్లందరూ ఛత్తీస్ గఢ్ రాష్ట్రానికి చెందినవారేనని ఏడీజీ లడ్హా తెలిపారు.
నిన్నటి ఎన్కౌంటర్ ఘటనలో అగ్రనేత హిడ్మాను పట్టుకుని కాల్చి చంపారనే ఆరోపణలను మహేష్ చంద్ర లడ్హా తోసిపుచ్చారు. ఎన్కౌంటర్ లోనే హిడ్మా చనిపోయినట్లు స్పస్టం చేశారు. ఎన్కౌంటర్ పై పౌర హక్కుల సంఘం చేసిన ఆరోపణల్లో పస లేదన్నారు. వాళ్ల పని వాళ్లు చేస్తుంటారు, మా డ్యూటీ మేం చేస్తుంటామని ఏడీజీ లడ్హా అన్నారు. నిన్న వేర్వేరు జిల్లాల్లో అత్యంత విజయవంతంగా నక్సలైట్లను అరెస్ట్ చేశామన్నారు. ఎవరికీ ప్రాణనష్టం కలగకుండా విధులు నిర్వహించిన పోలీసులను అభినందిస్తున్నట్లు చెప్పారు. విలేకరుల సమావేశంలో ఎన్టీఆర్, కాకినాడ, ఏలూరు, కోనసీమ, కృష్ణా జిల్లాల ఎస్పీలు కూడా పాల్గొన్నారు.
