ఔను.. నేను సోషలిస్టునేనని తొడగొట్టి మరీ చెప్పాడతను.. వామపక్షవాదినేనని స్పష్టం చేశారు. అతన్ని ఓడించడానికి అంతటి అమెరికా అధ్యక్షుడు ట్రంప్ రంగంలోకి దిగినా ప్రయోజనం లేకపోయింది. రిపబ్లిక్ నేతలు ఎన్ని విధాలుగా ప్రయత్నించినా అతని విజయాన్ని నిలువరించలేకపోయారు. అతను గెలిస్తే న్యూయార్స్ నగరానికి ఫెడరల్ సాయం ఆపేస్తానని కూడా ట్రంప్ హెచ్చరించారు. యూదుల వ్యతిరేకిగానూ అతనిపై ఆరోపణలు గుప్పించారు. వీటన్నింటికీ అతనేమీ వెరవలేదు. అడుగు వెనక్కి వేయలేదు. అగ్రరాజ్య అధ్యక్షుడు ట్రంప్ కు షాకిస్తూ, రిపబ్లికన్లకు ఎదురొడ్డి అమెరికాలో అతిపెద్ద సిటీ న్యూయార్క్ కు మేయర్ గా ఎన్నికయ్యారు. అతనే జోహ్రాన్ మమ్ దానీ (Zohran Mamdani).
మమ్ దానీ మరెవరో కాదు. మన పంజాబీ హిందూ మహిళ, ప్రఖ్యాత సినీ డైరెక్టర్ మీరా నాయర్ కుమారుడే. భారతీయ మూలాలున్న జోహ్రాన్ మమ్దానీ న్యూయార్క్ సిటీ మేయర్ గా ఎన్నికయ్యారు. డెమోక్రటిక్ పార్టీ అభ్యర్ధిగా బరిలో నిలిచిన మమ్ధానీ 49.2 శాతం ఓట్లతో అమెరికాను పాలిస్తున్న రిపబ్లికన్ పార్టీ అభ్యర్థిని ఓడించడం విశేషం. అడుగడుగునా మమ్దానీ ఓడించడానికి పన్నిన ప్రచార పన్నాగాలు అన్నీ, ఇన్నీ కావు మరి. మమ్దానీని కమ్యూనిస్టుగా, సోషలిస్టుగా ఎవరెవరో, ఎందరెందరో, ఎన్నెన్నో రకాల ఆరోపణలు, విమర్శలు చేశారు. అయినప్పటికీ న్యూయార్క్ జనం మమ్దానీకే జేజేలు పలికారు. తద్వారా న్యూయార్క్ మేయర్ పదవికి జరిగిన ఎన్నికలు తరం మార్పునకు, ఆలోచనా ధోరణులకు మధ్య జరిగిన సంఘర్షణకు సంకేతంగా తీర్పు చెప్పారు.
న్యూయార్క్ తో పాటు న్యూజెర్సీ, వర్జీనియాలోనూ డెమోక్రాటిక్ పార్టీ విజయం సాధించింది. నిరుడు జరిగిన అమెరికా అధ్యక్ష ఎన్నికల్లో ఘోరంగా ఓడిన డెమోక్రటిక్ పార్టీకి ఈ గెలుపు పెద్ద విక్టరీగా విశ్లేషకులు అభివర్ణిస్తున్నారు. ముప్పయి మూడేళ్ల వయస్సు గల కుర్రాడు జోహ్రాన్ మమ్దానీ గెలుపు ఖాయంగా అక్కడి ప్రముఖ కార్మిక నేత, డెమోక్రాటిక్ సెనేటర్ బెర్నీ శాండర్స్ చెప్పిన జోస్యం నిజం కావడం అత్యంత ఆసక్తికరం. మమ్దానీ భారతీయ మూలాలున్న యువకుడు. హిందీ బాగా మాట్లాడగలరు. ఒడియా భాష కూడా అర్థమవుతుంది. మంచి వక్త. అద్భుతంగా హిందీ, పంజాబీ పాటలు పాడగలరు.
ప్రస్తుత మేయర్ ఎరిక్‌ ఆడమ్స్‌ అవినీతి, పరిపాలనా లోపాలతో విమర్శలు ఎదుర్కొంటున్న పరిస్థితుల్లో, మమ్దానీ మార్పునకు ప్రతీకగా ఎదిగారనే వ్యాఖ్యలు ఈ సందర్భంగా వినిపిస్తున్నాయి. హౌజింగ్ ఖర్చులు, అద్దె నియంత్రణ, వలసదారుల సంక్షేమం, ప్రజా రవాణా సదుపాయాల వంటి పలు ప్రజా సమస్యలపై ఆయన సూటిగా మాట్లాడారు. దీంతో న్యూయార్క్ యువత, మైనారిటీలు, వలసదారుల నుంచి మద్దతు లభించింది. ముఖ్యంగా ‘న్యూయార్క్ నాట్ ఫర్ సేల్’ అంటూ మమ్దానీ తన ఎన్నికల ప్రచారంలో నినదించిన వ్యాఖ్య బాగా ఆకట్టుకుందనే చెప్పాలి.
జోహ్రాన్ మమ్దానీ తల్లి మీరా నాయర్, భారతీయ మూలాలున్న ప్రపంచ ప్రఖ్యాత సినీ దర్శకురాలు. ఒడిషాలోని రూర్కెలాలో 1957లో జన్మించిన మీరా నాయర్, సలాం బాంబే, మాన్సూన్ వెడ్డింగ్, The Namesake వంటి ప్రఖ్యాత చిత్రాలతో అంతర్జాతీయంగా గుర్తింపు తెచ్చుకున్నారు. తండ్రి మహ్మూద్ మమ్దానీ ఉగాండాలో జన్మించిన భారతీయ వంశస్తుడు. ఆయన ఆఫ్రికాలో ప్రముఖ రాజకీయ తత్వవేత్త. ప్రస్తుతం కొలంబియా విశ్వవిద్యాలయం ప్రొఫెసర్‌ గా ఉన్నారు. ఇతను రచించిన Citizen and Subject, Good Muslim, Bad Muslim వంటి రచనలు ప్రపంచవ్యాప్తంగా పాఠ్య గ్రంథాలుగా ఉండడం విశేషం. ఇటువంటి బహు సాంస్కృతిక కుటుంబ వాతావరణంలో పెరిగిన జోహ్రాన్ మమ్దానీ చిన్నప్పటి నుంచే సమానత్వం, మానవ హక్కులు, కళాత్మకత విలువలను గ్రహించారు. తల్లి నుంచి సృజనాత్మకతను, తండ్రి నుంచి మానవతా దృష్టిని మమ్దీన పొందారు.
ఇదీ మమ్దానీ రాజకీయ నేపథ్యం:
జోహ్రాన్ మమ్దానీ 1991 అక్టోబర్ 18న ఉగాండాలోని కంపాలాలో జన్మించారు. హార్వర్డ్‌ యూనివర్శిటీలో విద్యనభ్యసించిన తర్వాత న్యూయార్క్‌లోని క్వీన్స్ ప్రాంతం అస్టోరియా నుంచి అసెంబ్లీ సభ్యునిగా ఎన్నికయ్యారు. అద్దెదారుల హక్కులు, వలసదారుల జీవన ప్రమాణాలపై ఆయన గళం విప్పారు. తద్వారా వేలాది మందిని ఆకట్టుకున్నారు. ఆయన ఓ స్వచ్ఛంద సంస్థ ద్వారా సేవలు కూడా అందించారు. ట్రక్ డ్రైవర్ల సంఘం కూడా ఏర్పాటు చేసి వాళ్ల సమస్యలపై పోరాడి విజయం సాధించారు.
భారతీయ మూలాలున్న తల్లి, ఆఫ్రికన్‌‐ఇండియన్‌ వంశపారంపర్యం కలిగిన తండ్రి, బహు సాంస్కృతిక నేపథ్యం కలిసి జోహ్రాన్ మమ్దానీని న్యూయార్క్ రాజకీయాల్లో ఒక సరికొత్త నాయకునిగా ఎదిగేలా చేశాయని చెప్పకతప్పదు. అతని గెలుపు కేవలం రాజకీయ విజయం కాదు. భిన్నత్వంలో ఏకత్వాన్ని నమ్మే నగరం ఒక యువనేతకు సేవ చేసే అవకాశాన్ని ఇవ్వడమే అవుతుందని డెమోక్రాటిక్ సెనేటర్ బెర్నీ శాండర్స్ ఈ సందర్భంగా వ్యాఖ్యానించారు. న్యూయార్క్ చరిత్రలో తొలి ముస్లిం మేయర్‌గా, భావితరం నేతగా నిలుస్తారు. ఈ విజయంతో ఆయన దేశవ్యాప్తంగా గుర్తింపు పొందే అవకాశం ఉంది. ప్రజా సంక్షేమం, ఆర్థిక సమానత్వం, సామాజిక న్యాయం వంటి అంశాల ప్రాతిపదికగా జరిగిన ఎన్నిక ఇది. మమ్దానీ తనది డెమోక్రటిక్ సోషలిస్ట్ విధానమని చెప్పి ఎన్నికల్లో పోటీ చేసి గెలవడం అత్యంత ఆసక్తికరం.
(ఆర్టికల్ ఇన్ పుట్స్: ఆకుల అమరయ్య)
