హైదరాబాద్: కేంద్ర హోం శాఖ సహాయ మంత్రి బండి సంజయ్ సంచలన వ్యాఖ్యలు చేశారు. తెలంగాణాకు చెందిన రాజకీయ నాయకులు వేదికలపై ప్రజాస్వామ్యాన్ని ప్రభోదిస్తూ మావోయిస్టులకు మద్ధతునిస్తున్నట్లు పేర్కొంటున్నవారు సంబంధాలను తెంచుకోవాలని, లేనిపక్షంలో వారి గుట్టు రట్టవుతుందని హెచ్చరించారు. దేశభద్రతకు ముప్పుగా పరిణమించేవారు ఎవరైనా తప్పించుకోలేరన్నారు. ‘మీరు ఎవరైనా కావచ్చు, ఎంత పెద్దవారని మీరు అనుకున్నా, సమస్యలో భాగస్వాములైతే పక్కకు తప్పుకోవాలి. తప్పువైపు నిలబడితే ఎంతపెద్దవారైనా పడిపోక తప్పదు’ అని అన్నారు. ఈమేరకు తన ‘ఎక్స్’ ఖాతాలో సంజయ్ సంచలన వ్యాఖ్యలతో కూడిన పోస్ట్ చేశారు.
కేంద్ర దర్యాప్తు సంస్థలు మావోయిస్టుల నిర్మూలనకే పరిమితం కావని, దేశ ప్రధాని, కేంద్ర హోం మంత్రి అమిత్ షా మార్గదర్శకత్వంలో నిఘా సంస్థలు ‘నెట్ వర్క్’ను వెలికి తీస్తున్నట్లు పేర్కొన్నారు. ప్రముఖ ఆంగ్ల పత్రిక ప్రచురించిన రెండు వార్తా కథనాలను కూడా కేంద్ర మంత్రి బండి సంజయ్ తన ఎక్స్ పోస్టులో జత చేయడం ఈ సందర్భంగా గమనార్హం.
