నిత్యం నెత్తుటి యుద్ధం చేస్తున్న చిన్నారులకు సకాలంలో రక్తం అందించి ఆదుకోవడం ప్రతి ఒక్కరు బాధ్యతగా స్వీకరించాలని శ్రీ బాలాజీ ఎస్టేట్స్ అధినేత వత్సవాయి రవి ఓ ప్రకటనలో పిలుపునిచ్చారు. ఈ నెల 6వ తేదీన తన పుట్టినరోజు సందర్భంగా తలసేమియా వ్యాధిగ్రస్తులకు రక్తదాన శిబిరాన్ని నిర్వహిస్తున్నట్లు చెప్పారు. ఖమ్మం వీడివోస్ కాలనీలో గల శ్రీ బాలాజీ ఎస్టేట్స్ అండ్ కన్స్ట్రక్షన్స్ ప్రధాన కార్యాలయంలో ఈ కార్యక్రమాన్ని ఏర్పాటు చేసినట్లు చెప్పారు. రక్తదాన శిబిరం 6వ తేదీన ఉదయం 10 గంటలకు ప్రారంభం కానుందని చెప్పారు.
తలసేమియా వ్యాధితో అనేకమంది ప్రాణాలతో కొట్టుమిట్టాడుతున్నారని వత్సవాయి రవి పేర్కొన్నారు. తలసేమియా వ్యాధికి చికిత్స లేదని, నివారణ ఒక్కటే మార్గమన్నారు. ప్రతి ఒక్కరు విధిగా తమ పిల్లలు తలసేమియా బారిన పడకుండా కాపాడుకోవాలన్నారు. తలసేమియా వ్యాధిగ్రస్తులకు ప్రతి 20 రోజులకు ఒకసారి రక్తం అందించాల్సి ఉంటుందని, అలా చేయకపోతే వారి ప్రాణాలకే ముప్పు వాటిల్లుతుందన్నారు.
కావున తన పుట్టినరోజు సందర్భంగా తలసేమియా వ్యాధిగ్రస్తులకు రక్తదాన శిబిరం నిర్వహించి రక్తం అందించడం కంటే మహాత్కార్యం మరొకటి ఉండదని భావిస్తున్నట్లు చెప్పారు. తాము నిర్వహించే రక్తదాన శిబిరంలో సుమారు 500 యూనిట్ల రక్తం అందించాలనే లక్ష్యంతో కార్యక్రమాన్ని ఏర్పాటు చేశామన్నారు. అందరూ విధిగా రక్తదానం చేసి ప్రాణదాతలు కావాలని వత్సవాయి రవి పిలుపునిచ్చారు.
