రాష్ట్ర అభివృద్ధిని అందుకునే శక్తి దేశంలో ఏ రాష్ట్రానికి లేదని తెలంగాణా డిప్యూటీ సీఎం మల్లు భట్టి విక్రమార్క అన్నారు. పదేళ్లు ఫామ్ హౌస్ లో పడుకుని, ప్రజల సొమ్ము దుబారా చేసి, ప్రస్తుతం రాష్ట్ర ఎదుగుదలను చూడలేక అడ్డగోలుగా మాట్లాడే వారికి అభివృద్ధితోనే తాము సమాధానం చెబుతామన్నారు. శనివారం ఆయన భద్రాద్రి కొత్తగూడెం జిల్లాలో పలు విద్యుత్ సబ్ స్టేషన్లకు, పాల్వంచలో హై లెవెల్ బ్రిడ్జి పనులకు శంకుస్థాపన చేశారు. ఈ సందర్భంగా కొత్తగూడెం కలెక్టరేట్ లో ఏర్పాటు చేసిన సభలో డిప్యూటీ సీఎం ప్రసంగించారు.
గిరిజనులు ఆత్మగౌరవంతో బతికేలా, అడవి నష్టపోకుండా ఉండేలా ఇందిరా సౌర జలవికాసాన్ని ప్రారంభిస్తున్నట్లు డిప్యూటీ సీఎం భట్టి చెప్పారు. గిరిజనులపై ఒక్క రూపాయి భారం లేకుండా ఈ పథకం కోసం రూ. 12,500 కోట్లు ఖర్చు చేయబోతున్నట్లు చెప్పారు. ఉమ్మడి రాష్ట్ర చరిత్రలోనే లేనంత విద్యుత్ డిమాండ్ వచ్చినప్పటికీ చిన్న అంతరాయం లేకుండా రికార్డు స్థాయిలో విద్యుత్ సరఫరా చేశామన్నారు. ఈ రాష్ట్రంలో కరెంటు తెచ్చిందే కాంగ్రెస్, కేసీఆర్ తెచ్చింది లేదు ..ఇచ్చిందీ లేదని భట్టి అన్నారు.
రాష్ట్రవ్యాప్తంగా సమగ్ర అభివృద్ధి కోసం ప్రజా ప్రభుత్వం రేవంత్ రెడ్డి నాయకత్వంలో పక్కా ప్రణాళికతో ముందుకు పోతోందన్నారు. అదేవిధంగా గోదావరి నదిపై నావిగేషన్ కు అధ్యయనం చేయిస్తామని చెప్పారు. సీతారామ ప్రాజెక్టు రాష్ట్ర ప్రభుత్వ ప్రాధాన్యత ప్రాజెక్టుగా ముందుకు తీసుకుపోతున్నామని తెలిపారు. ప్రాజెక్టు కాలువలకు కావలసిన భూసేకరణ చేపట్టాలని అందుకు అవసరమైన నిధులను విడుదల చేస్తామన్నారు. ప్రాజెక్టులు నిర్మించి సాగునీటి కాలువలు నిర్మించకపోవడంతో ఉపయోగం ఉండదని, బ్యారేజీలు, రిజర్వాయర్లు కట్టి వదిలేస్తే సముద్రంలో నీళ్లు ఉన్నట్టే కానీ ఉపయోగం ఉండదన్నారు.
కేంద్ర నుంచి రాష్ట్రానికి రావలసిన నిధులు, అభివృద్ధి పనుల గురించి ఎప్పటికప్పుడు పర్యవేక్షించేందుకు ఢిల్లీలో ప్రత్యేక వ్యవస్థను ఏర్పాటు చేసినట్లు డిప్యూటీ సీఎం తెలిపారు. రాష్ట్రానికి చెందిన ఎంపీలంతా కలిసి కేంద్ర మంత్రులతో సంప్రదింపులు జరుపుతారని, ఆ తర్వాత రాష్ట్ర ప్రభుత్వం నుంచి మంత్రులు కూడా ఢిల్లీ వెళ్లి కేంద్ర మంత్రులు అధికారులను కలుస్తారని వివరించారు. మన రాష్ట్ర ఎంపీలకు కావలసిన పూర్తి సమాచారం అందించాం, వారు చక్కగా పనిచేస్తున్నారని కితాబు ఇచ్చారు.
