తెలంగాణా రాష్ట్రంలో కాంంగ్రెస్ పార్టీ అధికారంలోకి రావడం వెనుక తన రెక్కల కష్టం ఉందని ఎమ్మెల్సీ చింతపండు నవీన్ అలియాస్ తీన్మార్ మల్లన్న అన్నారు. బుధవారం ఆయన సోమాజిగూడ ప్రెస్ క్లబ్ లో విలేకరులతో మాట్లాడారు. కాంగ్రెస్ పార్టీ ప్రభుత్వం ఏర్పడడానికి తీన్మార్ మల్లన్న ఏం చేశాడో ప్రజలందరికీ తెలుసన్నారు. కేసీఆర్ తో, అప్పటి ప్రభుత్వంపై ఒక్కడినై పోరాడుతుంటే మీరంతా యాడున్నరయా..? అని ప్రశ్నించారు. కాంగ్రెస్ పార్టీ కార్యకర్తలను పిట్టల్కెక్క ఏరుతా ఉంటే.. ఆరోజు తన యూ ట్యూబ్ ఛానల్ కాంగ్రెస్ పార్టీ కార్యకర్తలకు మరో గాంధీ భవన్ అయినట్లు చెప్పుకున్నారు.
ఇవ్వాళ తీన్మార్ మల్లన్న రెక్కల కష్టంతోటి.. నాఒక్కనిదే కాదు.. జర్నలిస్టులు, మేథావి వర్గాలు కష్టపడితే కాంగ్రెస్ పార్టీ అధికారంలోకి వచ్చిందన్నారు. కాంగ్రెస్ పార్టీని ఏ ఒక్కరూ అధికారంలోకి తీసుకురాలేదన్నారు. అందులో తన పాత్ర కూడా ఉందని చెప్పుకున్నారు. తాను 45 నియోజకవర్గాల్లో ప్రచారం చేస్తే 42 నియోజకవర్గాల్లో కాంగ్రెస్ పార్టీ గెలిచిందన్నారు. నువ్వు కూర్చున్న కుర్చీ పునాది ఏర్పడడానికి తానే కారణమని సీఎం రేవంత్ రెడ్డిని ఉద్ధేశించి వ్యాఖ్యానించారు.
తనను కాంగ్రెస్ పార్టీ నుంచి సస్పెండ్ చేసినంత మాత్రాన బీసీ ఉద్యమం ఆగదని, కులగణన పేపర్లు తగులబెట్టడడమే తాను చేసిన తప్పయితే, బీసీల మంచి కోసం వెయ్యిసార్లు తగులబెడుతానని మల్లన్న అన్నారు. వచ్చే ఎన్నికల్లో అధికార పీఠం బీసీలదేనన్నారు. తనను సస్పెండ్ చేస్తూ ఇచ్చిన ప్రతిని ఫ్రేం కట్టి దాచుకున్నట్లు చెబుతూ మీడియా సమావేశంలో ప్రదర్శించారు. పార్టీ నుంచి సస్పెండ్ చేసిన తర్వాత తొలిసారి మల్లన్న స్పందించారు.
