హైదరాబాద్: సీఎం రేవంత్ రెడ్డి బనాయిస్తున్న కేసులకు బీఆర్ఎస్ శ్రేణులు భయపడవని రాజ్యసభ సభ్యుడు వద్దిరాజు రవిచంద్ర అన్నారు. న్యాయవ్యవస్థపై తమకు అపార గౌరవం ఉందని, తాము న్యాయస్థానంలోనే తేల్చుకుంటామని ఆయన పేర్కొన్నారు. ఫార్ములా ఈ-కార్ రేస్ కేసులో బీఆర్ఎస్ వర్కింగ్ ప్రెసిడెంట్ కేటీఆర్ ను ప్రాసిక్యూషన్ చేసేందుకు రాష్ట్ర గవర్నర్ ఏసీబీకి అనుమతిచ్చిన నేపథ్యంలో బీఆర్ఎస్ పార్లమెంటరీ పార్టీ లీడర్ కేఆర్ సురేష్ రెడ్డి, మాజీ మంత్రి గంగుల కమలాకర్ తదితరులతో కలిసి ఎంపీ వద్దరాజు రవిచంద్ర హైదరాబాద్ తెలంగాణ భవన్ లో గురవారం విలేకరులతో మాట్లాడారు.
ఈ సందర్భంగా వద్దిరాజు మాట్లాడుతూ, చోటా భాయ్ రేవంత్ రెడ్డి అడగ్గానే బడే భాయ్ ప్రధాని నరేంద్రమోడీ బీఆర్ఎస్ వర్కింగ్ ప్రెసిడెంట్ కేటీ రామారావుపై ప్రాసిక్యూషనుకు అనుమతినిచ్చారని వ్యాఖ్యానించారు. ఫార్ములా ఈ- కార్ రేస్ తో ఏసీబీకి ఏ మాత్రం సంబంధం లేదన్నారు. ఈ కేసులో కేటీఆర్ గతంలో మూడు సార్లు ఏసీబీ ముందు కేటీఆర్ హాజరయ్యారని, లై డిటెక్టర్ పరీక్షకు కూడా సిద్ధమని ప్రకటించడాన్ని రవిచంద్ర ఈ సందర్భంగా గుర్తు చేశారు. ఫార్ములా ఈ-కారు రేస్ కేసు లొట్టపీసుకేసుగా కేటీఆర్ గతంలోనే చెప్పారన్నారు.
ఇచ్చిన హామీలను నెరవేర్చలేక, ప్రజలకు సమాధానం చెప్పే ధైర్యం లేక రేవంత్ రెడ్డి “డైవర్షన్ పాలిటిక్స్” చేస్తున్నారని ఎంపీ రవిచంద్ర విమర్శించారు. కాంగ్రెస్ సర్కార్ కు బీజేపీ నాయకుల సహకారం ఎలా అందుతున్నదో ప్రజలకు తేటతెల్లంగా తెలిసిపోయిందన్నారు. జూబ్లీహిల్స్ ఉప ఎన్నికల్లో కాంగ్రెస్ పార్టీ అధికార దుర్వినియోగానికి పాల్పడుతున్నదని ఆధారాలతో సహా కేంద్ర ఎన్నికల సంఘానికి ఎన్ని ఫిర్యాదులు చేసినా కూడా పట్టించుకోని సందర్భాలను ఎంపీ రవిచంద్ర ప్రస్తావించారు.
కాంగ్రెస్ పార్టీకి బీజేపీ బీ టీమ్ గా మారిందని, బీఆర్ఎస్ ను, ఇతర ప్రాంతీయ పార్టీలను చిదిమేసే ప్రయత్నం కాంగ్రెస్, బీజేపీలు కలిసి చేస్తున్నాయని ఎంపీ వద్దిరాజు ఆరోపించారు. బీహార్ లో ఆర్జేడీని, ఢిల్లీలో ఆమ్ ఆద్మీ పార్టీని ఇదే విధంగాద చిదిమేశారని అన్నారు. హైదరాబాద్ నగరంలో అత్యంత ప్రతిష్ఠాత్మకంగా నిర్వహించిన ఫార్ములా ఈ- కార్ రేస్ కు కేంద్ర మంత్రులు కూడా హాజరైన విషయాన్ని ఈ సందర్భంగా ఎంపీ రవిచంద్ర గుర్తు చేశారు. ఆ రేస్ విజయవంతం కావడంతో హైదరాబాద్ నగర ప్రతిష్ఠ మరింత పెరిగి విదేశీ ప్రత్యక్ష పెట్టుబడులు కూడా తరలి రావడం జరిగిందన్నారు.
ఆ స్పూర్తితో ఇక వరుసగా ప్రతి ఏటా కూడా ఈ రేస్ నిర్వహించాలని సంబంధిత శాఖ మంత్రిగా కేటీఆర్ భావించారని ఎంపీ రవిచంద్ర వివరించారు. ఫార్ములా ఈ రేస్ లో లావాదేవీలు, నగదు మార్పిడి జరగలేదన్నారు. డైవర్షన్ పాలిటిక్స్ చేస్తూ సీఎం రేవంత్ రెడ్డి తన వైఫల్యాలను కప్పి పుచ్చుకుంటున్నారని, అది ఒక అలవాటుగా మారిందని ఎంపీ రవిచంద్ర అన్నారు. కాంగ్రెస్ సర్కార్ తప్పిదాలకు వ్యతిరేకంగా పోరాడే విషయంలో బీఆర్ఎస్ వెనక్కి తగ్గదని ఆయన పేర్కొన్నారు. చోటా భాయ్ చెప్పగానే బడా భాయ్ ఈడీని ప్రయోగిస్తున్నారన్నారు.
