గులాబీ పార్టీ కరదీపిక ‘నమస్తే తెలంగాణా పత్రిక’ శుక్రవారం చర్చనీయాంశ వార్తా కథనాన్ని ప్రచురించింది. ఇందులో నిజానిజాల సంగతి ఎలా ఉన్నప్పటికీ, గత అసెంబ్లీ ఎన్నికల్లో ప్రస్తుత రెవెన్యూ మంత్రి పొంగులేటి శ్రీనివాసరెడ్డి బీఆర్ఎస్ పుట్టి ముంచారనే వాస్తవాన్ని ఈ కథనం ద్వారా అంగీకరించిందనే చెప్పాలి. ఇంతకీ పొంగులేటి గురించి ఆ పత్రిక తాజాగా చెబుతున్న ఇంట్రస్టింగ్ పాయింట్ ఏమిటంటే..? ఆయన త్వరలోనే సీఎం పీఠాన్ని అధిష్టబోతున్నారనే సారాంశంతో ఓ వార్తా కథనాన్ని ప్రచురించింది. అందుకు ఆధారాలేమిటనే ప్రశ్నకు వస్తే.. బీహార్ ఎన్నికల్లో పొంగులేటి పోషిస్తున్న పాత్రను, సీఎం రేవంత్ రెడ్డి పొంగులేటి కదలికలపై కీడును శంకిస్తూ నిఘా ఏర్పాటు చేశారనేది గులాబీ పార్టీ పత్రిక వార్తా కథనం.
ఖమ్మం జిల్లా పాలేరు నుంచి ప్రాతినిధ్యం వహిస్తున్నరెవెన్యూ మంత్రి పొంగులేటి శ్రీనివాసరెడ్డిని బీహార్ ఎన్నికల్లో పరిశీలకునిగా కాంగ్రెస్ అధిష్టానం నియమించిన సంగతి తెలిసిందే. వాయవ్య బీహార్ లోని తూర్పు, పశ్చిమ చంపారన్, భోజ్ పూర్ తదితర జిల్లాల్లోని దాదాపు 30 అసెంబ్లీ సెగ్మెంట్లకు కో-ఆర్డినేటర్ గా, పరిశీలకునిగా పార్టీ బాధ్యతలను అప్పగించింది. తనకు అప్పగించిన బాధ్యతలను నెరవేర్చే ప్రక్రియలో మంత్రి పొంగులేటి బీహార్ లో పర్యటిస్తూనే , మరోవైపు జూబ్లీహిల్స్ ఉప ఎన్నికల ప్రచారంలోనూ పాల్గొంటున్నారు.
అయితే బీహార్ అసెంబ్లీ ఎన్నికల్లో పరిశీలకునిగా నియమితుడైన పొంగులేటి కదలికలపై సీఎం రేవంత్ రెడ్డి నిఘా ఏర్పాటు చేశారనేది గులాబీ పార్టీ పత్రిక ప్రచురించిన వార్తా కథనంలోని ఓ కీలక పాయింట్. పొంగులేటి కదలికలపై సీఎం రేవంత్ రెడ్డి నిరంతర నిఘాను ఏర్పాటు చేశారని, బీహార్ కు తెలంగాణా ఇంటెలిజెన్స్ పోలీసులను పంపారని, రాహుల్, ప్రియాంకా గాంధీ వంటి కాంగ్రెస్ అగ్రనేతలతో పొంగులేటి సన్నిహితంగా మెలుగుతున్నారని, దీంతో ముఖ్యమంత్రి రేవంత్ భయం భయంగా ఉన్నారనేది ఆ పత్రిక వార్తా కథనంలోని ప్రధానాంశాలు.
పొంగులేటి నిర్మించుకున్న బలమైన ఆర్థిక శక్తి భవిష్యత్తులో తమకు ముప్పుగా మారబోతోందని ముఖ్యనేత వర్గం మొదటి నుంచీ కీడును శంకిస్తోందని, ఉమ్మడి రాష్ట్రంలో నల్లారి కిరణ్ కుమార్ రెడ్డి చక్రం తిప్పిన తరహాలోనే పొంగులేటి వ్యవహరిస్తారేమోనని రేవంత్ రెడ్డి వర్గం ఆందోళనగా ఉన్నట్లు ప్రచారం జరుగుతోందని గులాబీ పార్టీ పత్రిక నివేదించింది. ఇదే దశలో గత అసెంబ్లీ ఎన్నికల్లో పొంగులేటి తెలంగాణాలోని 35 అసెంబ్లీ నియోజకవర్గాల్లో కాంగ్రెస్ పార్టీకి వెన్నుదన్నుగా ఉన్నారనే విషయాన్ని అంగీకరిస్తూ ప్రస్తావించడం గమనార్హం. ప్రస్తుతం బీహార్ లోనూ 30 నియోజకవర్గాల్లో పొంగులేటి తన సమన్వయ బాధ్యతలతో ప్రభావం చూపిస్తారని కూడా పేర్కొంది.
మొత్తంగా బీఆర్ఎస్ పార్టీ పత్రిక చెబుతున్న అసలు పాయింట్ ఏమిటంటే., సీఎం రేవంత్ సీటుకు పొంగులేటి వల్ల ప్రమాదం ఉందని. సరే, విపక్ష పార్టీ పత్రిక కాబట్టి ఇద్దరు బలమైన నేతల మధ్య అనుమానాలు కలిగే విధంగా ఈ వార్తా కథనాన్ని ప్రచురించిందనే కాసేపు భావించినా, అవకాశం వస్తే సీఎం సీటును వదులుకునే నాయకులెవరనేది అసలు, సిసలైన ప్రశ్న మాత్రమే కాదు., రాజకీయంగా జరుగుతున్న చర్చ కూడా.
ఖమ్మం జిల్లా నుంచి ఉమ్మడి రాష్ట్ర సీఎంగా అవకాశం చిక్కిన తొలి నేత జలగం వెంగళరావు కాంగ్రెస్ నాయకుడే. అటువంటి అవకాశం తమ నేతకు కూాడా లభిస్తే ఎందుకు వదులుకుంటారనేది మంత్రి పొంగులేటి అభిమానుల సంతోషపు కోరిక. తెలంగాణా కాంగ్రెస్ రాజకీయాల్లో మార్పులంటూ చోటు చేసుకుంటే, ఆ పరిణామాలు పొంగులేటిని సీఎం సీటు వరకు తీసుకువెడితే.. ఆ తదుపరి రాజకీయాలు బీఆర్ఎస్ పార్టీకే పెను ప్రమాదంగా రాజకీయ పరిశీకులు అభివర్ణిస్తున్నారు.
ఎందుకంటే ఆయన పొంగులేటి కనుక.. ఆయన పొలిటికల్ అడుగులు సుదీర్ఘ రాజకీయ భవితకు మార్గాన్ని నిర్దేశించుకుంటాయనేది అందరీకీ తెలిసిన విషయమే. కల్వకుంట్ల కుటుంబాన్ని ఇంటికి సాగనంపుతానని, ఉమ్మడి ఖమ్మం జిల్లా నుంచి ఏ ఒక్క గులాబీ పార్టీ అభ్యర్థిని అసెంబ్లీ గేట్ తాకనివ్వనని ప్రతిన పూని ప్రభావం చూపిన పొంగులేటి సీఎం సీటును అధిష్టిస్తే, బీఆర్ఎస్ నేతల కళ్లముందు కనిపించే సీన్ అదేనని పరిశీలకుల అంచనా. కేవలం పదమూడు, పధ్నాలుగేళ్ల వ్యవధిలోనే రాష్ట్ర రాజకీయాల్లో కీలక స్థానానికి చేరుకుని, ప్రభుత్వంలో ముఖ్యపాత్రను పోషిస్తున్న తమ నాయకుడు గులాబీ పార్టీ పత్రిక జోస్యపు కథనం ఫలించి సీఎం సీటును అధిష్టించాలని పొంగులేటి అభిమానులు అభిలషిస్తున్నారు.
