(సమీక్ష ప్రత్యేక కథనం)
రవి ప్రకాష్.. మీడియా రంగంలో విజయవంతమైన విలేకరి (successful journalist). ప్రత్యేకంగా పరిచయం చేయాల్సిన అవసరం లేని ప్రముఖ వ్యక్తి. అటువంటి రవిప్రకాష్ సారథ్యం వహిస్తున్న యూ ట్యూబ్ ఛానళ్లలో ఎంత క్వాలిటీ ఉన్న వార్తా కథనాలు రావాలి? వార్తలను ఇష్టపడే తెలుగు ప్రేక్షకులు రవి ప్రకాష్ నుంచి అత్యంత నాణ్యమైన ‘కంటెంట్’నే ఆశిస్తారు. ఇందులో ఎటువంటి సందేహం లేదు. కేవలం వార్తాభిరుచిగల ప్రేక్షకులే కాదు, అనేక మంది జర్నలిస్టులు కూడా రవిప్రకాష్ కోసమే ఆయన నాయకత్వంలో నడిచే న్యూస్ ఛానల్స్ లో ప్రసారమయ్యే కథనాలను ఆసక్తిగా గమనిస్తుంటారు.
ఇటువంటి ఆసక్తితోనే గత రాత్రి R Tvలో కనిపించిన ఓ వార్తా కథనంపై నా దృష్టి పడింది. ‘వేట మొదలైంది.. దేవా వచ్చాడు’ శీర్షికన థంబ్ నెయిల్ కనిపించింది. రవిప్రకాష్ ఛానల్ R Tvలో ఆయన మార్క్ ‘సంచలన’ వార్తా కథనంగా ఆకట్టుకుంది. తెలుగు రాష్ట్రాల్లోనే కాదు దేశవ్యాప్తంగా హాట్ టాపిక్ గా మారిన మావోయిస్టులకు సంబంధించిన వార్త అది. సాదా సీదా వార్తా కథనంలా అనిపించలేదు. ఎందుకంటే యాంకర్ అటు ఇంగ్లీష్, ఇటు తెలుగు భాషల్లో అనర్గళంగా, అత్యంత వేగంగా, గొంతు చించుకుని మరీ మాట్లాడుతున్నాడు.
ఆయన ప్రేక్షకులకు చెబుతున్న సంచలన విషయంలోని సారాంశం ఏమిటంటే.. ఈనెల 18వ తేదీన ఏపీలోని మారేడుమిల్లి అడవుల్లో ఎన్కౌంటర్ కు గురైన మడివి హిడ్మా స్థానంలో దేవా అనే మరో మావోయిస్టు లీడర్ ను పీఎల్జీఏ కమాండర్ గా నియమించారని, పనిలో పనిగా పార్టీ కేంద్ర కమిటీ సభ్యునిగానూ అతన్ని నియమించారని, దేవా వెంటనే బాధ్యతలు చేపట్టి గెరిల్లా ఆర్మీకి శిక్షణ ఇస్తున్నాడని. స్క్రీన్ పై దేవా శిక్షణనిస్తున్న ఎక్స్ క్లూజివ్ విజువల్ ప్రసారమవుతోందని, ఫుల్ స్క్రీన్ లో దాన్ని చూపించాలని పీసీఆర్ హెడ్ ను లైవ్ లోనే యాంకర్ కోరుతున్నాడు.
నిద్రకు ఉపక్రమిస్తున్న నాకు ఒక్కసారిగా కథనంపై మరింత ఆసక్తి పెరిగి, ఇప్పట్లో నిద్ర వచ్చే పరిస్థితి కనిపించలేదు. R Tv వాళ్లు భలే ఎక్స్ క్లూజివ్ విజువల్ పట్టుకున్నారే ..? జర్నలిజమంటే ఇదీ.. జర్నలిస్ట్ అంటే ఇలా పనిచేయాలి.. అనుకుంటూ చూస్తుండగానే యాంకర్ తమ ప్రతినిధి ఉదయ్ ను లైవ్ లోకి తీసుకుని, ఇందుకు సంబంధించి మరింత సమాచారం అందిస్తారని పురమాయించాడు. ఇక ఆ ఛానల్ ప్రతినిధి ఉదయ్ చెప్పడం ప్రారంభించాడు. ఓవైపు ఎన్కౌంటర్లు, ఇంకోవైపు లొంగుబాట్లు జరుగుతున్న పరిస్థితుల్లోనే, మావోయిస్ట్ పార్టీ అత్యంత వేగంగా నిర్ణయాలు తీసుకుంటోందని, హిడ్మా స్థానంలో దేవాను కేంద్ర కమిటీ సభ్యునిగా నియమించిందని, పీఎల్జీఏ కమాండర్ గా బాధ్యతలు చేపట్టారని, పోలీసులకు బిగ్ షాక్ తగిలిందని, జాతీయ మీడియా కూడా గుర్తించనటువంటి అంశాన్ని మనం విశేషంగా సేకరించగలిమంటూ.. చకచకా చెప్పుకుంటూ పోతున్నాడు.
అటు యాంకర్ అడిగే ప్రశ్నలకు, ఇటు ఆ ఛానల్ ప్రతినిధి ‘ఎస్..ఎగ్జాట్లీ’ అంటూ అతని వాదననే అందుకుంటూ, క్లారిటీ ఇస్తూ గుక్కతిప్పుకోకుండా చెప్పుకుంటూ వెడుతున్నాడు. దేవా పీఎల్జీఏ సైన్యానికి శిక్షణనిస్తున్న ఎక్స్ క్లూజివ్ విజువల్ అంటూ ప్రసారం చేస్తున్న దృశ్యాలను అత్యంత ఆసక్తిగా గమనించాను. R Tv వాళ్ల సోర్స్ కు, శ్రమకు హృదయపూర్వక అభినందనలు చెప్పాల్సిందేనని మనసులో అనుకుంటుండగానే, ఈ దృశ్యాలను ఎక్కడో చూసినట్లు నా బుర్రలో అనుమానం తట్టింది. ఎక్కడ చూశానా? ఏ ఛానల్ లో కనిపించిందా? అని ప్రశ్నలు వేసుకుంటుండగానే మెరుపులా సీన్ గుర్తొచ్చింది. ఎస్.. ఆ ఛానల్ లోనే కొద్దిరోజుల క్రితం ఈ విజువల్ ను చూశానని అనిపించింది.
కానీ ధ్రువపర్చుకోవాలి కదా? అందుకే యూ ట్యూబ్ లోకి వెళ్లి వెతగ్గా గులాబీ పార్టీ ఛానల్ T Newsలో కనిపించింది. ‘టీ న్యూస్ ఎక్స్ క్లూజివ్, మావోయిస్ట్ హిడ్మా సంచలన వీడియో’ శీర్షికన థంబ్ నెయిల్ కనిపించింది. గత నెల 26వ తేదీన T News ఈ విజువల్ ను ప్రసారం చేసి, ఆ ఛానల్ కూడా అత్యంత ఆసక్తికర వార్తా కథనాన్ని ప్రసారం చేసింది. ఆ వీడియోను మడివి హిడ్మానే విడుదల చేసినట్లు T News తన కథనంలో స్పష్టంగా చెప్పింది. ఆ కథనపు సారాంశం ఏమిటంటే.. తీవ్ర నిర్బంధం, ఎన్కౌంటర్లు, లొంగుబాట్లు జరుగుతున్న పరిణామాల్లో తన సైన్యానికి హిడ్మా శిక్షణనిస్తున్న వీడియో దేనికి సంకేతం? అనే చర్చ మొదలైందంటూ T News పేర్కొంది.
అదే వీడియోను R Tv తాజాగా ప్రసారం చేస్తూ, పీఎల్జీఏ సైన్యానికి కమాండర్ గా దేవా నాయకత్వ బాధ్యతలు చేపట్టాడని, శిక్షణ ఇస్తున్నాడనే సారాంశంతో ‘సంచలన’ వార్తా కథనాన్ని ప్రసారం చేసింది. ఇందులో అత్యంత ఆసక్తికర పాయింట్ ఏమిటంటే.. ఆ విజువల్ కు ‘కేడర్ కు శిక్షణ ఇస్తున్న దేవా’ అనే రైటప్ ను కూడా జోడించడం. అయితే అటు టీ న్యూస్, ఇటు ఆర్ టీవీ ప్రసారం చేసిన ఈ వీడియోలో కనిపిస్తున్న మావోయిస్టుల కవాతులో పెద్ద తేడా లేకపోవడం. విజువిల్ ను నిశితంగా గమనిస్తే ఈ విషయం స్పష్టంగా తెలుస్తుంది. ఈ అంశంలో మొత్తంగా ముఖ్యాంశం ఏమిటంటే.. దాదాపు నెల రోజుల క్రితం టీ న్యూస్ ప్రసారం చేసిన వీడియోనే చూపిస్తూ R Tv కొత్త ‘కత’ను చెప్పిందన్నమాట. కాగా పీఎల్జీఏ సైన్యానికి శిక్షణ ఇస్తూ హిడ్మానే స్వయంగా వీడియోను విడుదల చేసినట్లు తన కథనంలో T News చూపిన ఆ విజువల్ పాతదా? తాజాదా? అనేది మాత్రం వాళ్లకే తెలియాలి.
ఇక విషయం ముగింపునకు వస్తే.. కేవలం R Tvలోనే కాదు, రవిప్రకాష్ లీడర్ షిప్ లో వస్తున్న ‘తొలివెలుగు’ యూ ట్యూబ్ ఛానల్ లోనూ ఇదే కథనంతో అదే వీడియో ప్రసారమైంది. రవిప్రకాష్ వంటి ప్రముఖ జర్నలిస్ట్ నాయకత్వంలో వస్తున్న ఛానల్స్ లో ఇటువంటి ‘నాసిరకం’ వార్తా కథనం రావడాన్ని ఆయన సక్సెస్ తీరును అభిమానించే నావంటి జర్నలిస్టులే కాదు, ప్రేక్షకులూ ఇష్టపడకపోవచ్చు. ఎందుకంటే తెలుగు మీడియాలో రవిప్రకాషే ఓ సంచలనం కాబట్టి. న్యూస్ ఛానళ్లలో ఒకరు వాడుకున్న విజువల్ చేతులు మారి సందర్భానుసారం వాడుకోవడం తప్పు కూడా కాకపోవచ్చు. కానీ నెల రోజుల క్రితం టీ న్యూస్ ప్రసారం చేసిన వీడియోనే చూపిస్తూ, దేవా శిక్షణనిస్తున్నట్లు సరికొత్తగా చెప్పడమే ‘కంటెంట్’లో అసలు విషాదం.
ఎహె.. బహుషా R Tv ప్రతినిధికి ఇది పాత వీడియో అని తెలియకపోవచ్చు.. అతన్ని ఎవరో మిస్ లీడ్ చేసి ఉండొచ్చు., అందరికన్నా ముందుండాలనే తపనతో సరికొత్త వీడియోగా అతను భ్రమించి ఉండవచ్చు.. అని కొట్టిపారేసే అవకాశమూ లేదు. ఎందుకంటే ముందుగా ఈ విజువల్ తో కథనం అందించిన T News ప్రతినిధి, తాజాగా అదే విజువల్ తో ‘సంచలన’ న్యూస్ స్టోరీని అందించిన R Tv ప్రతినిధి స్నేహితులనే ప్రచారం ఖమ్మం మీడియా వర్గాల్లో ఉండనే ఉంది.
అయితే ఇంత ‘సంచలనాత్మక విజువల్’ను ఎక్స్ క్లూజివ్ గా అందుకుని వార్తా కథనంగా ప్రసారం చేసిన R Tv లోని ఇన్ పుట్, డెస్కు, ఔట్ పుట్ విభాగాలు కనీస పరిశీలన చేయలేదా? అనే ప్రశ్న కూడా ఈ సందర్భంగా రేకెత్తుతోంది. ఛత్తీస్ గఢ్ రాష్ట్రంలోని దండకారణ్యంలో ప్రస్తుతం నెలకొన్న పరిస్థితుల్లో, రెండు, మూడు కిలోమీటర్లకు ఓ బేస్ క్యాంపు ద్వారా నక్సల్ కదలికలపై ‘డ్రోన్ కన్ను’ వేసి వారిని తుదముట్టిస్తున్న పరిణామాల్లో, ఆయుధపరంగా, సాయుధపరంగా భారీ నష్టాలను చవి చూస్తున్న మావోయిస్ట్ పార్టీ పీఎల్జీఏకు దేవా శిక్షణ ఇచ్చే సురక్షిత ప్రాంతం ఇప్పటికీ ఉందా? అనే మౌళిక సందేహానికి తావు లేకుండా సంచలన వార్తా కథనాన్ని ప్రసారం చేయడం గమనార్హం.
అందువల్ల చెప్పొచ్చేదేమిటంటే.. రవి ప్రకాష్ వంటి సక్సెస్ ఫుల్ జర్నలిస్టు లీడర్ షిప్ లోని R Tvలో ఇటువంటి ‘పరమ నాసిరకం’ కంటెంట్ తో, పాత వీడియోను జోడిస్తూ సంచలన వార్తా కథనం వెలువడడం అతన్ని అభిమానించేవారెవరూ హర్షించరనేది నిర్వివాదాంశం.
ప్రత్యేక గమనిక: ఈ కథనంలో చూపిన ఆయా కథనాల్లోని స్క్రీన్ షాట్లు ఏఐ ఆధారితం కాదని స్పష్టీకరించడమైనది. అయినా నమ్మకం లేకుంటే దిగువన గల వీడియో లింకుల్లో ఆయా వార్తా కథనాలను చూడవచ్చు.
✍ ఎడమ సమ్మిరెడ్డి
