బీఆర్ఎస్ పార్టీకి చెందిన ఎమ్మెల్సీ పోచంపల్లి శ్రీనివాసరెడ్డి చిక్కుల్లో పడ్డారు. తనకు చెందిన ఫాం హౌజ్ లో కోడి పందేల నిర్వహణకు సంబంధించి మొయినా బాద్ పోలీసులు ఆయనకు గురువారం నోటీసులు ఇచ్చారు. మాదాపూర్ లోని పోచంపల్లి ఇంటికి వెళ్లి మరీ పోలీసులు నోటీసులు జారీ చేశారు.
పోచంపల్లి శ్రీనివాసరెడ్డికి చెందిన హైదరాబాద్ నగర శివార్లలోని ఫాం హౌజ్ లో పోలీసులు దాడులు నిర్వహించారు. ఇక్కడ కోడి పందేలు నిర్వహిస్తున్నట్లు పోలీసు దాడుల్లో వెలుగులోకి వచ్చింది. ఈ ఘటనలో సుమారు 61 మందిని పోలీసులు అదుపులోకి తీసుకుని, రూ. 30 లక్షల నగదు, 55 లగ్జరీ కార్లు, 86 పందెం కోళ్లు, పెద్దమొత్తంలో బెట్టింగ్ కాయిన్స్, పందెం కోళ్ల కాళ్లకు కట్టే 46 కత్తులను పోలీసులు స్వాధీనం చేసుకున్నట్లు అధికార వర్గాలు ప్రకటించాయి.
కోనసీమ ప్రాంతానికి చెందిన భూపతిరాజు శివకుమార్ వర్మ అలియాస్ గబ్బర్ సింగ్ పోచంపల్లికి చెందిన ఫాం హౌజ్ లో ఈ పందేల దందా నిర్వహిస్తున్నట్లు పోలీసులు ప్రాథమిక విచారణలో తేల్చారు.క్యాసినో, పేకాట, కోడి పందేలను ఇక్కడ రెండేళ్లుగా నిర్వహిస్తున్నట్లు పోలీసులు గుర్తించారు. ఈ అంశంలో వివరణను కోరుతూ ఎమ్మెల్సీ పోచంపల్లి శ్రీనివాసరెడ్డికి పోలీసులు నోటీసులు జారీ చేశారు.
ఇదిలా ఉండగా ఈ ఘటనను ప్రస్తావిస్తూ సీఎం చీఫ్ పీఆర్వో భోరెడ్డి అయోధ్యరెడ్డి బీఆర్ఎస్ వర్కింగ్ ప్రెసిడెంట్ కేటీఆర్ పై సెటైర్లు వేశారు. ఈమేరకు ఎక్స్ ఖాతాలో కేటీఆర్ ను కోట్ చేస్తూ ట్వీట్ చేశారు. ‘మిస్టర్ కేటీఆర్ గారు.. 2009లో మీ ఆస్తులు రూ. 4.35 కోట్లు, 2023లో మీ ఆస్తులు రూ. 53.31 కోట్లు, మీ ఆస్తులు ఇంత ఘనంగా పెరగడానికి ఇలాంటి వ్యాపారాలేనా? ఇంకా ఏమైనా బయటకు రావలసినవి ఉన్నాయా? భీమవరం నుంచి బోస్టన్ దాకా స్పందించే మీరు.. దీనికి కూడా స్పందిస్తారని ఆశిస్తూ..’ అంటూ అయోధ్య రెడ్డి ట్వీట్ ముగించారు. ఈ ట్వీట్ లో పోలీసులు స్వాధీనం చేసుకున్న నగదు ఇతరత్రా వస్తువులతో కూడిన వీడియోను కూడా లింక్ చేసి ప్రదర్శించారు.
ఇదిలా ఉండగా ఫాం హౌజ్ లో కోడి పందేల ఘటనపై ఎమ్మెల్సీ పోచంపల్లి శ్రీనివాసరెడ్డి వివరణ ఇచ్చారు. నగర శివార్లలో గల తోల్కట్టలోని భూమి వ్యవహారాలను తన మేనల్లుడు జ్ఞాన్ దేవ్ చూస్తున్నాడని, తోల్కట్టలో ఎటువంటి ఫాం హౌజ్ గానీ, గెస్ట్ హౌజ్ గానీ లేవని, మామిడి, కొబ్బరితోటలతోపాటు రెండు గదులు ఉన్నట్లు చెప్పారు. తన ప్రమేయ లేకుండా తోటను మరొకరికి కౌలుకు ఇచ్చారని, రమేష్ అనే వ్యక్తికి కౌలుకు ఇచ్చినట్లు నిన్నటి ఘటన తర్వాత జ్ఞాన్ దేవ్ చెప్పాడన్నారు. అయితే తోటను వెంకటపతిరాజు అనే వ్యక్తికి రమేష్ కౌలుకు ఇచ్చినట్లు తెలిసిందని, నిన్నటి వరకు తన దృష్టికి ఈ విషయం రాలేదని, సదరు వ్యక్తులపై చర్యలు తీసుకోవాలని పోలీసులకు తాను ఫిర్యాదు చేసినట్లు ఎమ్మెల్సీ పోచంపల్లి శ్రీనివాసరెడ్డి వివరించారు. తోల్కట్టలో అసాంఘిక కార్యకలాపాలు జరిగి ఉంటే తనకు సంబంధం లేదని, ఘటన జరిగిన రోజు తాను వరంగల్ లో ఓ ఫంక్షన్ లో ఉన్నానని, రాజకీయంగా ఇబ్బంది పెట్టడానికే తనపై దుష్ప్రచారం సాగుతోందని, చట్టవ్యతిరేక, అసాంఘిక కార్యకలాపాలను ఉపేక్షించబోనని, తోటలో అసాంఘిక కార్యకలాపాలు జరిగి ఉంటే చర్యలు తీసుకోవాలని, భూమి యజమానిగా పోలీసులు తనకు నోటీసు ఇచ్చారని, వివరణ ఇస్తానని, కేసు విచారణలో పోలీసులకు అన్నివిధాలుగా సహకరిస్తానని ఎమ్మెల్సీ పోచంపల్లి శ్రీనివాసరెడ్డి స్పష్టం చేశారు.
