నల్గొండ: వైద్యుల నిర్లక్ష్యంతో నిండు గర్భిణీ మృతి చెందిన ఘటనకు సంబంధించిన కేసులో నల్గొండ జిల్లా వినియోగదారుల వివాదాల పరిష్కార కమిషన్ (DCDRC) సంచలన తీర్పునిచ్చింది. బాధితురాలి కుటుంబ సభ్యులకు కోటి రూపాయల మొత్తాన్ని పరిహారంగా చెల్లించాలని నార్కట్ పల్లిలోని కామినేని ఆసుపత్రి యాజమాన్యాన్ని ఆదేశిస్తూ DCDRC ప్రెసిడెంట్ మామిడి క్రిస్టోఫర్, సభ్యులు ఎస్. సంధ్యారాణి, కాటేపల్లి వెంకటేశ్వర్లు తీర్పునిచ్చారు. కేసు పూర్వాపరాల్లోకి వెడితే..
ఫిర్యాదుదారుని తరపున న్యాయవాది మేరెడ్డి నరసింహారెడ్డి కథనం ప్రకారం.. నల్లగొండ జిల్లా చిట్యాల మండలం పెదకాపర్తి శివారు ఆరేగూడెం గ్రామానికి చెందిన అస్నాల స్వాతి గర్భం దాల్చింది. వైద్య పరీక్షల కోసం ఆమె కామినేని ఆసుపత్రిని ఆశ్రయించారు. రెగ్యులర్ చెకప్ లో భాగంగా 2018 జూలై 9వ తేదీ నుంచి 13వ తేదీ వరకు వరుసగా ఆసుపత్రి వైద్యులను సంప్రదించారు. అయితే ఆసుపత్రికి చెందిన వైద్యుల సూచన మేరకు ప్రసవం (డెలివరీ) కోసం స్వాతి జూలై 13వ తేదీన మధ్యాహ్నం 3.40 గంటలకు ఆసుపత్రిలో ఇన్ పేషెంట్ గా చేరారు. ఈ సందర్భంగా సిజేరియన్ ఆపరేషన్ ద్వారా ప్రసవం చేయాలని డాక్టర్లు పేర్కొన్నారు.
ప్రసవం కోసం సిజేరియన్ ఆపరేషన్ ప్రక్రియలో భాగంగా పేషెట్ స్వాతికి వైద్యులు అనస్తీషియా (మత్తుమందు) ఇచ్చారు. పండంటి బాబుకు స్వాతి జన్మనిచ్చింది. అయితే 14వ తేదీ ఉదయం 9.15 గంటల వరకు కూడా స్వాతి మెలకువలోకి రాలేదు. దీంతో స్వాతి కుటుంబ సభ్యులు ఆసుపత్రి వైద్యులను ప్రశ్నించారు. సిజేరియన్ ఆపరేషన్ సందర్భంగా తాము ఇచ్చిన మత్తుమందు దిగిపోయిందని, డోస్ సరిపోలేదనే ఉద్ధేశంతో శస్త్ర చికిత్స సమయంలోనే రెండోసారి మత్తుమందు ఇచ్చినట్లు వైద్యులు సమాధానమిచ్చారు. అందువల్లే స్వాతికి మెలకువ రాలేదని, కాస్త సమయం పడుతుందని చెప్పారు.
అయితే పేషెంట్ పరిస్థితిపై అనుమానం కలిగిన కుటుంబ సభ్యులు విషయంపై గ్రామ పెద్దలకు సమాచారం అందించారు. దీంతో ఆరేగూడెం గ్రామ పెద్దలు కొందరు ఆసుపత్రికి చేరుకుని వైద్యులను గట్టిగా నిలదీశారు. ఇదే దశలో స్వాతిని ఐసీయూలోనికి తరలించారు. రాత్రి ఎనిమిది గంటలకు ఐసీయూలోకి తరలించినా ఉదయం 8 గంటల వరకు కూడా స్వాతి స్పృహలోకి రాలేదు. ఐసీయూలో స్వాతిని ఉంచిన బెడ్ మొత్తం రక్తంతో తడిపోవడాన్ని కుటుంబ సభ్యులు, బంధువులు గమనించారు. ఈ నేపథ్యంలోనే స్వాతికి అత్యవసరంగా రక్తం ఎక్కించాలని, రెండు బాటిళ్ల రక్తం కావాలని చెప్పారు. రక్తం ఎక్కించే ప్రక్రియ సఫలం కాలేదు. ప్రశ్నిస్తున్న కుటుంబ సభ్యులకు, బంధువులకు భిన్న సాకులు చెబుతూ వైద్యులు సమయం వెళ్లదీస్తున్నారు.
స్వాతి పరిస్థితిపై తీవ్ర ఆందోళనకు గురైన బంధువులను, కుటుంబ సభ్యులను ఐసీయూలోకి రానివ్వకుండా నిలువరించారు. వైద్యులను స్వాతి బంధువులు, కుటుంబ సభ్యులు గట్టిగా నిలదీయడంతో చికిత్స కొనసాగుతోందని, కోమాలోకి వెళ్లిందని, వంద మందిలో ఎవరో ఒకరికి ఇలా జరుగుతుందని రకరకాల కారణాలతో బుకాయించారు. ఆ తర్వాత 14వ తేదీన ఉదయం 9.15 గంటలకు స్వాతి భర్త క్రాంతికుమార్ చేత ‘హైరిస్క్’ పత్రంపై సంతకం చేయించుకున్నారు. ఓ గంటన్నర సమయం గడిచాక స్వాతి చనిపోయినట్లు ఆసుపత్రి వైద్యులు వెల్లడించారు. దీంతో ఆమె కుటుంబ సభ్యుల, బంధువుల రోదనలు మిన్నంటాయి.
ఈ ఘటనలో కామినేని ఆసుపత్రికి చెందిన వైద్యుల నిర్లక్ష్యంపై స్వాతి కుమారుడు అస్నాల దేవాన్ష్, ఆమె భర్త అస్నాల క్రాంతికుమార్, జీపీఏ హోల్డర్, స్వాతి తండ్రి సప్నాల సత్యానారాయణలు నల్లగొండ జిల్లా వినియోగదారుల వివాదాల పరిష్కార కమిషన్ (DCDRC)ను ఆశ్రయించి ప్రముఖ న్యాయవాది మేరెడ్డి నరసింహారెడ్డి ద్వారా కేసు దాఖలు చేశారు. ఈ కేసులో ప్రతివాదులుగా కామినేని ఆసుపత్రి నిర్వాహకులనేగాక, ఆసుపత్రిలో స్వాతికి చికిత్స నిర్వహించిన డాక్టర్ మాధవి, డాక్టర్ సునితా మిశ్రా, డాక్టర్ ప్రసాద్, డాక్టర్ మారుతిలను కూడా చేర్చారు.
కేసు పూర్వాపరాలను విచారించిన నల్గొండ జిల్లా వినియోగదారుల వివాదాల పరిష్కార కమిషన్ (DCDRC) కామినేని ఆసుపత్రి, వైద్యుల నిర్లక్ష్యాన్ని నిర్ధారించింది. చికిత్సలో నిర్లక్ష్యంగా వ్యవహరించి స్వాతి మరణానికి కారణమైనందుకు బాధిత కుటుంబ సభ్యులకు రూ. కోటి మొత్తాన్ని పరిహారంగా చెల్లించాలని జిల్లా వినియోగదారుల వివాదాల పరిష్కార కమిషన్ (DCDRC) తీర్పునిచ్చింది. ఇందులో రూ. 90 లక్షలు స్వాతి కుమారుడు దేవాన్ష్ శౌర్య పేరుపై జాతీయ బ్యాంకులో డిపాజిట్ చేయాలని, మిగతా పది లక్షలు జీపీఏ హోల్డర్, స్వాతి తండ్రి సాపిడి సత్యనారాయణకు చెల్లించాలని తీర్పునిచ్చారు. అదేవిధంగా మరో లక్ష రూపాయలను కోర్టు ఖర్చులుగా నిర్ణయిస్తూ, ఆ మొత్తాన్ని కూడా బాధిత కుటుంబానికి చెల్లించాలని ఆదేశించారు.
తీర్పు ప్రకారం కోటి రూపాయల పరిహారాన్ని నెల రోజుల్లోగా చెల్లించాలని, లేని పక్షంలో ఏటా 9 శాతం వడ్డీని కలిపి చెల్లించాలని ఆదేశిస్తూ DCDRC ప్రెసిడెంట్ మామిడి క్రిస్టోఫర్, సభ్యులు ఎస్. సంధ్యారాణి, కాటేపల్లి వెంకటేశ్వర్లు తమ తీర్పు ద్వారా కామినేని ఆసుపత్రి నిర్వాహకులను ఆదేశించారు. ఈ కేసులో బాధిత స్వాతి కుటుంబం తరపున విజయవంతమైన వాదనను సాక్ష్యాధారాలతో కోర్టుకు వినిపించి, నివేదించిన ప్రముఖ న్యాయవాది మేరెడ్డి నరసింహారెడ్డిని బాధిత కుటుంబ సభ్యులతోపాటు ఆరేగూడెం గ్రామ ప్రజలు అభినందిస్తూ, ధన్యవాదాలు తెలిపారు.
