మెదక్: లంచం తీసుకుని అదే డబ్బుతో పారిపోతూ ఏసీబీకి పట్టుబడ్డ ఓ ఎస్ఐ ఘటనలో స్థానికులు టపాసులు కాల్చి సంబరాలు చేసుకోవడం తీవ్ర చర్చనీయాంశంగా మారింది. మెదక్ జిల్లా టేక్మాల్ ఎస్ఐ రాజేష్ ఓ వ్యక్తి నుంచి రూ. 30 వేలు లంచం తీసుకుంటుండగా ఏసీబీ అధికారులు రంగప్రవేశం చేశారు. అయితే ఏసీబీ అధికారులను చూసిన ఎస్ఐ రాజేష్ బాధితుని నుంచి తీసుకున్న లంచం డబ్బుతో పారిపోతుండగా, వెంబడించి మరీ అతన్ని పట్టుకున్నారు.
లోక్ అదాలత్ లో పరిష్కారమైన ఓ కేసు అంశంలో ఫిర్యాదు దారుని నుంచి రూ. 30 వేల లంచాన్ని ఎస్ఐ రాజేష్ ఆశించాడు. ఘటనపై సమాచారం అందుకున్న ఏసీబీ అధికారులు రాజేష్ ను పట్టుకునేందుకు పోలీస్ స్టేషన్ కు చేరుకున్నారు. వారిని చూసిన ఎస్ఐ తీసుకున్న డబ్బుతో వ్యవసాయ పొలాల్లోకి వెళ్లి పారిపోతుండగా వెంబడించిన ఏసీబీ అధికారులు అరెస్ట్ చేశారు. ఎస్ఐ రాజేష్ ను ఏసీబీ అధికారులు హైదరాబాద్ ఏసీబీ కోర్టులో హాజరుపర్చారు. కాగా ఏసీబీ అధికారుల వలకు ఎస్ఐ రాజేష్ చిక్కినట్లు తెలుసుకున్న స్థానికులు టపాసులు కాల్చి సంబరాలు చేసుకోవడం కొసమెరుపు.
