విజయవాడ: మావోయిస్ట్ పార్టీకి భారీ షాక్.. ఆ పార్టీ సెంట్రల్ కమిటీ సభ్యుడు మడివి హిడ్మా దంపతులు సహా ఆరుగురు నక్సలైట్లు మారేడుమిల్లి ఎన్కౌంటర్ ఘటనలో మరణించిన సంగతి తెలిసిందే. ఈ సంఘన నేపథ్యంలో ఆంధ్రప్రదేశ్ రాష్ట్రంలోని విజయవాడ, కాకినాడ నగరాల్లో 31 మంది మావోయిస్ట్ నక్సలైట్లను పోలీసులు అరెస్ట్ చేశారు.
వీరిలో మావోయిస్ట్ పార్టీ కేంద్ర కమిటీ సభ్యుడు దేవ్ జీ సెక్యూరిటీ టీంకు సంబంధించిన తొమ్మిది మంది మావోయిస్టులు కూడా ఉన్నట్లు ఏపీ అదనపు డీజీ మహేష్ చంద్ర లడ్హా మీడియాకు వెల్లడించారు. పూర్తి వివరాలను సంబంధిత జిల్లాల ఎస్పీలు ప్రకటిస్తారని కూడా ఆయన చెప్పారు. హిడ్మా ఎన్కౌంటర్ ఘటన నేపథ్యంలోనే ఏపీలో 31 మంది నక్సలైట్లు అరెస్టయిన ఉదంతం పెను సంచలనంగా మారింది. కాగా అరెస్టయిన మొత్తం నక్సల్స్ లో నలుగురు కీలక నేతలు ఉన్నట్లు తెలుస్తున్న సమాచారం ధ్రువపడాల్సి ఉంది.
