బీజేపీ తెలంగాణా అధ్యక్షడు రామచందర్ రావు పంపిన లీగల్ నోటీసులపై డిప్యూటీ సీఎం మల్లు భట్టి విక్రమార్క స్పందించారు. భట్టి విక్రమార్క లీగల్ నోటీసులకు భయపడే వ్యక్తి కాదన్నారు. సమయం వచ్చినప్పుడు పార్టీగా, వ్యక్తిగా లీగల్ నోటిసుకు ఎలా సమాధానం చెప్పాలో ఆ విధంగా చెబుతాననని భట్టి అన్నారు. బీజేపీ రాష్ట్ర అధ్యక్షుడు రామచంద్రరావుకు దళితులు, బీసీలు, మైనార్టీలు అంటే చిన్న చూపు ఉందన్నారు. దేశంలో ఈ వర్గాలకు మేలు జరుగుతుంటే ఆయన పదేపదే అడ్డుపడుతున్నారని ఆరోపించారు. హైదరాబాద్ సెంట్రల్ యూనివర్సిటీలో రామచంద్ర రావు పాత్ర ఏంటో అందరికీ తెలుసని భట్టి అన్నారు.
హెచ్ సీ యూ విద్యార్థి రోహిత్ వేముల ఆత్మహత్యోదంతంపై భట్టి చేసిన వ్యాఖ్యలపై బీజేపీ అధ్యక్షుడు రామచందర్ రావు ఇటీవల లీగల్ నోటీసు జారీ చేసిన సంగతి తెలిసిందే. తనపై చేసిన ఆరోపణలపై మూడు రోజుల్లోగా క్షమాపణ చెప్పాలని, లేకుంటే రూ. 25 కోట్ల పరువునష్టం, క్రిమినల్ కేసులు కూడా ఎదుర్కోవలసి ఉంటుందని రామచందర్ రావు తన నోటీసుల్లో పేర్కొన్న నేపథ్యంలో డిప్యూటీ సీఎం భట్టి స్పందించారు. హైదరాబాద్ సెక్రటేరియట్ లో నిర్వహించిన మీడియా సమావేశంలో భట్టి మాట్లాడారు.
కులగణన సర్వే అవసరం లేదన్న మోదీని జనగణనతో పాటు కుల గణన కూడా చేస్తామని నిర్ణయం తీసుకునేలా తెలంగాణ రాష్ట్ర ప్రభుత్వం పకడ్బందీగా, విజయవంతంగా కులగణన సర్వే పూర్తి చేసిందని భట్టి పేర్కొన్నారు. తెలంగాణ రాష్ట్ర ప్రభుత్వం చేపట్టిన కుల గణన సర్వేకి ముందు సర్వేకి తర్వాత అనే చర్చ దేశవ్యాప్తంగా జరుగుతోందన్నారు. తెలంగాణ రాష్ట్ర ప్రభుత్వం చేపట్టిన కుల గణన సర్వే చారిత్రాత్మకమైనదిగా చెప్పారు. పార్లమెంటు సమావేశాలు జరుగుతున్న నేపథ్యంలో సీఎం రేవంత్ రెడ్డి నాయకత్వంలో బీసీలకు 42% రిజర్వేషన్ కల్పించేందుకు అన్ని రాజకీయ పార్టీలు, లోక్ సభ, రాజ్యసభ ఎంపీల మద్దతు కూడగట్టేందుకు ఢిల్లీకి వెళ్తున్నట్లు చెప్పారు.
బీసీ బిల్లును త్వరితగతిన పార్లమెంట్లో ప్రవేశపెట్టి మద్దతు కూడగట్టడమే తెలంగాణ ప్రభుత్వ లక్ష్యమన్నారు. ఈ కార్యక్రమంలో అఖిల భారత కాంగ్రెస్ పార్టీకి చెందిన 100 మంది ఎంపీలు కూడా కలిసి వస్తారన్నారు. తెలంగాణలో అధికారంలోకి రాగానే కుల గణన చేపడుతామని తమ నాయకుడు రాహుల్ గాంధీ ఎన్నికల ముందు ప్రకటించారని, ఆ మేరకు విజయవంతంగా కుల గణన పూర్తి చేసి కేబినెట్ లో, ఆ తర్వాత అసెంబ్లీలో తీర్మానం ప్రవేశపెట్టి ఆమోదింపజేశామన్నారు. కుల గణనలో తెలంగాణ దేశానికి ఒక రోల్ మోడల్ గా నిలుస్తుందని, దేశంలోని ఏ రాష్ట్రం అయినా కులగణన చేపట్టాలంటే తెలంగాణ రాష్ట్ర ప్రభుత్వాన్ని అనుసరించాల్సిందేనని భట్టి అన్నారు.
గతంలో దేశంలో చేపట్టిన వివిధ రకాల సర్వేలు, వారి అనుభవాలు పరిగణలోకి తీసుకున్నామన్నారు. సర్వేకు సంబంధించిన ప్రశ్నావళి తయారీ విధానం, జిల్లా, రాష్ట్రస్థాయిలో భాగస్వాములు అందరినీ సర్వేకు ముందే సమావేశపరిచి వారి అభిప్రాయాలను తీసుకుని ముందుకు వెళ్ళామన్నారు. ప్రతి 150 ఇళ్లకు ఒక బ్లాక్, ప్రతి బ్లాక్ కు ఒక అధికారిని నియమించామని, పూర్తిగా ప్రభుత్వ ఉద్యోగుల ఆధ్వర్యంలో సర్వే జరిగిందన్నారు. రాష్ట్ర ప్రభుత్వం చేపట్టిన కులగణన సర్వేకు అసెంబ్లీలోనే బీజేపీ, టీఆర్ఎస్ ఎమ్మెల్యేలు కూడా మద్దతు ఇచ్చారన్నారు. అదేవిధంగా పార్లమెంటులో కూడా పార్టీలకతీతంగా బీసీ బిల్లుకు మద్దతు ఇస్తారని రాష్ట్ర ప్రభుత్వం ఆశిస్తున్నట్లు చెప్పారు.
యాభై శాతం రిజర్వేషన్ల క్యాప్ ను తొలగించకపోతే భవిష్యత్తులో ఇబ్బంది కలుగుతుందని ఆర్డినెన్స్ తీసుకు వచ్చామని, ఆర్డినెన్స్ కు గవర్నర్ ఆమోదముద్ర వేస్తారని ఆశిస్తున్నట్లు చెప్పారు. రిజర్వేషన్ల బిల్లు మేమే తెచ్చాం, మేమే పరిష్కరించుకోవాలని బీజేపీ అధ్యక్షుడు రామచంద్రరావు ప్రకటించారని, ఆయన విషయాన్ని సరిగా అవగాహన చేసుకోలేదని భావిస్తున్నట్లు భట్టి చెప్పారు. బీసీ రిజర్వేషన్ల బిల్లు అనేది కేంద్ర ,రాష్ట్ర ప్రభుత్వాల మధ్య అంశమని, రాజకీయ పార్టీలకు సంబంధించింది కాదన్నారు. పదేళ్లపాటు రాష్ట్రాన్ని పరిపాలించిన వాళ్ళు అన్నీ గాలికి వదిలేశారని, తమకు నిబద్ధత ఉంది కాబట్టే ప్రణాళికా ప్రకారం ముందుకు వెళుతున్నట్లు భట్టి పేర్కొన్నారు.
